پشاور اور سوات میں فوڈ اتھارٹی کی بڑی کارروائیاں، 8 ہزار کلو سے زائد غیر معیاری اشیائے خوردونوش تلف

خیبرپختونخوا فوڈ سیفٹی اینڈ حلال فوڈ اتھارٹی نے وزیر اعلیٰ خیبرپختونخوا کی ھدایات پر کاروائیاں جاری رکھتے ہوئے پشاور اور سوات میں غیر معیاری اور مضر صحت خوراک کے خلاف بڑی کارروائیاں کیں اور 8 ہزار کلوگرام سے زائد مضر صحت اشیائے خوردونوش ضبط کرکے تلف کر دیں۔
ترجمان فوڈ اتھارٹی نے کاروائیوں کے حوالے سے تفصیلات جاری کرتے ہوئے کہا کہ پشاور میں فوڈ سیفٹی ٹیم نے خفیہ اطلاع ملنے پر مختلف مصالحہ جات تیار کرنے والی یونٹس پر چھاپے مارے۔ کارروائی کے دوران ایک یونٹ سے 1200 کلوگرام چوکر، 100 کلوگرام استعمال شدہ آئل اور 30 کلوگرام نان فوڈ گریڈ کلر برآمد کرکے ضبط کر لیا گیا۔ فوڈ اتھارٹی حکام نے خلاف ورزیوں پر مالکان پر جرمانے عائد کرتے ہوئے فوڈ سیفٹی ایکٹ کے تحت مزید قانونی کارروائی بھی شروع کر دی ہے۔
ترجمان کا مزید کہنا تھا کہ دوسری جانب سوات میں فوڈ سیفٹی ٹیم نے بڑی کارروائی کرتے ہوئے 8 ہزار کلوگرام سے زائد غیر معیاری اور ضبط شدہ اشیائے خوردونوش کو تلف کر دیا۔ کارروائی کے دوران 3654 لیٹر سے زائد غیر معیاری مشروبات اور 1880 کلوگرام مصالحہ جات بھی تلف کیے گئے۔
مزید برآں 158 کلوگرام چاٹ مصالحہ، 423 کلوگرام چائنا سالٹ، 251 کلوگرام گٹکا و میٹھی سپاری بھی ضائع کی گئی۔ اسی طرح 843 کلوگرام غیر معیاری پیکجنگ میٹریل، 160 کلوگرام بیکری آئٹمز اور 60 کلوگرام پاپس بھی تلف کیے گئے۔
فوڈ اتھارٹی حکام کے مطابق کارروائی کے دوران 25 کلوگرام نان فوڈ گریڈ کلر سمیت 749 کلوگرام مختلف کریانہ آئٹمز بھی تلف کیے گئے۔
ڈائریکٹر جنرل فوڈ اتھارٹی کاشف اقبال جیلانی نے کہا کہ وزیر اعلیٰ خیبرپختونخوا کی ہدایت پر صوبہ بھر میں ملاوٹ مافیا کے خلاف کارروائیاں بلا تعطل جاری ہیں۔ ان کا کہنا تھا کہ صوبے سے ملاوٹ مافیا کا مکمل خاتمہ فوڈ اتھارٹی کا مشن ہے اور عوام کو محفوظ اور معیاری خوراک کی فراہمی ہر صورت یقینی بنائی جائے گی۔