فنی تعلیم کے فروغ کیلئے ٹیوٹا کی کارکردگی کا جائزہ، معاون خصوصی تورڈھیر کی زیر صدارت اہم اجلاس

وزیر اعلیٰ خیبر پختونخوا کے معاون خصوصی برائے صنعت وحرفت اور فنی تعلیم عبدالکریم تورڈھیر نے بدھ کے روز پشاور میں ٹیکنیکل ایجوکیشن اینڈ ووکیشنل ٹریننگ اتھارٹی(ٹیوٹا) کی کارکردگی کو بہتر بنانے کیلئے محکمہ کو دئے گئے اہداف کے جائزہ اجلاس کی صدارت کی۔اجلاس میں ایڈیشنل سیکریٹری صنعت شمع نعمت،چیف پلاننگ آفیسر باسط خلیل اور ٹیوٹا کے ڈائریکٹرز منیر گل،خالد عثمان،حیدر علی اور سید سجاد علی شاہ کے علاؤہ دیگر افسران نے شرکت کی۔اجلاس میں معاون خصوصی کو اتھارٹی کیڈیجٹلائزیشن،پائیداری،ہیومن ریسورس،مالیاتی امور،پروکیورمنٹ، تعلیم وتربیت،بزنس پروڈکشن و دیگر امور کے حوالے سے دئیے گئے اہداف پر عملدرآمد کے حوالے سے آگاہ کیا گیا۔معاون خصوصی کو مختلف اے ڈی پی سکیموں کے بارے میں بھی تفصیلات فراہم کی گئیں اور زیر تکمیل و مکمل شدہ سکیموں کے بارے میں انھیں آگاہ کرتے ہوئے بتایا گیا کہ طلبہ کی سہولت کیلئے 20 ایام کے اندر ٹیوٹا میں سٹوڈنٹس کمپلینٹ سیل کا قیام عمل میں لایا جائے گا۔اجلاس میں معاون خصوصی نے ہدایت کی کہ اتھارٹی اور محکمہ کے تمام حکام اپنی ذمہ داریوں کو مقررہ وقت میں ادا کرکے دئے گئے ٹائم لائنز کے اندر درکار امور کو مکمل کریں۔انھوں نے کہا کہ فنی تعلیم و ہنر کے نصاب میں صوبے کی خصوصی ضروریات اور طلب کو مد نظر رکھتے ہوئے نئے ٹریڈز شامل کرنے پر کام کیا جائے۔معاون خصوصی نے اتھارٹی کو مالی طور پر مستحکم کرنے کیلئے self sustainability کے ماڈل پر ڈالنے کیلئے بھی دی گئی اہداف کو جلد از جلد مکمل کرنے کی ہدایت کی اور کہا کہ ادارے کے وسائل کو بروئے کار لاکر بزنس ماڈلز پر بھی کام تیز کیا جائے۔انھوں نے کہا کہ ٹیوٹا کی ساکھ کو بحال کرنے کی ضرورت ہے جس کیلئے محکمہ کے افسران اپنی ذمہ داریاں احسن انداز میں سر انجام دیں۔معاون خصوصی نے اجلاس میں مختلف سکلز اور سروسز کی فراہمی کیلئے موبائل ورکشاپ کے ماڈل کی تجویز کو سراہا۔انھوں نے فنی تعلیمی اداروں کے وسائل کو استعمال میں لاکر انھیں پروڈکشن ہاؤسز کے طور پر استعمال میں لانے کے حوالے سے بھی اب تک کی پیش رفت سے متعلق معلومات حاصل کیں۔اس موقع پرمعاون خصوصی کونمک منڈی جیمز سٹون پروسسینگ اینڈ ٹریڈنگ سنٹر کے قیام کے حوالے سے بھی اب تک کی پراگریس پر پریزنٹیشن دی گئی۔