پی ٹی آئی اقتدار میں آکر متنازعہ غیر آئینی ترامیم کا خاتمہ کریگی، بیرسٹر ڈاکٹر سیف

ترامیم اغواکاری، چادر چاردیواری کے تقدس کی پامالی اور ماوں بہنوں کی عزتیں اچھال کر جیسے سنگین جرائم میں لپیٹ کر پاس کیا گیا، مشیر اطلاعات۔
وزیر اعلیٰ خیبر پختونخوا کے مشیر اطلاعات و تعلقات عامہ بیرسٹر ڈاکٹر سیف نے کہا ہے کہ پی ٹی آئی اقتدار میں آکر متنازعہ غیر آئینی ترامیم کا خاتمہ کرے گی۔ ان ترامیم کو اغواکاری، چادر چاردیواری کے تقدس کی پامالی اور ماؤں بہنوں کی عزتیں اچھا نے جیسے سنگین جرائم میں لپیٹ کر پاس کیا گیا ہے۔آئینی ترامیم کے حوالے سے اظہار خیال کرتے ہوئے بیرسٹر ڈاکٹر سیف نے کہا کہ جعلی حکومت نے اغوا گردی کرکے رات کی تاریکی میں سپریم کورٹ پر شب خون مار اہے کیوں کہ ترامیم کا جو طریقہ کار تھا وہ خود چیخ چیخ کر بتارہا ہے کہ آئین کی پیٹھ میں چھرا گھونپ دیا گیا ہے۔ جلد بازی میں ترامیم کا مقصد سپریم کورٹ کے فیصلے کے اطلاق سے بچنا ہے۔بیرسٹر ڈاکٹر سیف نے مزید کہا کہ متنازعہ ترامیم کے بعد پی ٹی آئی کی جدوجہد مزید تیز ہوگی اورمتنازعہ اور غیر آئینی ترامیم کے حق میں ووٹ ڈالنے والوں کو تاریخ کبھی معاف نہیں کریگی اور اب غیر آئینی ترامیم کا ساتھ دینے والے عوام کے انتقام سے بچ نہیں سکیں گے نہ ہی آئندہ انتخابات میں عوام انکو ووٹ دیں گے اور نہ ہی انہیں فارم 47 ملیں گا۔ انہوں نے کہا کہ متنازعہ ترامیم کے خلاف ڈٹ کر کھڑے ہونے پر پی ٹی آئی کا نام تاریخ میں سنہرے حروف میں لکھا جائے گا اور فسطائیت کا ڈٹ کر مقابلہ کرنے والے پی ٹی آئی کے اراکین پارلیمنٹ کو پوری قوم خراج تحسین پیش کرتی ہے اس کے برعکس بانی پی ٹی آئی عمران خان کے ساتھ غداری کرنے والے لوٹوں پر پوری قوم کی لعنت ہے اورتاریخ غداروں کو کبھی معاف نہیں کریگی۔بیرسٹر ڈاکٹر سیف نے کہا کہ عمران خان کے ساتھ بے وفائی کرنے والوں کا انجام پچھلے الیکشن میں سب نے دیکھا ہے۔ مشیر اطلاعات نے وکلاء برادری سے بھی غیر آئینی ترامیم کے خلاف فیصلہ کن معرکے کی اپیل کی اور ان سے کہا کہ وکلاء برادری پی ٹی آئی کے ساتھ ملکر متنازعہ غیر آئینی ترامیم کو اپنے انجام تک پہنچائیں۔