ڈی جی ہیلتھ خیبرپختونخوا کا کے ایم یو موبائل اور صوبائی پبلک ہیلتھ لیبارٹریز کا دورہ

ڈائریکٹر جنرل ہیلتھ سروسز خیبرپختونخوا ڈاکٹر شاہد یونس نے خیبر میڈیکل یونیورسٹی (کے ایم یو)پشاور کی موبائل اور پبلک ہیلتھ لیبارٹری کا دورہ کیا۔واضح رہے کہ کے ایم یو موبائل لیب سیلاب سے متاثرہ پیر بابا، ضلع بونیر میں 62 روز تک متعدی امراض کی تشخیص اور نگرانی کے لیے تعینات رہی۔ دورے کے دوران ڈاکٹر یاسر یوسفزئی، ڈائریکٹر صوبائی پبلک ہیلتھ ریفرنس لیبارٹری نے ڈی جی ہیلتھ کو موبائل لیبارٹری کی کارکردگی کے بارے میں تفصیلی بریفنگ دی۔انہوں نے بتایا کہ اس دوران لیبارٹری نے 10 ہزار سے زائد تشخیصی ٹیسٹ کیے جن سے وائرل اور بیکٹیریل بیماریوں کی بروقت نشاندہی اور سیلاب کے بعد وبائی امراض پر قابو پانے میں مدد ملی۔ موبائل لیبارٹری نے ضلع بونیر کی ضلعی محکمہ صحت انتظامیہ اور متعلقہ اداروں کے ساتھ قریبی اشتراک سے خدمات انجام دیں۔ ڈاکٹر شاہد یونس نے کے ایم یو اور پی پی ایچ آر ایل کی ٹیموں کی کاوشوں کو سراہتے ہوئے کہا کہ ان اداروں نے صوبے میں عوامی صحت کے نظام کو مستحکم بنانے میں مؤثر کردار ادا کیا ہے۔ انہوں نے موبائل لیبارٹری ٹیکنالوجی کے جدید استعمال کو سراہا جس سے صوبے کے دور دراز علاقوں میں تشخیصی سہولیات کی فراہمی اور امراض کی نگرانی کے نظام کو بہتر بنانے میں مدد ملی۔ مزید برآں، ڈی جی ہیلتھ نے کے ایم یو میں واقع صوبائی پبلک ہیلتھ ریفرنس لیبارٹری کا بھی دورہ کیا جہاں انہیں وفاقی انٹیگریٹڈ ڈیزیز سرویلنس اینڈ ریسپانس سسٹم (IDSRS) کے تحت فراہم کی گئی جدید تشخیصی مشینری اور نیٹ ورک سپورٹ حوالے کی گئی۔ اس موقع پر ڈاکٹر علی الرحمن، پراجیکٹ ڈائریکٹر IDSRSنے جدید لیبارٹری آلات باقاعدہ طور پر ڈائریکٹرپی پی ایچ آر ایل خیبرپختونخوا کو حوالے کیے۔ یہ اقدام صوبائی لیبارٹری کی تشخیصی صلاحیت کو مزید بہتر بنانے اور متعدی امراض کی بروقت نشاندہی و رپورٹنگ کے نظام کو مستحکم کرنے کے لیے اٹھایا گیا ہے۔ دورے کے دوران ڈاکٹر شاہد یونس نے لیبارٹری کے مختلف شعبہ جات کا معائنہ کیا اور تشخیصی عمل و ٹیسٹنگ استعداد کے بارے میں آگاہی حاصل کی۔ انہوں نے کے ایم یو اور پی پی ایچ آر ایل کی کاوشوں کو سراہتے ہوئے کہا کہ عوامی صحت کے مضبوط نظام کے لیے سرکاری و نجی تشخیصی اداروں کے مابین مربوط رابطہ کاری وقت کی اہم ضرورت ہے۔