ہنگو تا سروزئی مین ہائی وے منصوبے کا افتتاح – معاونِ خصوصی کا ترقیاتی وعدوں کی تکمیل پر زور

وزیر اعلیٰ خیبرپختونخوا کے معاونِ خصوصی برائے مواصلات و تعمیرات محمد سہیل آفریدی نے جمعرات کے روز ہنگو تا سروزئی مین ہائی وے منصوبے کے تعمیراتی کام کا باقاعدہ افتتاح کیا۔ افتتاحی تقریب میں رکن قومی اسمبلی یوسف خان اور رکن صوبائی اسمبلی شاہ تراب خان بھی شریک ہوئے۔ تقریب سے خطاب کرتے ہوئے محمد سہیل آفریدی نے کہا کہ اس اہم منصوبے کی منظوری میں وزیر اعلیٰ خیبرپختونخوا کا کلیدی کردار ہے۔ یہ شاہراہ علاقے کی عوامی ضروریات کو مدنظر رکھتے ہوئے تعمیر کی جارہی ہے اور حکومت کی بھرپور کوشش ہے کہ اس کا کام جلد از جلد مکمل ہو۔ انہوں نے کہا کہ پورے صوبے میں مرکزی شاہراہوں کی تعمیر و مرمت کو ترجیحی بنیادوں پر ہدف بنایا گیا ہے اور یہ منصوبہ ان ہی ترجیحات کا حصہ ہے۔ سیاسی صورتحال پر بات کرتے ہوئے محمد سہیل آفریدی نے کہا کہ ہم بجٹ اور فنڈز کی سیاست کے بجائے ایک حقیقی عوامی انقلاب کے لیے میدان میں نکلے ہیں۔ عمران خان نے آئین، قانون کی بالادستی، عدلیہ کی آزادی اور امن کا جو وژن دیا ہے، ہم اسی نظریے کو آگے بڑھا رہے ہیں۔ انہوں نے کہا کہ جب تک عمران خان کا مؤقف بجٹ سے متعلق واضح طور پر سامنے نہیں آتا، 30 جون تک کوئی بجٹ پاس نہیں کیا جا سکتا۔ محمد سہیل آفریدی نے مزید کہا کہ ہمارے خلاف جھوٹے مقدمات قائم کئے گئے لیکن ان ہتھکنڈوں سے ہمیں پختونوں کے حقوق کی آواز بلند کرنے سے نہیں روکا جا سکتا۔ تقریب سے خطاب کرتے ہوئے ایم پی اے شاہ تراب خان نے کہا کہ ہنگو تا سروزئی سڑک کئی سالوں سے کھنڈرات کا منظر پیش کر رہی تھی، اور اب اس کی بحالی علاقے کے عوام کے لیے کسی بڑی خوشخبری سے کم نہیں۔ ایم این اے یوسف خان نے منصوبے کو ہنگو کے لیے ایک اہم ترقیاتی پیش رفت قرار دیتے ہوئے کہا کہ یہ سڑک عوام کے دیرینہ مطالبے کی تکمیل ہے اور مخالفین کے منفی پروپیگنڈے کا مؤثر جواب بھی۔