خیبرپختونخوا میں رمضان ریلیف پیکج کے تحت مستحق خاندانوں کو امدادی رقم کی شفاف تقسیم کا عمل شروع ہو چکا ہے، شفیع جان

وزیراعلیٰ خیبرپختونخوا کے معاون خصوصی برائے اطلاعات و تعلقات عامہ شفیع جان نے رمضان ریلیف پیکج کے حوالے سے عظمیٰ بخاری کے بیان پر ردعمل دیتے ہوئے کہا ہے کہ عظمیٰ بخاری خیبرپختونخوا کے معاملات پر بے بنیاد اور گمراہ کن بیانات دینے سے باز رہیں،وہ شروع دن سے صوبائی حکومت پر بے بنیاد الزامات لگا رہی ہیں جو حقائق کے منافی ہیں اور عوام کو گمراہ کرنے کی ناکام کوشش ہے۔انہوں نے کہا کہ رمضان ریلیف پیکج پر اپنی مردہ سیاست چمکانا دراصل پنجاب حکومت کی بے حسی کا ثبوت ہے۔ خیبرپختونخوا میں رمضان ریلیف پیکج کے تحت مستحق خاندانوں کو امدادی رقم کی شفاف تقسیم کا عمل باقاعدہ طور پر شروع ہو چکا ہے۔معاون خصوصی نے کہا کہ رمضان ریلیف پیکج کی تقسیم کسی بھی سیاسی تفریق کے بغیر صرف مستحق خاندانوں میں تقسیم کی جا رہی ہے۔وزیراعلیٰ سہیل آفریدی کی ہدایات کے مطابق بیواؤں اور خصوصی افراد کو اولین ترجیح دی جا رہی ہے۔ اس لیے پی ٹی آئی کارکنوں میں رمضان پیکج تقسیم کرنے کا الزام سراسر جھوٹ اور منفی سیاسی پروپیگنڈا ہے۔انہوں نے عظمیٰ بخاری کو مشورہ دیا کہ رمضان پیکج پر تنقید سے پہلے قوم کو جعلی وزیراعلیٰ کے لیے خریدے گئے طیارے کا حساب دیں۔ عوام کے ٹیکس کے پیسوں پر شاہانہ طرز حکمرانی مسلم لیگ (ن) کا وطیرہ رہا ہے۔شفیع جان نے کہا کہ پنجاب کے وزراء پہلے اپنے صوبے کی بدترین کارکردگی کا جواب دیں، اس کے بعد خیبرپختونخوا پر تنقید کریں۔ خیبرپختونخوا حکومت عوامی فلاح و بہبود اور مستحقین کو ریلیف دینے کے لیے سنجیدہ اور عملی اقدامات کر رہی ہے اور اپنی تمام تر توجہ عوام کو ریلیف دینے اور مسائل کے حل پر مرکوز کیے ہوئے ہے۔انہوں نے کہا کہ رمضان پیکج کی تقسیم شفاف طریقہ کار کے تحت جاری ہے اور اسے سیاسی رنگ دینا شرمناک عمل ہے۔ خیبرپختونخوا کے باشعور عوام جھوٹے پروپیگنڈے اور منفی سیاست کو بخوبی پہچانتے ہیں۔معاون خصوصی نے مزید کہا کہ بانی چیئرمین عمران خان آج بھی مسلم لیگ (ن) کے وزراء کے اعصاب پر سوار ہیں۔ جعلی مقدمات میں پابند سلاسل رکھنے کے باوجود ن لیگ کے وزراء عمران خان کی عوامی مقبولیت سے خوفزدہ ہیں۔