خیبر پختونخوا کے وزیر برائے محنت، فضل شکور خان نے کہا ہے کہ موجودہ صوبائی حکومت

خیبر پختونخوا کے وزیر برائے محنت، فضل شکور خان نے کہا ہے کہ موجودہ صوبائی حکومت محنت کش مزدوروں کو تمام تر سہولیات کی فراہمی اور اُن کی فلاح و بہبود کے لیے ٹھوس اقدامات کر رہی ہے۔ محنت کش طبقے کو اُن کا جائز حق دیا جائے گا اور کسی کی حق تلفی یا استحصال برداشت نہیں کیا جائے گا صوبائی وزیر نے ان خیالات کا اظہار اپنے دفتر میں ورکرز ویلفیئر بورڈ خیبر پختونخوا کے حوالے سے منعقدہ اجلاس کی صدارت کرتے ہوئے کیا۔اجلاس میں ورکرز ویلفیئر بورڈ کے ڈائریکٹر ایڈمن سیف اللہ ظفر ڈپٹی ڈائریکٹر ایڈمن شعیب اور دیگر متعلقہ افسران نے شرکت کی۔ اس موقع پر مزدور کالونیوں میں کوارٹرز کی شفاف اور میرٹ پر الاٹمنٹ، غیر قانونی قابضین کا خاتمہ اور تجاوزات جیسے کئی اہم امور زیرِ غور لائے گئے۔صوبائی وزیر نے کہا کہ مزدور طبقہ معیشت کی ترقی اور استحکام میں بنیادی کردار ادا کرتا ہے۔ ہم محنت کشوں کو نظر انداز نہیں کرسکتے مزدوروں کی سہولیات اور حقوق کا تحفظ خیبر پختونخوا حکومت کی اولین ترجیحات میں شامل ہے۔ انہوں نے اس عزم کا اعادہ کیاکہ لیبر کالونیوں میں غیر قانونی طور پر مقیم افراد کے خلاف قانونی کارروائی عمل میں لائی جائے گی اور خالی کرائے گئے کوارٹرز کو میرٹ اور شفاف طریقے سے مستحق مزدوروں کو الاٹ کیا جائے گا۔صوبائی وزیر کا مزید کہنا تھا کہ محکمے کی ریونیو میں اضافے اور بہتر کارکردگی کے لیے مختلف اقدامات کیے جا رہے ہیں۔ حال ہی میں لیبر کالونیوں میں واقع دکانوں کی مارکیٹ ریٹ کے مطابق نیلامی کی گئی ہے، جس کی وجہ سے محکمے کی ریونیو میں نمایاں اضافہ ہوا ہے۔ انہوں نے کہا کہ محکمے میں متعارف کرائی گئی اصلاحات کا سلسلہ جاری ہے اور اس کے مثبت اور دور رس نتائج بہت جلد سامنے آئیں گے۔وزیر محنت نے افسران کو ہدایت کی کہ مزدوروں کی فلاح و بہبود اور محکمے کی کارکردگی میں مزید بہتری کے لئے اقدامات کیے جائیں