خیبرپختونخوا معیشت کو بہتر بنانے کیلئے جدید سائنسی تکنیکی طریقے استعمال میں لاکر ماربل سیکٹر سے مالی فوائد حاصل کر سکتا ہے، صوبائی وزیر خوراک ظاہر شاہ طورو کا خطاب

خیبرپختونخوا کے وزیر برائے خوراک ظاہر شاہ طورو نے کہا کہ معیشت کو بہتر بنانے کیلئے جدید سائنسی تکنیکی طریقے استعمال میں لاکر خیبر پختونخوا ماربل سیکٹر سے مالی فوائد حاصل کیئے جا سکتے ہیں اور اس سلسلے میں سائنسدانوں، انجینئرز، اور صنعت کاروں کے درمیان تعاون انتہائی اہمیت کا حامل اور وقت کی اہم ضرورت ہے ان خیالات کا اظہار انہوں نے پاکستان کونسل آف سائنٹیفک اینڈ انڈسٹریل ریسرچ (پی سی ایس آئی آر) لیبارٹریز کمپلیکس کے زیر اہتمام پشاور میں ڈائمینشن اسٹونز سمٹ: یونائیٹنگ فار نالج بیسڈ اکانومی کے عنوان پر منعقدہ ایک روزہ سمینار سے خطاب کرتے ہوئے کیا تقریب سے خطاب کرتے ہوئے صوبائی وزیر نے کہا کہ خیبرپختونخوا قدرتی وسائل سے مالامال ہے لیکن ضرورت اس امر کی ہے کہ اس سے پوری طرح استعفادہ حاصل کرنے کے لئے جدید تکنیکی مشینوں کا استعمال کیا جائے انہوں نے کہا کہ جدید سائنسی مشینوں سے صوبے کے وسیع ماربل وسائل کی ویلیو ایڈیشن کرکے صوبے کی معیشت کی ترقی میں بروئے کار لایا جا سکتاہے۔اس موقع پر صوبائی وزیر نے پی سی ایس آئی آر لیبارٹریز کمپلیکس پشاور کی ماربل انڈسٹری کو فروغ دینے کی کوششوں کو سراہا اور صوبے کی اقتصادی ترقی کے لئے تعاون کی ضرورت پر زور دیا۔تقریب سے خطاب کرتے ہوئے پی سی ایس آئی آر لیبارٹریز کمپلیکس پشاور کے ڈائریکٹر جنرل جہانگیر شاہ نے پی سی ایس آئی آر ڈائمینشن اسٹونز سینٹر کی کامیابیوں کو اجاگر کیا، جو جدید ترین ماربل کٹنگ اور پالشنگ مشینری سے لیس ہے۔ انہوں نے بتایا کہ یہ مرکز نیشنل ووکیشنل اینڈ ٹیکنیکل ٹریننگ کمیشن (NAVTTC)، HOPE-87، کے پی ٹیکنیکل ایجوکیشن اینڈ ووکیشنل ٹریننگ اتھارٹی (TEVTA)، کے پی انڈسٹریز اینڈ ٹیکنیکل ایجوکیشن، سرحد رورل سپورٹ پروگرام اور دیگر تنظیموں کے تعاون سے ہیومن ریسورس کی تربیت فراہم کر رہا ہے۔ ڈی جی نے مزید کہا کہ ان پروگراموں کا مقصد تربیت یافتہ افراد کو ماربل اور موزیک کے کام میں جدید تکنیکوں سے آراستہ کرنا ہے، جس کی مدد سے وہ ایسے مصنوعات تیار کر سکیں گے جو برآمد کے قابل ہوں گی اور مالی فوائد حاصل کرنے کے قابل ہوں گے۔سمینار سے خطاب کرنے والوں میں سرحد چیمبر آف کامرس اینڈ انڈسٹری کے صدر فواد اسحاق،چیئرمین اے پی ایم آئی ایاصغر خان اتمان خیل،،ڈی جی مائنز اینڈ منرلز کے پی یعقوب نواز،، KPEZDMC کے نمائندے اور پروفیسر ڈاکٹر یاسین اقبال یوسفزئی شامل تھے۔ ان سب نے عالمی مارکیٹ میں ماربل سیکٹر کی مسابقت کو بڑھانے کے لئے مہارتوں کی اپ گریڈنگ اور دوبارہ تربیت کی ضرورت پر زور دیا۔واضح رہے کہ سمینار میں ماربل انڈسٹری، تعلیمی اداروں اور حکومت کے ماہرین نے شرکت کی تاکہ خیبر پختونخوا میں ماربل سیکٹر کو فروغ دینے کی حکمت عملیوں پر تبادلہ خیال کیا جا سکے۔ برین اسٹارمنگ سیشن کے دوران، شرکاء نے اختراعات، ویلیو ایڈیشن اور برآمدات میں اضافے کے مواقع تلاش کیے۔تقریب کا اختتام اس عزم کے ساتھ ہوا کہ اسٹیک ہولڈرز کے درمیان شراکت داری کو فروغ دے کر خیبر پختونخوا میں ماربل انڈسٹری کی صلاحیت کو اجاگر کرکے صوبے کی معیشت کو بہتر کیا جا سکے۔

