مشیر صحت احتشام علی کا عالمی یوم صحت کے موقع پر خیبرپختونخوا اسمبلی میں اظہار خیال

عالمی یوم صحت کے موقع پر مشیر صحت خیبرپختونخوا احتشام علی نے صوبائی اسمبلی کے فلور پر صحت کے شعبے میں کی جانے والی اصلاحات اور اقدامات پر تفصیل سے روشنی ڈالی۔ اُنہوں نے کہا کہ نگران دور میں سامنے آنے والی کرپشن کے حوالے سے وزیر اعلیٰ کی سربراہی میں قائم تحقیقاتی کمیٹی کی رپورٹ آخری مراحل میں ہے، جس کے بعد شفاف احتساب کو یقینی بنایا جائے گا۔مشیر صحت نے بتایا کہ حکومت نے صحت کارڈ کے لیے ریزرو فنڈ جاری کر دیا ہے، جس کے تحت ایسے مہنگے آپریشنز کو بھی مفت کیا جا رہا ہے جو صحت کارڈ میں شامل نہیں تھے۔ اس مد میں ابتدائی طور پر 68 کیسز کی منظوری دی جا چکی ہے، جن میں گردے، جگر، اور بون میرو ٹرانسپلانٹ سمیت دیگر پیچیدہ اور مہنگے پروسیجرز شامل ہیں۔مزید برآں، مشیر صحت نے کہا کہ رواں سال محکمہ صحت کی سالانہ ترقیاتی پروگرام (ADP) کی تیاری کے لیے پہلی بار سٹیک ہولڈرز پر مشتمل ایک کانفرنس بلائی گئی، تاکہ ترقیاتی منصوبے زمینی حقائق اور عوامی ضروریات کے مطابق ترتیب دئیے جائیں۔