خیبرپختونخوا فوڈ اتھارٹی کا نوشہرہ میں جعلی و مضر صحت مشروبات بنانے والی یونٹ پر چھاپہ، 4500 خالی بوتلیں برآمد

خیبرپختونخوا فوڈ سیفٹی اینڈ حلال فوڈ اتھارٹی نے صوبہ بھر میں پری رمضان اور رمضان لائحہ عمل کے تحت کارروائیاں جاری رکھتے ہوئے نوشہرہ کے علاقے پبی میں ایک مشروبات تیار کرنے والی یونٹ پر بڑی کارروائی کی اور جعلی و مضر صحت مشروبات کی تیاری کا بھانڈا پھوڑ دیا۔
ترجمان فوڈ اتھارٹی نے کارروائی کی تفصیلات جاری کرتے ہوئے بتایا کہ گزشتہ روز فوڈ سیفٹی ٹیم نوشہرہ نے مذکورہ یونٹ پر چھاپے کے دوران ملٹی نیشنل معروف برانڈز کی تقریباً 4500 خالی بوتلیں، پیکنگ میٹریل، مختلف فلیورز، نان فوڈ گریڈ کلر اور سٹیبلائزر برآمد کر کے ضبط کر لیے۔
ترجمان کے مطابق مذکورہ یونٹ میں غیر معیاری اور مضر صحت مشروبات تیار کی جا رہی تھیں، جبکہ معروف برانڈز کی بوتلیں جعلی مشروبات کی پیکنگ کے لیے استعمال کی جا رہی تھیں۔ یونٹ میں مبینہ طور پر رات کے وقت خفیہ طور پر پروڈکشن کی جاتی تھی اور رمضان المبارک کے دوران مختلف شہروں میں سپلائی کی تیاری کی جا رہی تھی۔
فوڈ سیفٹی ٹیم نے فیکٹری کو موقع پر سیل کرتے ہوئے وہاں استعمال ہونے والی مشینری کو سرکاری تحویل میں لے لیا اور خیبرپختونخوا فوڈ سیفٹی ایکٹ کے تحت مزید قانونی کارروائی کا آغاز کر دیا۔
ڈائریکٹر جنرل خیبرپختونخوا فوڈ سیفٹی اینڈ حلال فوڈ اتھارٹی، کاشف اقبال جیلانی نے کامیاب کارروائی پر فوڈ سیفٹی ٹیم کو سراہتے ہوئے کہا کہ پری رمضان اور رمضان پلان کے تحت صوبہ بھر میں غیر معیاری اور مضر صحت خوردنی اشیاء میں ملوث عناصر کے خلاف کارروائیاں جاری ہیں۔ انہوں نے خبردار کیا کہ ملاوٹ مافیا اپنا قبلہ درست کر لے، بصورت دیگر سخت قانونی کارروائی کے لیے تیار رہے۔