وزیر اعلیٰ خیبر پختونخوا کے مشیر: پشاور کی تاریخی اہمیت کو بحال کرنے کیلئے ترقیاتی اقدامات اٹھائے جائیں۔

وزیر اعلیٰ خیبر پختونخوا کے مشیر برائے اطلاعات وتعلقات عامہ بیرسٹر محمد علی سیف نے کہا ہے کہ پشاور تجارتی سرگرمیوں کا ایک قدیم تاریخی شہر ہے اور ماضی میں وسطی ایشیائی ممالک کی تجارت کا حب رہ چکا ہے۔صوبائی حکومت پشاور شہر کی صفائی و دیگر مسائل کی حل کیلئے ترجیحاتی بنیادوں پر اقدامات اٹھارہی ہے۔ان خیالات کا اظہار انہوں نے برین انسٹیٹیوٹ پشاور میں منعقدہ“ہمارا پشاور“کے نام سے منعقدہ ایک تقریب سے بطور مہمان خصوصی خطاب کرتے ہوئے کیا۔اس موقع پر پاکستان تحریک انصاف کے ایم این اے ارباب شیر علی خان سمیت ناصر علی سید،سابق پولیو کوآرڈینیٹر جانباز آفریدی،ڈائریکٹر برینز انسٹیٹیوٹ ظفر اللہ خان اور دیگر مکاتب فکر کے دانشوروں،ادیب پروفیسر ان نے شرکت کی۔تقریب میں رکن قومی اسمبلی ارباب شیر علی خان اور دیگر مکاتب فکر افراد نے پشاور شہر کے قدیم روایت،ورثہ اور تاریخی پس منظر پر اپنے خیالات کا اظہار کیا۔مشیر اطلاعات نے اس موقع اپنے خیالات کا اظہار کرتے ہوئے کہا کہ پشاور ایک قدیم تاریخی شہر ہے جہاں وسطی ایشیائی ممالک سے تجارتی سرگرمیاں جاری رہتی تھیں۔انہوں نے کہا کہ پشاور شہر کے تاریخی ورثہ کو برقرار رکھنے کیلئے صوبائی حکومت ترجیحاتی بنیادوں پر کام کر رہی ہے۔بیرسٹر سیف نے کہا کہ تیزی سے پھیلتی ہوئی آبادی اور کمرشل تعمیرات نے ملک کیساتھ ساتھ پشاور شہر کی رونق کو متاثر اور مسائل میں اضافہ کیا ہے اور اس مسئلہ کی روک تھام کیلء سنجیدگی سے اقدامات اٹھانے کی ضرورت ہے۔انہوں نے مزید کہا کہ پشاور شہر کا مستقبل نوجوانوں کے پاس ہے اور مستقبل کی ضروریات کو پورا کرنے کیلئے عملی سوچ اپنانی ہوگی۔انہوں نے کہا کہ پشاور شہر کی خوبصورتی، ترقی و تعمیر اور ثقافتی ورثہ کی بحالی کیلئے متعلقہ تکنیکی پیشہ ور افراد کی تجاویز و سفارشات صوبائی حکومت کو ارسال کی جائیں اور اس معاملہ پر ایک خصوصی اجلاس بلانے کیلئے غور کیا جائیگا۔