خیبر پختونخوا کے وزیر برائے پبلک ہیلتھ انجینئرنگ فضل شکور خان کی زیر صدارت ضلع چارسدہ میں پختونخوا انرجی ڈویلپمنٹ آرگنائزیشن (پیڈو) کے تحت مساجد اور مدارس کی سولرائزیشن کے جاری اور نئے منصوبوں سے متعلق ایک اہم اجلاس بدھ کے روز پشاور میں منعقد ہوا

خیبر پختونخوا کے وزیر برائے پبلک ہیلتھ انجینئرنگ فضل شکور خان کی زیر صدارت ضلع چارسدہ میں پختونخوا انرجی ڈویلپمنٹ آرگنائزیشن (پیڈو) کے تحت مساجد اور مدارس کی سولرائزیشن کے جاری اور نئے منصوبوں سے متعلق ایک اہم اجلاس بدھ کے روز پشاور میں منعقد ہوا۔ اجلاس میں پیڈو کے پراجیکٹ ڈائریکٹر سمیت متعلقہ حکام نے شرکت کی۔اجلاس کو بریفنگ دیتے ہوئے پراجیکٹ ڈائریکٹر نے بتایا کہ ضلع چارسدہ میں پہلے مرحلے میں جن مساجد اور مدارس کو شمسی توانائی کے نظام پر منتقل کرنے کے منصوبے شامل تھے جنہیں مکمل کر لیا گیا ہے۔ مزید بتایا گیا کہ پچھلی حکومت کے دوران رہ جانے والے پراجیکٹس میں سے 10کو بہت جلد مکمل کر لیا جائے گا۔پراجیکٹ ڈائریکٹر نے صوبائی وزیر کو آگاہ کیا کہ ضلع چارسدہ کے لیے نئے پراجیکٹس میں 30 مساجد اور 10 مدارس کی سولرائزیشن کی منظوری دے دی گئی ہے، جن کی تکمیل کے لیے صرف کنٹریکٹر کی ہائرنگ باقی ہے۔ بریفنگ میں یہ بھی بتایا گیا کہ ضلع چارسدہ میں سرکاری اور نجی یتیم خانوں کی سولرائزیشن کا منصوبہ بھی پائپ لائن میں ہے۔ نئے پراجیکٹ کے تحت محکمہ سماجی بہبود کے ساتھ رجسٹرڈ نجی یتیم خانوں کو بھی شمسی توانائی کے نظام پر منتقل کیا جائے گا۔اجلاس کو مزید بتایا گیا کہ ضلع میں محکمہ سماجی بہبود کے زیر انتظام چلنے والے لنگر خانے، سرکاری کالجز، سکولز، بی ایچ یوز اور ہسپتالوں کی سولرائزیشن بھی نئے منصوبے کا حصہ ہیں، جنہیں مرحلہ وار مکمل کیا جائے گا۔صوبائی وزیر فضل شکور خان نے متعلقہ حکام کو ہدایت جاری کی کہ ضلع چارسدہ میں مساجد اور مدارس کو شمسی توانائی کے نظام پر منتقل کرنے سے متعلق پیڈو کے تمام منصوبوں کو جلد از جلد پایہ تکمیل تک پہنچایا جائے۔ انہوں نے کہا کہ عوامی سہولت اور توانائی کے متبادل ذرائع کے فروغ کے لیے سولرائزیشن پروگرام انتہائی اہمیت کا حامل ہے، اس لیے تمام منصوبوں کی بروقت اور معیاری تکمیل ہر صورت یقینی بنائی جائے۔