منصوبوں کی بروقت تکمیل اور کرپشن فری گورننس حکومت خیبرپختونخوا کی اولین ترجیح ہے، ظاہر شاہ طورو

وزیر خوراک خیبرپختونخوا ظاہر شاہ طورو کی زیر صدارت ضلع مردان میں ترقیاتی منصوبوں کی بروقت تکمیل، معیار کی پاسداری اور شفاف طرزِ حکمرانی کے حوالے سے ایک اہم اجلاس گزشتہ روز ڈپٹی کمشنر آفس مردان کے کانفرنس روم میں منعقد ہوا، جس میں ترقیاتی منصوبوں پر پیش رفت، درپیش مسائل اور ان کے حل کے لیے قابلِ عمل حکمتِ عملی پر تفصیلی غور کیا گیا۔اجلاس میں ڈپٹی کمشنر مردان ایڈیشنل ڈپٹی کمشنر فنانس و پلاننگ، پی کے ایچ اے (PKHA)، سوئی نادرن گیس (SNGPL)، پیسکو (PESCO)، اسپورٹس ڈیپارٹمنٹ، ٹی ایم اے مردان، مردان ڈویلپمنٹ اتھارٹی، سی اینڈ ڈبلیو، پبلک ہیلتھ اور فوڈ ڈیپارٹمنٹ اور دیگر محکموں کے ضلعی اعلیٰ افسران شریک ہوئے۔اجلاس کے دوران وزیر خوراک کو ضلع مردان میں جاری اہم ترقیاتی منصوبوں پر تفصیلی بریفنگ دی گئی۔ بریفنگ میں طورو تا مردان روڈ کی کشادگی، پارکوں کی تعمیر و بحالی، شہر میں صفائی و ستھرائی کی مہمات، شاہراہ N-45 اور دیگر سڑکوں پر اسٹریٹ لائٹس کی تنصیب و مرمت، کھیل کے میدانوں کی اپگریڈیشن، شیخ ملتون ٹاؤن میں جمنازیم کی تعمیر اور سالڈ ویسٹ مینجمنٹ جیسے منصوبوں پر ہونے والی پیشرفت سے آگاہ کیا گیا۔اس موقع پر وزیر خوراک ظاہر شاہ طورو نے کہا کہ حکومت تمام ترقیاتی منصوبوں کی بروقت تکمیل میں سنجیدہ ہے اور ان میں حائل تمام رکاوٹیں ترجیحی بنیادوں پر حل کرانے کے لئے اقدامات بھی اٹھا رہی ہے۔ انہوں نے متعلقہ حکام کو واضح ہدایات جاری کیں کہ تمام منصوبے مقررہ مدت میں مکمل کیے جائیں، معیار پر کسی قسم کا سمجھوتہ نہ کیا جائے اور منصوبہ بندی، عملدرآمد اور نگرانی کے تمام مراحل میں شفافیت اور گڈ گورننس کے اصولوں پر سختی سے عمل کیا جائے۔وزیر خوراک نے خبردار کیا کہ وزیر اعلیٰ خیبرپختونخوا علی امین گنڈاپور کی قیادت میں کرپشن فری خیبرپختونخوا حکومت کا بنیادی مشن ہے، اور اگر کسی افسر یا اہلکار بدعنوانی میں ملوث پایا گیا تو اس کے خلاف سخت تادیبی کارروائی کی جائے گی۔