داسو ہائیڈرو پاور پراجیکٹ کے سیٹلمنٹ آپریشن میں تیزی لاتے ہوئے ایک ماہ میں عمل مکمل کیا جائے — کمشنر ہزارہ فیاض علی شاہ

کمشنر ہزارہ ڈویژن فیاض علی شاہ کی زیرِ صدارت داسو ہائیڈرو پاور پراجیکٹ کے لیے حاصل شدہ اراضی میں جاری سیٹلمنٹ آپریشن کی پیش رفت کے حوالے سے ایک اہم اجلاس منعقد ہوا۔اجلاس میں ایڈیشنل ڈپٹی کمشنر (جنرل)/سیٹلمنٹ آفیسر اپر کوہستان نے منصوبے پر اب تک کی پیش رفت پر تفصیلی بریفنگ دی، جبکہ ڈپٹی کمشنر اپر کوہستان اور دیگر متعلقہ افسران بھی اجلاس میں شریک تھے۔کمشنر ہزارہ نے ہدایت دی کہ سیٹلمنٹ کا عمل ہر صورت ایک ماہ کے اندر مکمل کیا جائے۔ اس مقصد کے لیے مؤثر ٹیمیں تشکیل دی جائیں، ذمہ داریوں کی واضح تقسیم کی جائے، اور اگر اضافی عملے یا پٹواریوں کی ضرورت ہو تو فوری طور پر رپورٹ ارسال کی جائے۔انہوں نے اس بات پر زور دیا کہ ڈیوٹی سے غیر حاضر اہلکاروں کے خلاف سخت تادیبی کارروائی عمل میں لائی جائے۔ مزید کہا کہ اگر واپڈا سے کسی قسم کی معاونت درکار ہو تو بروقت رابطہ کیا جائے، اور اگر تعاون میں کوئی رکاوٹ درپیش ہو تو معاملہ فوراً ان کے نوٹس میں لایا جائے تاکہ بر وقت حل ممکن بنایا جا سکے۔کمشنر ہزارہ نے تمام متعلقہ محکموں کو ہدایت کی کہ دستیاب وسائل کو بروئے کار لاتے ہوئے سیٹلمنٹ آپریشن ایک ماہ کے اندر مکمل کیا جائے، اور ہفتہ وار پیش رفت رپورٹ کمشنر آفس کو ارسال کی جائے۔انہوں نے واضح کیا کہ داسو ہائیڈرو پاور پراجیکٹ ایک قومی اہمیت کا حامل منصوبہ ہے، لہٰذا اس میں کسی قسم کی کوتاہی یا تاخیر کسی صورت برداشت نہیں کی جائے گی۔