معاون خصوصی برائے ہاؤسنگ ڈاکٹر امجد علی کا حویلیاں ٹاؤن شپ ایبٹ آباد کا دورہ، تمام منصوبوں کو بروقت مکمل کرنے کی ہدایت

وزیر اعلیٰ خیبر پختو نخوا کے معاون خصوصی برائے ہاؤسنگ ڈاکٹر امجد علی نے جمعرات کے روز حویلیاں ٹاؤن شپ ایبٹ آباد کا دورہ کیا۔ اس موقع پر رکن صوبائی اسمبلی افتخار خان جدون،ڈائریکٹر جنرل ہاؤسنگ عمران وزیر اور محکمہ ہاؤسنگ کے دیگر افسران بھی موجود تھے۔ معاون خصوصی ڈاکٹر امجد علی نے حویلیاں ٹاؤن شپ منصوبے کا تفصیلی جائزہ لیتے ہوئے کہا کہ حویلیاں ٹاؤن شپ محکمہ ہاؤسنگ کی سکیموں میں سب سے پرانا منصوبہ ہے جس کا آغاز 1985 میں کیا گیا اور پچھلے 10 سالوں سے یہ منصوبہ خیبر پختونخوا ہاؤسنگ اتھارٹی کی تحویل میں ہے اور اب اس پر ترقیاتی کام تیزی سے جاری ہے اور یہ ہاؤسنگ منصوبہ 218 کنال رقبے پر محیط ہے۔معاون خصوصی ڈاکٹر امجد علی نے ہدایت کی کہ منصوبے کے 218 کنال رقبے میں سے 10 کنال رقبے کو والی بال، باسکٹ بال، فٹ بال، کرکٹ کے کھیلوں کی سرگرمیوں، جا گنگ ٹریک، خواتین کے لئے علیحدہ پارک کے قیام، حفظان صحت اور ایک ڈسپنسری کے قیام کے لئے مختص کیا جائے۔ اسی طرح بچوں کی تعلیم و تربیت کے لیے سکول و مساجد کی جگہ بھی مختص ہیں اور تدفین کے لئے قبرستان کا انتظام بھی منصوبے کا حصہ ہے اس موقع پر ڈائریکٹر جنرل ہاؤسنگ عمران وزیر نے بریفنگ دیتے ہوئے کہا کہ یہ منصوبہ 220 مختلف سائز کے پلاٹوں پر مشتمل ہے اور اسے بھی کے پی ایچ اے کی زیر نگرانی دوسرے ہاؤسنگ منصوبوں کی طرز پر مکمل کیا جائے گا اور اس میں بھر پور ترقیاتی کام جاری ہے۔ معاون خصوصی ڈاکٹر امجد علی نے بریفنگ میں گہری دلچسپی کا اظہار کرتے ہوئے کہا کہ تمام تر تعمیراتی کام پوری دلجمعی سے مکمل کیا جائے اور اس پر فضا مقام کو رونق بخشی جائے۔