خیبر پختونخوا کے مشیر اطلاعات و تعلقات عامہ بیرسٹر ڈاکٹر محمد علی سیف نے وفاقی وزیر اطلاعات عطا تارڑ کے بیان پر اپنے ردعمل میں کہا

خیبر پختونخوا کے مشیر اطلاعات و تعلقات عامہ بیرسٹر ڈاکٹر محمد علی سیف نے وفاقی وزیر اطلاعات عطا تارڑ کے بیان پر اپنے ردعمل میں کہا ہے کہ علیمہ خان اور بشری بی بی کی پارٹی پر قبضہ کی خبریں مینڈیٹ چور حکومت کی خواہش ہوسکتی ہے مگر اس میں کوئی حقیقت نہیں ہے، پارٹی عمران خان کی ہے اور وہ خود تمام معاملات دیکھ رہے ہیں، عمران خان کی قیادت میں پاکستان تحریک انصاف متفق و متحدا ور منظم ہے۔اپنے دفتر سے جاری ایک بیان میں انہوں نے کہا کہ بشری بی بی اور علیمہ خان بارے نااہل حکومت جھوٹ کا پروپیگنڈہ کررہی ہے حالانکہ اختلافات شریف خاندان میں ہیں جسکے مزے عطاء تارڑ خود لے رہے ہیں۔انہوں نے کہا کہ شہباز اور نواز گروپ کی آپس کی لڑائی نے ملک کو ناقابل تلافی نقصان پہنچایا ہے، دونوں بھائی میڈیا کے سامنے کچھ اور اندر کچھ اور ہوتے ہیں، دونوں گروپ پارٹی پر قبضے کی کوشش میں ہیں۔ بیرسٹر ڈاکٹر سیف نے کہا کہ الزامات تراشی اور پروپیگنڈوں کی سیاست کرنا مسلم لیگ ن کا پرانا وطیرہ ہے۔ شریف خاندان نے ملک کے تمام اداروں کو تباہی کے دہانے پر پہنچا دیا ہے۔ شریف خاندان کے اثاثے دن بدن بڑھتے جارہے ہیں جبکہ قومی خزانہ خالی ہورہا ہے۔