مشیر وزیراعلیٰ مصدق عباسی نے اجلاس کی صدارت کی
حکومت خیبرپختونخوا کے سالانہ آگاہی پلان امر بالمعروف پر عملدرآمد کے حوالے سے جائزہ اجلاس مشیر وزیراعلیٰ برائے اینٹی کرپشن مصدّق عباسی کی صدارت میں منعقد ہوا۔ اجلاس میں سالانہ امربالمعروف آگاہی پلان کے خدوخال، ہزارہ، بنوں، کوہاٹ اور ڈی آئی خان ڈویژن کے اضلاع میں سالانہ آگاہی پلان امر بالمعروف پر ضلعی سطح پر عملدرآمد کا تفصیلی جائزہ لیا گیا اور پلان کے تحت ضلعی انتظامیہ کو دی گئی ذمہ داریوں پر عمل درآمد سے متعلق بھی غور کیا گیا۔ اجلاس میں اضلاع کی سطح پر سٹیرنگ کمیٹیز، اصلاحِ کردار گروپ، اصلاحِ معاشرہ گروپ اور اصلاحِ احوال کمیٹی کی تشکیلِ نو پر تفصیلی گفتگو ہوئی۔ مشیر وزیراعلیٰ مصدّق عباسی نے سالانہ آگاہی پلان امر بالمعروف پر بہتر عملدرآمد کے حوالے سے ہدایات دیں۔ اس موقع پر گفتگو کرتے ہوئے مشیر وزیراعلی مصدق عباسی کا کہنا تھا کہ کمیٹیاں معاشرے میں اخلاقیات کی بہتری پر خصوصی توجہ دیں۔ سالانہ آگاہی پلان امربالمعروف اپنی طرز کا ملک کا پہلا آگاہی پلان ہے، جس کی صوبائی کابینہ نے باضابطہ طور پر منظوری دی ہے۔ پلان پر سال بھر عملدرآمد ہوگا۔