وزیر اعلی خیبر پختونخوا کے مشیر برائے کھیل اور امور نوجوانان سید فخر جہان نے کہا ہے کہ حالیہ انڈر 23 انٹر ریجنل گیمز میں خواتین کھلاڑیوں کی مختلف کھیلوں میں کارکردگی شاندار رہی۔انھوں نے کہا اس طرح کے کھیلوں کا یہ تسلسل آئندہ بھی جاری رہے گا۔ انٹر پراونشل گیمز بھی منعقد کئے جائیں گے اور انڈر 16 کا ٹیلنٹ ہنٹ بھی منعقد کیا جائے گا۔ان خیالات کا اظہار انھوں نے منگل کے روز پشاور کے مقامی ہوٹل میں حالیہ خیبر پختونخوا انڈر 23 انٹر ریجنل گیمز میں حصہ لینے والی پشاور ریجن کی خواتین کھلاڑیوں کے اعزاز میں تقسیم اعزازات اور ظہرانے کی منعقدہ تقریب سے بطور مہمان خصوصی خطاب کے دوران کیا۔تقریب میں سیکریٹری کھیل مطیع اللہ،ایڈیشنل ڈی جی سپورٹس رشیدہ غزنوی، ڈائریکٹر آپریشن عزیز اللہ خان،ریجنل اسپورٹس آفیسر پشاور اور ریجن کے ڈسٹرکٹ سپورٹس آفیسرز کے علاؤہ مزکورہ ایونٹ میں حصہ لینے والی خواتین کھلاڑیوں اور بچیوں نے شرکت کی۔تقریب میں مشیر کھیل نے مذکورہ ایونٹ میں خواتین کھلاڑیوں کی بہترین کارکردگی کو سراہا اور انھیں ایوارڈز سے نوازا۔منعقدہ تقریب سے اظہار خیال کرتے ہوئے مشیر کھیل نے انڈر 23 گیمز میں نمایاں کارکردگی کا مظاہرہ کرنے والی فیمیل کھلاڑیوں کو انکی کامیابی پر مبارکباد پیش کرتے ہوئے کہا کہ ریجن کی فیمیل کھلاڑیوں نے شاندار کارکردگی کا مظاہرہ پیش کیا ہے جو انکے لئے آگے کے ایونٹس کے انتخاب کیلئے ایک اچھا موقع ہے۔انھوں نے انڈر 23 کی کھلاڑیوں کے مستقبل میں اسی کارکردگی کو جاری رکھنے کیلئے نیک خواہشات کا اظہار کیا اور انھیں ہدایت کی کہ وہ ایک نئے جذبے کیساتھ آئندہ کیلئے بھی بہترین کھیل پیش کرے تاکہ وہ مزید کامیابیاں سمیٹ سکیں۔

خیبرپختونخوا کے وزیر برائے جنگلات، ماحولیات، موسمیاتی تبدیلی و جنگلی حیات فضل حکیم خان یوسفزئی کی زیر صدارت ایک اجلاس چیف کنزرویٹر آف فاریسٹ سینٹرل اینڈ سدرن ریجن-I پشاور میں منعقد ہوا۔ اجلاس میں سیکرٹری جنگلات و ماحولیات، چیف کنزرویٹر جنگلات اور چیف کنزرویٹر وائلڈ لائف خیبر پختونخوا نے شرکت کی۔ صوبے کے جنگلات اور جنگلی حیات کے وسائل کے موثر تحفظ اور ترقی کو یقینی بنانے کے لیے صوبائی وزیر جنگلات و ماحولیات کے دفتر میں ایک شکایت سیل قائم کیا گیا صوبائی وزیر فضل حکیم خان یوسفزئی نے کہا ہے کہ جنگلات کی غیر قانونی کٹائی کرنے والوں کے خلاف سخت سے سخت قانونی کاروائی ہوگی اور معافی کی کوئی گنجائش نہیں ہوگی انہوں نے کہا کہ قائد عمران خان کے ویژن کے مطابق خیبرپختونخوا صوبے کو آگے لے کر جائیں گے اور جنگلات کی تحفظ کو یقینی بنانے کیلئے مزید اقدامات جاری ہیں جبکہ جنگلات کی کٹائی، جنگلات، ماحولیات اور جنگلی حیات کی ترقیاتی اور غیر ترقیاتی سرگرمیوں کی موثر نگرانی کے لیے سیکرٹری جنگلات و ماحولیات کے دفتر میں ایک مانیٹرنگ سیل قائم کیا گیا ہے۔ اجلاس میں یہ بھی فیصلہ کیا گیا کہ محکمے کے موجودہ مانیٹرنگ اور رپورٹنگ کے نظام کو مضبوط بنایا جائے گا۔ شکایات کے لیے رابطہ موبائل نمبر 03333444616: محمد اکرم پی اے وزیر برائے موسمیاتی تبدیلی، جنگلات، ماحولیات اور جنگلی حیات خیبر پختونخواہے۔

