چار روزہ خصوصی دودھ چیکنگ مہم مکمل

خیبرپختونخوا فوڈ سیفٹی اینڈ حلال فوڈ اتھارٹی نے وزیر اعلیٰ خیبرپختونخوا کے رمضان ہدایت نامے کی روشنی میں پری رمضان لائحہ عمل کے تحت صوبے بھر میں جاری خصوصی دودھ چیکنگ مہم مکمل کر لی۔ مہم کے دوران صوبے کے بڑے شہروں کے داخلی راستوں پر ناکہ بندیاں قائم کر کے دودھ سپلائی کرنے والی گاڑیوں کی سخت جانچ پڑتال کی گئی۔
ترجمان فوڈ اتھارٹی نے تفصیلات جاری کرتے ہوئے بتایا کہ چار روزہ خصوصی مہم کے دوران مجموعی طور پر 278 دودھ کی گاڑیوں کی چیکنگ کی گئی جبکہ 300 دودھ کے نمونے حاصل کر کے موبائل فوڈ ٹیسٹنگ لیبارٹری کے ذریعے موقع پر ہی تجزیہ کیا گیا۔ جانچ کے نتائج کے مطابق 219 نمونے تسلی بخش جبکہ 81 نمونے ملاوٹی اور غیر معیاری پائے گئے۔
ترجمان نے بتایا کہ غیر معیاری ثابت ہونے پر تقریباً 2155 لیٹر دودھ موقع پر ہی تلف کر دیا گیا جبکہ حفظانِ صحت کے اصولوں کی خلاف ورزی پر ذمہ دار مالکان پر لاکھوں روپے جرمانے بھی عائد کیے گئے۔
مزید تفصیلات کے مطابق مردان ڈویژن سے 53، ہزارہ ڈویژن سے 136، ملاکنڈ ڈویژن سے 34، کوہاٹ سے 10، پشاور سے 7 جبکہ بنوں اور ڈی آئی خان ڈویژن سے 30،30 دودھ کے نمونوں کی جانچ کی گئی۔
ڈائریکٹر جنرل خیبرپختونخوا فوڈ سیفٹی اینڈ حلال فوڈ اتھارٹی کاشف اقبال جیلانی نے کامیاب مہم پر فوڈ سیفٹی ٹیموں کی کاوشوں کو سراہا اور کہا کہ رمضان لائحہ عمل کے مطابق دودھ، گوشت، بیکری آئٹمز، مشروبات، مصالحہ جات، ائل اینڈ گھی اور رمضان المبارک میں زیادہ استعمال ہونے والی دیگر خوردونوش اشیاء کی خصوصی انسپکشن کا سلسلہ جاری ہے تاکہ بازاروں میں عوام کو محفوظ خوراک کی فراہمی یقینی بنائی جا سکے۔
کاشف اقبال جیلانی کا کہنا تھا کہ شہریوں کی صحت سے کھیلنے والوں کے خلاف بلاامتیاز اور سخت کارروائیاں ہوں گی۔ ملاوٹ اور غیر معیاری خوراک کسی صورت برداشت نہیں کی جائے گی۔
ڈی جی فوڈ اتھارٹی نے شہریوں سے اپیل کی کہ وہ ملاوٹ اور غیر معیاری خوراک کی نشاندہی کے لیے فوڈ اتھارٹی کو فوری طور پر مطلع کریں تاکہ بروقت کارروائی کو یقینی بنایا جا سکے۔