مردان اور ایبٹ آباد میں گوداموں پر چھاپے، ہزاروں پیکٹس ناقص جوس اور جعلی کاربونیٹڈ ڈرنکس برآمد، کاروبار سیل، مزید کارروائی شروع
وزیر خوراک ظاہر شاہ طورو کی خصوصی ہدایات پر خیبرپختونخوا فوڈ سیفٹی اینڈ حلال فوڈ اتھارٹی کی غیر معیاری و مضر صحت مشروبات کے خلاف صوبہ بھر میں بھرپور کارروائیاں جاری ہیں۔ گزشتہ روز فوڈ سیفٹی ٹیموں نے مردان اور ایبٹ آباد میں کارروائیاں کرتے ہوئے بڑی مقدار میں ناقص اور صحت دشمن مشروبات ضبط کر لیے۔تفصیلات جاری کرتے ہوئے ترجمان فوڈ اتھارٹی کا کہنا تھاکہ مردان میں فوڈ سیفٹی ٹیم نے کاٹلنگ بازار میں واقع ایک گودام پر چھاپہ مارا جہاں سے 6000 سے زائد پیکٹس ناقص و مضر صحت جوس برآمد کیے گئے۔ یہ جوس مضر صحت رنگوں، مصنوعی فلیورز اور شکرین جیسے مضر اجزاء کو ملا کر ناقص طریقے سے تیار کیے جا رہے تھے۔ ضبط شدہ تمام اشیاء کو سرکاری تحویل میں لے کر مالکان کو نوٹس جاری کر دیا گیا ہے جبکہ مزید قانونی کارروائی کا آغاز کر دیا گیا ہے۔اسی طرح ایبٹ آباد کے علاقے میرپور میں بھی فوڈ سیفٹی ٹیم نے ڈسٹری بیوٹر کے گودام پر کارروائی کرتے ہوئے 1500 لیٹر سے زائد جعلی کاربونیٹڈ ڈرنکس برآمد کیں۔ مذکورہ مشروبات کو ضبط کر کے کاروبار سیل کر دیا گیا ہے جبکہ مالکان کے خلاف قانونی کارروائی جاری ہے۔ ڈائریکٹر جنرل خیبرپختونخوا فوڈ سیفٹی اتھارٹی واصف سعید نے کامیاب کارروائیوں پر متعلقہ ٹیموں کو شاباش دی اور اس عزم کا اظہار کیا کہ صوبے بھر میں انسانی صحت سے کھیلنے والوں کے خلاف زیرو ٹالرنس پالیسی کے تحت سخت اقدامات جاری رہیں گے۔