سپیکر خیبر پختونخوا اسمبلی کی زیر صدارت مجوزہ بجٹ 2025 پر مشاورتی اجلاس

خیبر پختونخوا اسمبلی سیکریٹریٹ میں آج مجوزہ بجٹ 2025 کے حوالے سے ایک اہم مشاورتی اجلاس منعقد ہوا، جس کی صدارت سپیکر خیبر پختونخوا اسمبلی بابر سلیم سواتی نے کی۔ اجلاس میں وزیراعلیٰ خیبر پختونخوا کے معاونِ خصوصی برائے خزانہ مزمل اسلم، سکریٹری خزانہ، اراکینِ صوبائی اسمبلی اور دیگر اعلیٰ حکام نے شرکت کی۔اجلاس کا بنیادی مقصد تمام متعلقہ اسٹیک ہولڈرز کی قیمتی آراء اور تجاویز کو بجٹ سازی کے عمل میں شامل کرنا تھا تاکہ آئندہ مالی سال کا بجٹ عوام دوست، شفاف اور ترقیاتی ترجیحات پر مبنی ہو۔سپیکر بابر سلیم سواتی نے اس موقع پر زور دیا کہ بجٹ میں مالی نظم و ضبط، عوامی فلاح و بہبود اور واضح ترقیاتی اہداف کی عکاسی ہونی چاہیے۔ انہوں نے بجٹ سازی کے عمل میں اراکین اسمبلی کی شمولیت کو سراہتے ہوئے کہا کہ اس نوعیت کی مشاورت جمہوری اقدار کو فروغ دیتی ہے۔معاونِ خصوصی برائے خزانہ مزمل اسلم نے بجٹ کی تیاری میں شفافیت اور مشاورت کی اہمیت پر زور دیتے ہوئے اس عزم کا اظہار کیا کہ خیبر پختونخوا حکومت ایک حقیقت پسند، عوامی ضروریات سے ہم آہنگ اور قابلِ عمل بجٹ پیش کرنے کے لیے پرعزم ہے۔