خیبرپختونخوا ہیلتھ کیئر کمیشن کی کارروائیاں تیز، تین ماہ میں 801 طبی مراکز رجسٹر، 1,678کو سیل کیا گیا

خیبرپختونخوا ہیلتھ کیئر کمیشن نے تین ماہ کی کارکردگی رپورٹ شائع کردی۔ ترجُمان ہیلتھ کیئر کمیشن عزم رحمان کے مطابق صرف تین ماہ میں 801 طبی مراکز کو رجسٹر کیا گیا جبکہ8199 طبی مراکز کا معائنہ کیا گیا جس میں 4496 طبی مراکز کو مختلف خلاف ورزیوں پر جواب طلبی نوٹس جاری کیے گئے اور 1678 طبی مراکز کو سیل کیا گیا۔ اسی طرح 74طبی مراکز کی جانچ پڑتال کی گئی جس میں 17 کو مُکمل اور 136 کو عبوری لائسنس جاری کیے گئے۔ رپورٹ کے مطابق تین ماہ میں “خدمات صحت کے معیار”پر سات تربیتی سیشن منعقد کرنے کا بھی اہتمام کیا گیا جس سے صوبے کے مختلف اضلاع سے تعلق رکھنے والے طبی مراکز کے 183 ملازمین کو تربیت دی گئی۔ اسی طرح کمیشن کو تین ماہ میں 333 نئی شکایات موصول ہوئیں جن میں سے 303 کو نمٹا دیا گیا۔ ڈائریکٹر آپریشنز خیبرپختونخوا ہیلتھ کیئر کمیشن ارسلان احمد خان نے رپورٹ پر اطمنان کا اظہار کرتے ہوئے کہا کہ یہ اعداد و شُمار کمیشن کے عملے کی انتھک محنت کا منہ بولتا ثبوت ہیں، جس کا مقصد عوام کو صحت کی معیاری خدمات کی فراہمی ہے۔