۔ڈائریکٹر جنرل لائیوسٹاک کی زیر صدارت اجلاس میں ضلعی افسران کی ماہانہ کارکردگی اور لائیوسٹاک کے منصوبوں پر بحث

ڈائریکٹر جنرل محکمہ لائیوسٹاک توسیع خیبر پختونخوا ڈاکٹر عالمزیب مہمند کی زیر صدارت لائیوسٹاک کے ضلعی افسران کا ماہانہ کارکردگی،منصوبوں کی تکمیل اور دیگر امور کے حوالے سے ایک جائزہ اجلاس پشاور میں منعقد ہوا۔ اجلاس میں لائیوسٹاک کے ضلعی افسران نے اضلاع کے اندر اپنی کارکردگی کے بارے میں ڈائریکٹر جنرل محکمہ لائیوسٹاک کو تفصیلی بریفنگ دیتے ہوئے لائیوسٹاک کی سرگرمیوں اورمویشی پال کسانوں کی بہتری کے لئے اٹھائے گئے اقدامات سے آگاہ کیا۔ اجلاس میں موجودہ نگران صوبائی حکومت کے خوشحال خیبر پختونخوا پروگرام پر بھی تفصیلی بریفنگ دی گئی۔ اس موقع پر ڈی جی لائیوسٹاک نے تمام ضلعی افسران کو ہدایت کی کہ صوبے میں دودھ کی پیداوار کے مکمل ریکارڈ پر توجہ دیں کہ صوبے کے کونسے سے ضلع سے دودھ کی کتنی مقدار برآمد اور درآمد ہوتی ہے جبکہ صوبے میں سے باہر جانے اور داخل ہونے والے جانوروں سمیت ڈیری فارمز کا ریکارڈ بھی ہر وقت درست کریں۔ انہوں نے تمام ضلعی افسران کو تاکید کی کہ زمینداروں کے ساتھ مکمل رابطہ اور تعاون رکھیں اور فیلڈ ورک کے دوران زمینداروں میں آگاہی مہم کا باقاعدگی سے اہتمام کریں اور زمینداروں میں کوآرڈینیٹرز منتخب کریں اور انکی باقاعدہ میپنگ کریں اس کے علاوہ لائیوسٹاک کے قائم کردہ پولٹری اورڈیری فارمز میں زمینداروں کو بھر پور خدمات مہیا کرنے کے ساتھ ساتھ ان میں آگاہی پیدا کریں اور انکا ریکارڈ اپنے پاس محفوظ رکھیں۔ڈائریکٹر جنرل نے تمام افسران کوہدایت کی کہ جانوروں کو لمپی سکن بیماری سے بچانے اور محفوظ رکھنے کے لیے ان کی بروقت ویکسینیشن کریں اسی طرح تمام افسران اپنے اپنے ضلع میں فیلڈ کے دنوں کا جلد سے جلد انعقادکرکے ڈی وارمنگ اور ویکسینیشن آگاہی مہم چلانے کیلیے بینرز اور دیگر اقدامات کو یقینی بنائیں۔