محکمہ ایکسائز و ٹیکسیشن اور نارکوٹکس کنٹرول خیبرپختونخوا کی منشیات کے خلاف بڑی کارروائی

صوبائی حکومت کی منشیات کے خلاف زیرو ٹالرنس پالیسی کے تحت محکمہ ایکسائز، ٹیکسیشن و نارکوٹکس کنٹرول خیبرپختونخوا نے پشاور کے قریب موٹروے سروس روڈ پر بڑی کارروائی کرتے ہوئے منشیات کی سمگلنگ کی کوشش ناکام بنا دی اور ایک موٹر کار سے 24 کلوگرام چرس برآمد کر لی جبکہ ملزم کے خلاف مقدمہ درج کر کے مزید قانونی کارروائی شروع کر دی گئی ہے۔محکمہ کے مطابق یہ کارروائی سپیشل سکواڈ ایکسائز انٹیلیجنس نے خفیہ اطلاع پر سعود خان گنڈاپور پراونشل انچارج ایکسائز انٹیلیجنس اور ماجد خان ایکسائز اینڈ ٹیکسیشن آفیسر، کاؤنٹر نارکوٹکس آپریشنزکی زیر نگرانی عمل میں لائی گئی جبکہ اسپیشل اسکواڈ کی قیادت وحید اکبر خان (انسپکٹر، ای آئی بی نے کی۔موصولہ تفصیلات کے مطابق مشتبہ موٹر کار نمبر ACJ-206 کی دوران تلاشی گاڑی سے 24,000 گرام (24 کلوگرام) چرس برآمد ہوئی اور بروقت کارروائی سے منشیات کی ترسیل کی بڑی کوشش ناکام بنا دی گئی۔محکمہ کے مطابق مزید تفتیش اور قانونی کارروائی کے لیے تھانہ ایکسائز پشاور ریجن میں مقدمہ درج کر لیا گیا ہے۔محکمہ ایکسائز، ٹیکسیشن و نارکوٹکس کنٹرول خیبرپختونخوا نے واضح کیا ہے کہ صوبے بھر میں منشیات کے خلاف کارروائیاں زیرو ٹالرنس پالیسی کے تحت بلاامتیاز جاری رہیں گی۔