نگران وزیراعلی خیبر پختونخوا کا غلام اسحاق خان انسٹیٹیوٹ صوابی کا دورہ
نگران وزیر اعلیٰ خیبر پختونخوا محمد اعظم خان نے اعلیٰ تعلیم کے معیار کو بہتر بنانے اور اسے جدید دور کے تقاضوں سے ہم آہنگ کرنے کی ضرورت پر زور دیتے ہوئے کہا ہے کہ اعلیٰ تعلیم کا شعبہ انتہائی اہمیت کا حامل ہے، تاہم انہوں نے واضح کیا کہ اعلیٰ تعلیم کے فروغ کا ہر گز یہ مطلب نہیں کہ صرف یونیورسٹیوں کی تعداد میں اضافہ کیا جائے بلکہ اعلیٰ تعلیمی اداروں میں جدید تحقیق کو فروغ دینے اور نصاب کو جدید دور کے تقاضوں اور مارکیٹس کی ضروریا ت سے ہم آہنگ کرنے کی ضرورت ہے تاکہ فارغ التحصیل ہونے والے طلبہ کو روزگار حاصل کرنے میں مشکلات کا سامنا نہ کرنا پڑے ۔
ان خیالات کا اظہار انہوں کے جمعرات کے روز غلام اسحاق خان انسٹیٹیوٹ آف انجنیئرنگ اینڈ ٹیکنالوجی صوابی میں نئے داخلہ لینے والے طلبہ کے لیے منعقدہ ایک تقریب سے بحیثیت مہمان خصوصی خطاب کرتے ہوئے کیا۔ وزیر اعلیٰ محمد اعظم خان نے غلام اسحاق خان انسٹیٹیوٹ میں داخلہ لینے والے طلبہ کو مبارکباد پیش کرتے ہوئے کہا کہ یہ خوش آئند اور قابل اطمینان بات ہے کہ ہر سال اس ادارے میں طالبات کی تعداد میں اضافہ ہو رہا ہے، خواتین ہماری کل آبادی کا 50 فیصد سے بھی زیادہ حصہ ہیں اور انہیں تمام شعبوں میں آگے آکر اپنا لوہا منوانا چاہیے۔ انہوں نے کہا کہ غلام اسحاق خان انسٹیٹیوٹ ملک کا اثاثہ اور قابل فخر ادارہ ہے، یہ صرف ایک تعلیمی درسگاہ نہیں بلکہ تخلیقی اور تحقیقی سرگرمیوں کا مرکز ہے، جی آئی کے انسٹیٹیوٹ انجینئرنگ ٹیکنالوجی، کمپیوٹر سائینسز، ڈیٹا سائینسز، منیجمنٹ سائینسز اور دیگر جدید علوم میں مہارت کے لئے دنیا بھر میں مشہور ہے جو پوری قوم کے لیے باعث فخر ہے، اس ادارے کے قیام کے لئے سابق صدر غلام اسحاق خان مرحوم اور ڈاکٹر عبدالقدیر خان مرحوم سمیت دیگر لوگوں کا کردار ناقابل فراموش ہے۔ وزیراعلیٰ کا کہنا تھا کہ بین الاقوامی معیار کے اس مادر علمی میں داخلہ لینا یقیناً نئے طلبہ کے لئے فخر کا مقام ہے،اس ادارے میں تعلیم و تربیت کے لئے جس قدر سازگار ماحول میسر ہے وہ بہت کم اداروں میں دستیاب ہے۔ انہوں نے طلبہ کو مخاطب کرتے ہوئے کہا کہ طلبہ جان لیں کہ تعلیم صرف درسی کتابوں اور لیکچرز تک محدود عمل نہیں بلکہ تعلیم ایک مکمل شخصیت سازی اور کردار سازی کا عمل ہے۔ تعلیم حاصل کرنے کا اصل مقصد ایک اچھا انسان اور ذمہ دار شہری بننا ہے اورمجھے یقین ہے کہ ادارے کے طلبہ اپنی عملی زندگی میں اعلیٰ اخلاقی اقدار کے اصول پر عمل پیرا رہیں گے۔ انہوں نے طلبہ پر زور دیا کہ وہ نصابی سرگرمیوں کے ساتھ ساتھ غیر نصابی سرگرمیوں میں بھی بڑھ چڑھ کر حصہ لیں اور بین الاقوامی سطح پر ملک کا نام روشن کریں۔ انہوں نے طلبہ سے کہا کہ آپ میں سے ہر ایک طالب علم میں بے پناہ صلاحیتیں موجود ہیں اور ان صلاحیتوں کو معاشرے، ملک اور انسانیت کی فلاح کے لیے بھر پور استعمال میں لائیں،آپ اس ملک کا مستقبل ہیں اور آپ ہی نے اس قوم کی قیادت کرنی ہے۔ وزیر اعلیٰ نے طلبہ کو تلقین کی ہے کہ زندگی میں دیانتداری، ایمانداری اور ہمدردی جیسے اعلیٰ اخلاق و اقدار پر سختی سے کاربند رہیں۔ بعد ازاں وزیر اعلیٰ نے غلام اسحاق خان انسٹیٹیوٹ کے کلاس رومز اور لیبارٹریز سمیت مختلف شعبوں کا دورہ بھی کیا۔
نگران صوبائی وزیر برائے اطلاعات و تعلقات عامہ بیرسٹر فیروز جمال کاکاخیل، سینیٹر سلیم سیف اللہ خان اور جی آئی کے کے ریکٹر پروفیسر ڈاکٹر فضل احمد خان اور دیگر نے بھی تقریب سے خطاب کیا۔