ہزاروں لیٹر غیر معیاری دودھ اور زائدالمعیاد مشروبات ضبط، دکان سیل، مالک پابند سلاسل

خیبرپختونخوا فوڈ سیفٹی اینڈ حلال فوڈ اتھارٹی کی فوڈ سیفٹی ٹیموں نے کوہاٹ اور ہنگو میں بڑی کارروائیاں کرتے ہوئے غیر معیاری اور مضرِ صحت خوراک میں ملوث عناصر کے خلاف سخت ایکشن لیا۔ترجمان فوڈ اتھارٹی نے تفصیلات جاری کرتے ہوئے کہا کہ گزشتہ روز فوڈ سیفٹی ٹیموں نے ضلع ہنگو میں دودھ کی دکانوں اور کولڈ ڈرنکس شاپس پر چھاپے مارے، جہاں ایک کولڈ ڈرنکس شاپ سے 6000 لیٹر سے زائد زائدالمعیاد مشروبات برآمد کر کے ضبط کیے گئے جبکہ دکان کو موقع پر سیل کر دیا گیا۔ اسی طرح ایک دودھ کی دکان سے 50 لیٹر ملاوٹی دودھ برآمد ہوا جسے موقع پر تلف کر دیا گیا۔دوسری جانب فوڈ سیفٹی ٹیم کوہاٹ نے ضلعی انتظامیہ کے ہمراہ کوہاٹ بازار میں خوراک کے مختلف کاروباروں کا معائنہ کیا۔ کارروائی کے دوران ایک دکان سے 2000 لیٹر سے زائد غیر معیاری اور ملاوٹی دودھ برآمد کر کے موقع پر تلف کیا گیا جبکہ دکان کے مالک کو گرفتار کر لیا گیا۔ترجمان نے کہا کہ حفظانِ صحت کے اصولوں کی خلاف ورزی پر متعدد دکانوں کو بھاری جرمانے عائد کیے گئے جبکہ ملوث عناصر کے خلاف مزید قانونی کارروائی کا آغاز کر دیا گیا ہے۔اس موقع پر ڈائریکٹر جنرل خیبرپختونخوا فوڈ سیفٹی اینڈ حلال فوڈ اتھارٹی کاشف اقبال جیلانی نے کامیاب کاروائیوں پر فوڈ سیفٹی ٹیموں کو سراہا اور کہا کہ شہری ملاوٹ مافیا جیسے عناصر کی فوری نشاندہی کر کے فوڈ اتھارٹی کو اطلاع دیں تاکہ بروقت کارروائی ممکن بنائی جا سکے۔انہوں نے واضح کیا کہ صوبے سے غیر معیاری اور ملاوٹ شدہ خوراک کا مکمل خاتمہ فوڈ اتھارٹی کا مشن ہے اور عوام کی صحت پر کوئی سمجھوتہ نہیں کیا جائے گا۔