رائٹ ٹو پبلک سروسز کمیشن میں پانچ عوامی شکایات کی سماعت, ایس ایچ او یونیورسٹی ٹاؤن اور پشتخرہ کو سمن جاری

رائٹ ٹو پبلک سروسز کمیشن میں پانچ عوامی شکایات کی سماعت ہوئی۔جج محمد عاصم امام کی سربراہی میں دو رکنی بنچ نے شہریوں کی شکایات سنیں۔لوئر دیر سے تعلق رکھنے والے شہری سیاست خان نے نکاح نامے کے حصول کے لئے کمیشن کو درخواست دی تھی۔کمیشن نے سماعت کے بعد اسسٹنٹ ڈائریکٹر لوکل گورنمنٹ لوئر دیر کو ویلج کونسل سیکرٹری کے خلاف پندرہ روز میں کاروائی کر کے کمیشن کو آگاہ کرنے کے احکامات دیئے۔ویلج کونسل سیکرٹری نے تاخیری حربے استعمال کرتے ہوئے شہری کے بنیادی حقوق کے خلاف خلاف ورزی کی ہے۔ دو شہریوں نے پشاور سے ایف آئی آر کے عدم اندراج کے خلاف کمیشن سے رجوع کیا تھا۔کمیشن نے حلقہ ایس ایچ او یونیورسٹی ٹاؤن اور پشتخرہ کو اگلی سماعت پر کمیشن کے سامنے حاضر ہونے کے احکامات جاری کیئے پشاور سے تعلق رکھنے والے حسن ناصر نامی شہری نے کمیشن کو درخواست دی تھی کہ حلقہ پٹواری زمین کافرد مہیا نہیں کر رہا۔رشوت طلب کرنے کے ساتھ ساتھ بوڑھے والد کے ساتھ بد تمیزی بھی کی ہے۔ کمیشن کے احکامات پر شہری کو نقول فراہم کر دی گئیں۔کمیشن نے تاخیر پر اسسٹنٹ کمشنر کو طلب کیا تھا۔اسسٹنٹ کمشنر نے کمیشن کو آگاہ کیا کہ الیکشن کمیشن کی ڈیوٹی پر موجود ہونے کی وجہ سے وہ پیش نہیں ہو سکتیں۔کمیشن نے آئندہ سماعت پر اسسٹنٹ کمشنر کو بذات خود پیش ہونے کی ہدایت دی۔کمیشن نے اپنے اعلامیہ میں کہا ہے کہ خدمات تک بروقت رسائی ہر شہری کا بنیادی حق ہے. نوٹیفایڈ خدمات تک بروقت رسائی میں کسی بھی سرکاری اہلکارکی کوتاہی قانون کے تحت قابل تعزیرجرم ہے۔ بنیادی خدمات کے حصول کیلئے شہری کمیشن سے رجوع کریں۔