خیبر پختونخوا کے وزیر برائے ابتدائی و ثانوی تعلیم ارشد ایوب خان سے جمعہ کے روز پشاور میں یونیسف کے چیف فیلڈ آفیسر پشاور اور ماہر تعلیم سید فواد علی شاہ نے ملاقات کی

خیبر پختونخوا کے وزیر برائے ابتدائی و ثانوی تعلیم ارشد ایوب خان سے جمعہ کے روز پشاور میں یونیسف کے چیف فیلڈ آفیسر پشاور اور ماہر تعلیم سید فواد علی شاہ نے ملاقات کی۔ دو رکنی وفد نے صوبائی وزیر کو شعبہ تعلیم کو فروغ دینے کے لئے یونیسف کی جانب سے مکمل تعاون کی یقینی دہانی کرائی اور کہا کہ نئی داخلہ مہم کو کامیاب بنانے کے لئے آؤٹ آف سکول چلڈرن کو تعلیم کی طرف راغب کرنے کی خاطر موثر حکمت عملی کے تحت اقدامات اٹھائے جائیں گے اور اس کے لئے صوبے میں آؤٹ آف سکول چلڈرن کا ڈیٹا اکٹھا کرنے کے ساتھ بچوں کی نشاندہی بھی کی جائے گی تاکہ بچے حصول تعلیم سے محروم نہ رہیں۔وفد نے یونیسف کی جانب سے سکولوں کے طلبہ کو مصنوعی ذہانت کی تعلیم د لانے میں بھی تعاون کی یقینی دہانی کرائی اور صوبے کے سکولوں کو سولر ائزیشن پر منتقل کرنے اور عمارات کی مرمت سمیت ان میں بہتر انفراسٹرکچر مہیا کرنے پر رضامندی کا بھی اظہار کیا۔وفد سے بات چیت کے دوران صوبائی وزیر نے یونیسف کی جانب سے تعلیمی سرگرمیوں میں تعاون کو سراہتے ہوئے کہا کہ تعلیم کا شعبہ موجودہ حکومت کی اولین ترجیح ہے اور صوبے میں تعلیم کی ترقی کے بہتر فروغ میں حصہ لینے والی تمام تنظیموں کو حکومت قدر کی نگا ہ سے دیکھتی ہے۔