سیکریٹری محکمہ ایکسائز و ٹیکسیشن اور نارکوٹکس کنٹرول خیبرپختونخوا خالد الیاس کی زیر صدارت ایک اعلی سطح اجلاس منعقد ہوا

سیکریٹری محکمہ ایکسائز و ٹیکسیشن اور نارکوٹکس کنٹرول خیبرپختونخوا خالد الیاس کی زیر صدارت ایک اعلی سطح اجلاس منعقد ہوا جس میں وزیرِ اعلیٰ خیبر پختونخوا محمد سہیل آفریدی کے ویژن اور وزیر ایکسائز سید فخرجہان کی ہدایات کی روشنی میں کیپیٹل ویلیو ٹیکس کے امور اور پرسنلائزڈ رجسٹریشن مارک سے متعلق مجوزہ بہتر ترامیم کے حوالے سے غور خوض کیا گیا۔اجلاس میں ڈائریکٹر جنرل ایکسائز عبدالحلیم خان اور محکمہ کے دیگر متعلقہ سینئر افسران نے شرکت کی۔
اجلاس میں کیپیٹل ویلیو ٹیکس اور پرسنلائزڈ رجسٹریشن مارک کے نظام کو مزید شفاف، مؤثر اور عوام دوست بنانے کے لیے مختلف تجاویز پر تفصیلی تبادلہ خیال کیا گیا۔ اس موقع پر اس امر پر زور دیا گیا کہ ٹیکس کے نظام کو جدید تقاضوں سے ہم آہنگ کیا جائے تاکہ شہریوں کو سہولیات کی فراہمی آسان ہو اور سرکاری محصولات میں بھی اضافہ ممکن بنایا جا سکے۔
سیکرٹری ایکسائز نے اجلاس سے خطاب کرتے ہوئے کہا کہ وزیرِ اعلیٰ خیبر پختونخوا کے وژن کے مطابق صوبے میں گڈ گورننس، شفافیت اور عوامی سہولت کو یقینی بنانے کے لیے محکمہ ایکسائز میں اصلاحات کا عمل جاری ہے۔ انہوں نے کہا کہ کیپیٹل ویلیو ٹیکس اور PRM سے متعلق مجوزہ ترامیم کا بنیادی مقصد نظام کو سادہ، شفاف اور عوام کے لیے قابلِ رسائی بنانا ہے۔
ڈائریکٹر جنرل ایکسائز عبدالحلیم خان نے اجلاس کو بریفنگ دیتے ہوئے بتایا کہ محکمہ جدید ٹیکنالوجی اور ڈیجیٹل نظام کے ذریعے شہریوں کو بہتر خدمات فراہم کرنے کے لیے عملی اقدامات کر رہا ہے۔ انہوں نے کہا کہ مجوزہ اصلاحات سے نہ صرف سرکاری آمدن میں اضافہ ہوگا بلکہ عوام کو بھی آسان اور تیز تر خدمات میسر آئیں گی۔
اجلاس میں اس بات پر بھی اتفاق کیا گیا کہ عوامی مفاد کو مدنظر رکھتے ہوئے ایسے اقدامات کیے جائیں گے جن سے ٹیکس کے نظام میں آسانی، شفافیت اور اعتماد کو فروغ ملے۔ حکام کا کہنا تھا کہ حکومت خیبر پختونخوا کا مقصد ایک ایسا نظام قائم کرنا ہے جس میں شہریوں کو کم سے کم وقت میں زیادہ سے زیادہ سہولیات فراہم کی جا سکیں۔
متعلقہ حکام کے مطابق مجوزہ ترامیم کی حتمی سفارشات مرتب کر کے متعلقہ فورمز کو ارسال کی جائیں گی تاکہ ان پر جلد از جلد عملی اقدامات کیے جا سکیں۔