وزیرِ اعلیٰ خیبر پختونخوا کے مشیر برائے اطلاعات و تعلقاتِ عامہ، بیرسٹر ڈاکٹر سیف

وزیرِ اعلیٰ خیبر پختونخوا کے مشیر برائے اطلاعات و تعلقاتِ عامہ، بیرسٹر ڈاکٹر سیف نے پشاور میں ڈسٹرکٹ پریس کلب کرک کی نومنتخب کابینہ کی حلف برداری کی تقریب میں شرکت کی اور کابینہ کے اراکین سے حلف لیا۔ اس موقع پر خطاب کرتے ہوئے انہوں نے صحافت کی اہمیت کو اجاگر کرتے ہوئے کہا کہ ایک آزاد اور ذمہ دار میڈیا جمہوریت کی بنیادوں کو مضبوط کرنے میں کلیدی کردار ادا کرتا ہے۔ انہوں نے اس بات پر زور دیا کہ انتہا پسندانہ رویوں کے خاتمے اور سماجی ہم آہنگی کے فروغ میں صحافیوں کا کردار ناقابلِ فراموش ہے، کیونکہ ایک ذمہ دار اور آزاد میڈیا نہ صرف عوام کو درست معلومات فراہم کرتا ہے بلکہ رائے عامہ کی تشکیل اور مثبت بیانیے کو فروغ دینے میں بھی اہم کردار ادا کرتا ہے۔ انہوں نے کہا کہ صحافیوں کی ذمہ داری ہے کہ وہ حقائق پر مبنی رپورٹنگ کے ذریعے معاشرتی ہم آہنگی کو مضبوط کریں اور ایسے عناصر کی حوصلہ شکنی کریں جو انتشار اور غلط فہمیوں کو ہوا دیتے ہیں۔ بیرسٹر ڈاکٹر سیف نے حکومت کی جانب سے صحافیوں کی فلاح و بہبود کے لیے جاری اقدامات پر روشنی ڈالتے ہوئے کہا کہ آزاد اور پیشہ ورانہ صحافت کے فروغ کے لیے وسائل کی فراہمی کو یقینی بنایا جا رہا ہے۔ انہوں نے واضح کیا کہ میڈیا ورکرز کو جدید مہارتوں سے آراستہ کرنے اور ان کے حقوق کے تحفظ کے لیے تمام ممکنہ اقدامات کیے جا رہے ہیں۔ ان کا کہنا تھا کہ کرک کے صحافی عوامی مسائل کو اجاگر کرنے، حکومتی پالیسیوں پر تعمیری تنقید کرنے اور مثبت تبدیلی میں اپنا کردار ادا کرنے میں ہمیشہ پیش پیش رہے ہیں، جو کہ قابلِ ستائش ہے۔انہوں نے مزید کہا کہ صحافیوں کو درپیش مسائل کے حل کے لیے صوبائی حکومت ہر ممکن تعاون فراہم کرے گی۔ حکومت میڈیا کے پیشہ ور افراد کی فلاح و بہبود کے لیے مختص فنڈز کا شفاف اور مؤثر استعمال یقینی بنائے گی تاکہ وہ جدید ٹیکنالوجی اور نئے دور کے تقاضوں سے ہم آہنگ ہو سکیں۔ انہوں نے اس بات پر زور دیا کہ ایک باشعور اور بااختیار میڈیا نہ صرف حکومتی پالیسیوں کی درست سمت متعین کرنے میں مددگار ثابت ہوتا ہے بلکہ عوام اور حکومت کے درمیان پل کا کردار بھی ادا کرتا ہے۔کرک پریس کلب کے صدر خالد خٹک نے تقریب سے خطاب کرتے ہوئے حکومتی سرپرستی کو سراہا اور امید ظاہر کی کہ مستقبل میں بھی حکومت صحافتی برادری کے لیے عملی اقدامات جاری رکھے گی۔ انہوں نے مشیر اطلاعات کو ضلع کرک کے باضابطہ دورے کی دعوت دی تاکہ وہ یہاں کے مسائل اور صحافیوں کو درپیش مشکلات کا قریب سے جائزہ لے سکیں۔تقریب میں ایڈیشنل سیکرٹری اطلاعات و تعلقاتِ عامہ خیبر پختونخوا حیات شاہ، ڈائریکٹر جنرل اطلاعات سلیم خان اور دیگر حکومتی عہدیداران نے بھی شرکت کی۔ تقریب کے اختتام پر تمام شرکاء نے اس امید کا اظہار کیا کہ کرک پریس کلب اپنی مثبت اور ذمہ دارانہ صحافت کے ذریعے عوامی مسائل کے حل میں اپنا کردار مؤثر طریقے سے ادا کرتا رہے گا۔ اس موقع پر ڈسٹرکٹ پریس کلب کرک کی نومنتخب کابینہ کے اراکین نے مشیر اطلاعات بیرسٹر ڈاکٹر سیف کو اعزازی شیلڈ بھی پیش کی۔