وزیر اعلیٰ خیبر پختونخوا کے معاون خصوصی برائے صنعت عبدالکریم تورڈھیر کی موجودگی

وزیر اعلیٰ خیبر پختونخوا کے معاون خصوصی برائے صنعت عبدالکریم تورڈھیر کی موجودگی میں بدھ کے روز پشاور میں خیبر پختونخوا سمال انڈسٹریز ڈویلپمنٹ بورڈ (ایس آئی ڈی بی) اور یونیورسٹی آف ٹیکنالوجی نوشہرہ کے مابین باہمی تعاون کا معاہدہ طے پاگیا جس کا بنیادی مقصد انڈسٹری میں اکیڈمیا کی اہمیت اور کردار کومتعارف کروانا اور انجینئرنگ کے طالباء و طالبات کو تعلیم کے ساتھ ساتھ عملی تربیت کیلئے مواقع فراہم کرنا ہے۔ اس سلسلے میں مذکورہ معاہدے پر دستخط کرنے کی تقریب ایس آئی ڈی بی کے مرکزی دفتر میں منعقد ہوئی جس میں منیجنگ ڈائریکٹر ایس آئی ڈی بی حبیب اللہ عارف اور وائس چانسلر یونیورسٹی آف ٹیکنالوجی نوشہرہ ڈاکٹر عمران نے باقاعدہ طور پردستخط کیے۔تقریب میں ڈائریکٹر فنانس ایس آئی ڈی بی بشیر احمد، ڈپٹی منیجنگ ڈائریکٹر انجینئر ذوالفقار علی صاحبزادہ،ڈپٹی منیجنگ ڈائریکٹر نعمان فیاض، سرحد چیمبر اف کامرس اینڈ انڈسٹری کے صدر فضل مقیم، سابق صدر انجنیئرمقصود انور، وحید عارف اعوان صدر ایس آئی ای پشاور اورصنعت کار نورالدین داود ارمز بھی موجود تھے۔ اس معاہدے کے تحت ابتداء میں پشاور کی سمال انڈسٹری میں کام کرنے والے ہنر مند افراد کو جدید ٹیکنالوجی سے آگاہ کیا جائے گا تاکہ انڈسٹری بھی دور جدید کے تقاضوں سے ہم آہنگ ہو سکے۔علاوہ ازیں، انجینئرنگ کے طالباء کو تعلیم کے ساتھ ساتھ باقاعدہ انڈسٹری کے وزٹ اور انٹرشپ بھی اس معاہدے کا حصہ ہے تاکہ وہ تعلیم کے ساتھ عملی تربیت میں بھی انڈسٹری کے بارے میں سیکھیں۔اس موقع پر وزیر اعلی کے معاون خصوصی برائے صنعت عبدالکریم تورڈھیر نے اظہار خیال کرتے ہوئے دونوں اداروں کے مابین تعاون کے اس معاہدے کو صنعتوں کی ترقی اور ٹیکنیکل طلبہ کیلئے عملی تربیت کی فراہمی کے سلسلے میں ایک اہم ذریعہ قرار دیا۔انھوں نے کہا کہ صنعت کی ترقی میں اکیڈمیاں کا ایک اہم کردار ہے جس سے انکار ناممکن ہے۔ اس سلسلے میں ایس آئی ڈی بی اور یونیورسٹی آف ٹیکنالوجی کا تعاون انتہائی مفید رہے گا۔انھوں نے کہا کہ ہم صوبے میں صنعتی شعبے کی ترقی چاہتے ہیں اور حکومت سے جتنا بھی ہوسکیں اس سیکٹر کو اوپر لانے کیلئے ہر ممکن قدم اٹھایا جائے گا۔