ایکسائز اینٹیلیجنس کی بڑی کارروائی،20 کلوگرام سے زائد چرس برآمد، منشیات سمگلنگ کی کوشش ناکام

محکمہ ایکسائز و ٹیکسیشن اور نارکوٹکس کنٹرول خیبرپختونخوا نے منشیات سمگلنگ کی کوشش کو ناکام بناتے ہوئے بھاری مقدار میں چرس برآمد کرلی ہے۔ صوبائی حکومت کے انسداد منشیات کے حوالے سے زیرو ٹالرنس پالیسی اور وزیر ایکسائز سید فخرجہان کی ہدایات کی روشنی میں جاری کاروائیوں کے تسلسل میں محکمہ ایکسائز کے بیورو آف اینٹیلیجنس اینڈ انویسٹیگیشن کی ٹیم نے خفیہ اطلاع پر تختہ بیگ چیک پوسٹ کے قریب ایک کارروائی عمل میں لائی۔ پروونشل انچارج سعود خان گنڈا پور اور ایکسائز اینڈ ٹیکسیشن آفیسر نارکوٹکس کنٹرول ماجد خان کی نگرانی میں ہونے والی اس کاروائی میں انسپکٹر معظم جان خان اور ٹیم نے گاڑی نمبر 1092 کی تلاشی لی جس کے دوران گاڑی سے 20 ہزار 400 گرام چرس برآمد ہوئی۔محکمہ ایکسائز نے ملزمان کے خلاف تھانہ ایکسائز خیبر میں مقدمہ درج کر کے مزید تفتیش شروع کر دی ہے