صوبائی وزیر سید فخر جہان کا PK-26 بونیر میں پبلک ڈے،، عوامی مسائل کے فوری حل کیلئے موقع پر ہدایات

خیبرپختونخوا کے وزیر برائے ایکسائز، ٹیکسیشن اور نارکوٹکس کنٹرول سید فخر جہان نے اتوار کے روز اپنے حلقہ PK-26 بونیرمیں پبلک ڈے کے موقع پر مصروف دن گزارا، جہاں انہوں نے عوام، عمائدین علاقہ، کارکنان اور مختلف وفود سے ملاقاتیں کیں۔ وفود نے صوبائی وزیر کو اپنے علاقوں کو درپیش عوامی، ترقیاتی اور فلاحی مسائل سے آگاہ کیا اور مختلف معروضات پیش کیں۔
صوبائی وزیر نے شہریوں کے مسائل تفصیل سے سنے اور ان کے فوری حل کو یقینی بنانے کیلئے موقع پر ہی متعلقہ محکموں اور افسران کو واضح اور بروقت ہدایات جاری کیں۔ انہوں نے ہدایت کی کہ عوامی شکایات کے ازالے میں کسی قسم کی تاخیر نہیں ہونی چاہیے اور تمام مسائل ترجیحی بنیادوں پر حل کیے جائیں۔
اس موقع پر سید فخر جہان نے کہا کہ بانی چیئرمین عمران خان کے عوامی خدمت و فلاح کے وژن کے مطابق صوبائی حکومت عام آدمی کو ریلیف دینے، نچلی سطح پر سہولتیں پہنچانے اور عوامی مسائل کے فوری حل کیلئے عملی اقدامات کر رہی ہے۔ انہوں نے کہا کہ وزیراعلیٰ خیبرپختونخوا محمد سہیل آفریدی کی قیادت میں عوامی خدمت، شفاف طرز حکمرانی اور عوام مسائل کے خاتمے کیلئے ٹھوس کوششیں کی جارہی ہیں جس کا مقصد صوبے میں عوام کو ہر ممکن سہولت ان کی دہلیز پر فراہم کرنا ہے۔
ان کا کہنا تھا کہ پبلک ڈے کا مقصد عوام اور ان کے منتخب نمائندوں کے درمیان رابطے کو مضبوط بنانا اور حکومتی کارکردگی پر عوامی اعتماد کو مزید مستحکم کرنا ہے۔صوبائی وزیر نے مزید کہا کہ وہ اپنے حلقے کے عوام کے ساتھ ہر وقت کھڑے ہیں اور ان کے مسائل کے حل، ترقیاتی کاموں کی رفتار تیز کرنے اور بنیادی سہولیات کی فراہمی کیلئے تمام دستیاب وسائل بروئے کار لائے جائیں گے۔
انہوں نے اس عزم کا اظہار کیا کہ عمران خان کے وژن اور صوبائی حکومت کی عوام دوست پالیسیوں کے تحت خدمت کا یہ سفر مزید تیزی سے جاری رکھا جائے گا۔علاقے کے عوام، عمائدین اور کارکنان نے صوبائی وزیر کی جانب سے فوری احکامات، عوامی رسائی اور مسائل کے حل میں ذاتی دلچسپی کوسراہا۔