ضلع مردان میں پروفیشنل ٹیکس چالان اور پراپرٹی ٹیکس کی مکمل ڈیجیٹلائزیشن پہلی دفعہ متعارف

خیبر پختونخوا کے وزیر ایکسائز و ٹیکسیشن اور نارکوٹکس کنٹرول سید فخر جہان کے گڈ گورننس اور خدمات کی بہتر انداز میں فراہمی کے حوالے سے جاری ہدایات کی روشنی میں محکمہ ایکسائز و ٹیکسیشن اور نارکوٹکس کنٹرول نے ایک اہم سنگ میل عبور کرکے ضلع مردان میں پہلی مرتبہ پروفیشنل ٹیکس کے چالان مکمل طور پر ڈیجیٹل نظام کے تحت تیار کرکے ٹیکس دہندگان کو جاری کردئیے گئے ہیں۔سیکرٹری ایکسائز و ٹیکسیشن اور نارکوٹکس کنٹرول خیبرپختونخوا خالد الیاس کی سرپرستی میں محکمہ کے اس اقدام کے تحت ضلع مردان میں پروفیشنل ٹیکس کی وصولی کے نظام کو جدید خطوط پر استوار کرتےہوئےڈیجیٹلائزیشن کا باقاعدہ آغاز کر دیا ہے۔ڈیجیٹل چالان کے اجراء سے ٹیکس دہندگان کو سہولت فراہم ہوگی جبکہ ٹیکس وصولی کے عمل میں شفافیت، رفتار اور موثریت بھی یقینی بنائی جاسکے گی۔ یہ اقدام صوبائی حکومت کی گڈ گورننس اور ریونیو نظام کو جدید بنانے کی پالیسی کا حصہ ہے۔ڈیجیٹل چالان کے ذریعے ریکارڈ کی درستگی، ڈیٹا مینجمنٹ اور ٹیکس وصولی کے عمل کو مزید منظم اور قابل اعتماد بنایا جائے گا۔ایکسائز اینڈ ٹیکسیشن آفیسر مردان خالد خان کے مطابق اس جدید نظام کے نفاذ سے ٹیکس دہندگان کو غیر ضروری دفتری مراحل سے نجات ملے گی اور ریونیو اکٹھا کرنے کا عمل بھی زیادہ شفاف اور موثر انداز میں انجام دیا جاسکے گا۔ ان کے مطابق ضلع مردان کے تین تحصیلوں مردان، تخت بھائی اور کاٹلنگ میں پراپرٹی یونٹس کی GIS سروے اور جائیداد ٹیکس ریکارڈ کو MIS سسٹم پر منتقل کرنے کا عمل آخری مراحل میں ہے اور عید کے بعد ٹیکس گزاروں کو نئے سسٹم میں ٹیکس چالان جاری کئے جائیں گے۔۔انھوں نے کہا کہ عوام کی سہولت کیلئے آن لائن ادائیگی کا نظام بھی متعارف کیا جارہا ہے۔مزید یہ کہ ضلع مردان میں پہلی بار ہوٹلز اور گیسٹ ہاؤس کو ہوٹل بیڈ ٹیکس کے چالان جاری کئے گئے جس کی مد میں ابھی تک 938450/- روپے کی ٹیکس داخل خزانہ کی گئی ہے۔