خیبر بار ایسوسی ایشن کی تقریبِ حلف برداری۔صوبائی وزیر قانون کی بحیثیت مہمان خصوصی شرکت

وزیر اعلیٰ خیبرپختونخوا سہیل آفریدی کی ہدایت پر صوبائی وزیر قانون آفتاب عالم ایڈووکیٹ نے ایم پی اے عبدالغنی آفریدی کے ہمراہ ضلع خیبر کی تحصیل جمرود کا دورہ کیا اور خیبر بار ایسوسی ایشن کی تقریبِ حلف برداری میں بطور مہمانِ خصوصی شرکت کی۔تقریب میں وزیر قانون نے خیبر بار ایسوسی ایشن کی نو منتخب کابینہ اور انصاف لائرز فورم (آئی ایل ایف) کی کابینہ سے حلف لیا اور انہیں مبارکباد پیش کی۔اس موقع پر اظہار خیال کرتے ہوئیوزیر قانون آفتاب عالم نے کہا کہ وکلاء برادری لوگوں کو انصاف کی فراہمی اور قانون کی بالادستی میں کلیدی کردار ادا کرتی ہے۔ انہوں نے امید ظاہر کی کہ نئی کابینہ وکلاء کی فلاح و بہبود اور قانون کی عمل داری کے لیے موثر کردار ادا کرے گی۔انہوں نے مزید کہا کہ رول آف لاء اور عوام کو فوری اور سستے انصاف کی فراہمی پاکستان تحریک انصاف کے منشور کا اہم حصہ ہے۔ صوبے میں وکلاء برادری کے جائز مسائل کو ترجیحی بنیادوں پر حل کیا جائے گا۔ سخت سیاسی اور قانونی حالات میں پارٹی کا بھرپور ساتھ دینے پر ہم انصاف لائرز فورم کو خراجِ تحسین پیش کرتے ہیں۔تقریب میں خیبر بار ایسوسی ایشن کے عہدیداران، وکلاء کی بڑی تعداد اور پارٹی رہنما بھی موجود تھے۔