ضلع میں بے پناہ ٹیلنٹ موجود ہے ضرورت اسے نکھارنے کی ہے اس لئے ان پر بھر پور توجہ دی جائے۔وزیر محنت

خیبر پختونخوا کے وزیر محنت فضل شکور خان سے بدھ کے روز ڈسٹرکٹ ایجوکیشن چارسدہ کے ایک وفد نے ان کے دفتر سول سیکرٹریٹ پشاور میں ملاقات کی۔ اس موقع پر ڈسٹرکٹ چارسدہ سے تعلق رکھنے والے ممبران صوبائی اسمبلی عارف احمد زئی اور افتخار اللہ جان بھی موجود تھے۔ ملاقات کے دوران وزیر محنت فضل شکور خان نے ڈسٹرکٹ ایجوکیشن آفیسر میل ڈاکٹر عبد المالک اور ڈسٹرکٹ ایجوکیشن آفیسر فی میل ثریا خٹک کو چارسدہ کے طلبہ کو دور جدید کے تقاضوں کے ہم آہنگ تعلیمی زیور سے آراستہ کرنے کیلئے خصوصی ہدایات دیں۔انہوں نے کہا کہ اس ضلع میں بے پناہ ٹیلنٹ موجود ہے ضرورت اسے نکھارنے کی ہے اس لئے ان پر بھر پور توجہ دی جائے تاکہ یہاں کے طلبہ دوسرے اضلاع کے عوام سے کسی طور پیچھے نہ رہیں۔انہوں نے کہا کہ صوبے کے عوام کو بہتر سے بہتر تعلیم دینا صوبائی حکومت کی اولین ترجیحات میں شامل ہے۔ملاقات میں صوبائی ممبران اسمبلی اور ڈسٹرکٹ ایجوکیشن افسران نے وزیر محنت کی کوشوں اور تعاون کا شکریہ ادا کرتے ہوئے ان کے گراں قدر اقدامات کو سراہا۔