وزیر اعلیٰ خیبر پختونخوا کے مشیر برائے ہاؤسنگ کا جلوزئی ہاؤسنگ سکیم کا دورہ: تعمیرات کام مکمل

وزیر اعلی خیبر پختونخواکے مشیر برائے ہاؤسنگ محمد اشفاق خان نے جمعرات کے روزے جلوزئی ہاؤسنگ سکیم نوشہرہ کا دورہ کیا اس موقع پر سیکرٹری ہاؤسنگ ڈاکٹرامبر علی، ڈائریکٹر جنرل ہاؤسنگ روشن محسود ڈپٹی سیکرٹری ہاؤسنگ نعمت اللہ آفریدی بھی ان کے ہمراہ تھے۔ دورہ کے دوران مشیر ہاؤسنگ کو جلوزئی ہاؤسنگ سکیم سے متعلق ڈائریکٹر جنرل ہاؤسنگ نے تفصیلی بریفنگ دی اور سکیم میں حائل رکاوٹوں اور مسائل کے بارے میں بھی آگاہ کیا بریفنگ میں بتایا گیا کہ جلوزئی ہاؤسنگ سکیم پر تقریبا 95 فیصد تعمیراتی کام مکمل ہو چکا ہے اور رہائشی سکیم میں رہائش کے لیے تمام تر سہولیات موجود ہیں۔ مشیر ہاؤسنگ نے دورے کے دوران جلوزئی رہاشی سکیم کی تعمیر پر اطمینان کا اظہار کرتے ہوئے کہا کہ مذکورہ رہائشی منصوبہ اپنی نوعیت کا ایک اہم اور اچھا عوامی منصوبہ ہے اور عوامی ضروریات کو مد نظر رکھتے ہوئے اس کا ماسٹر پلان تیار کیا گیا ہے جو کہ عمدہ اور منفرد ہے۔انہوں نے کہا کہ جلوزئی رہائشی منصوبے میں سرکاری ملازمین کے لئے بھی رہائشی پلاٹ مختص کئے گئے ہیں جو کہ خوش آئند امر ہے۔ انہوں نے کہا کہ جلوزئی ہاؤسنگ سکیم کے مسائل کے حل کے لئے فوری اقدامات اٹھائیں جائیں گے۔ انھوں نے کہا کہ اس منصوبے میں سیوریج سسٹم، توانائی کی ترسیل، واٹر ٹریٹمنٹ پلانٹ، سولر ٹیوب ویل تنصیب، زیر زمین سیوریج سسٹم، پینے کیلئے صاف پانی کی فراہمی اور عوامی قبرستان کی جگہ مختص کرنے کے اقدامات بھی اٹھائے گئے ہیں۔