ضلع دیر سے ایک نمائندہ وفد نے جرگے کی شکل میں وزیر اعلیٰ کے معاون خصوصی برائے بہبود آبادی ملک لیاقت علی خان سے ان کے دفتر سول سیکریٹریٹ پشاور میں ملاقات کی۔وفد میں دیر کے مشران، نوجوانوں وکلا، علماء کرام، قومی مشران، مدرسین، یونیورسٹی پروفیسرز، میڈیا پرسنز، سوشل ورکرز، شعرا، ادباء، سیاسی اور سماجی رہنما جس میں، پی ٹی ائی، پیپلز پارٹی، جماعت اسلامی، مسلم لیگ ن، جے یو آئی، اور اے این پی کے رہنما شامل تھے۔اس ملاقات میں ضلع دیر کے مختلف مسائل اور ان کے حل کے لیے مستقبل کے لائحہ عمل پر تفصیلی گفتگو کی گئی۔وفد نے ضلع دیر میں درپیش شکایات اور تجاویز معاون خصوصی ملک لیاقت علی خان کے سامنے رکھیں۔ وفد نے بتایا کہ ضلع دیر کے عوام کو مختلف مسائل کا سامنا ہے، جن میں بنیادی سہولیات کی کمی، صحت اور تعلیم کے شعبے میں درپیش چیلنجز، اور انفراسٹرکچر کی بہتری شامل ہیں۔ وفد نے اس بات پر زور دیا کہ ان مسائل کے حل کے لیے فوری اور مؤثر اقدامات کی ضرورت ہے۔معاون خصوصی ملک لیاقت علی خان نے وفد کی شکایات اور تجاویز کو غور سے سنا اور یقین دلایا کہ ضلع دیر میں سہولیات کی باہم فراہمی حکومت کی اولین ترجیحات میں شامل ہے۔ انہوں نے کہا کہ حکومت ضلع دیر کے مسائل کے حل کے لیے سنجیدہ اقدامات اٹھا رہی ہے اور عوام کی ہر ممکن وسائل بروئے کار لائے جائیں گے۔ملک لیاقت علی خان نے کہا کہ حکومت عوام کے مسائل سے آگاہ ہے اور ان کے حل کے لیے جامع حکمت عملی تیار کر رہی ہے۔ انہوں نے یقین دلایا کہ ضلع دیر کے مسائل کے حل کے لیے تمام متعلقہ محکموں کو ہدایات جاری کی گئی ہیں اور عوام کو بہتر سہولیات کی فراہمی یقینی بنائی جائے گی۔ملاقات کے دوران وفد نے بعض منصوبوں کی تفصیلات بھی پیش کیں جنہیں معاون خصوصی نے سراہا اور کہا کہ ان منصوبوں کو بروقت اور مؤثر طریقے سے مکمل کرنے کے لیے حکومت کی مکمل حمایت حاصل ہوگی۔ انہوں نے اس بات پر زور دیا کہ حکومت اور عوام کے درمیان بہتر رابطے اور تعاون سے ہی ترقی اور خوشحالی ممکن ہے۔معاون خصوصی ملک لیاقت علی خان نے وفد کا شکریہ ادا کیا اور کہا کہ حکومت عوام کی خدمت کے لیے ہمیشہ تیار ہے۔

خیبر پختونخوا کے وزیر برائے بلدیات ارشد ایوب خان نے ہدایت کی ہے کہ عید الاضحی کے موقع پر عوام کو بہترین صفائی کی سہولیات فراہم کی جائیں۔ ڈبلیو ایس ایس پیز نے عید الاضحی کی صفائی مہم کے پلان کو حتمی شکل دے دی ہے، اس پر سختی سے عمل درآمد کیا جائے۔ان خیالات کا اظہار انہوں نے عید الاضحی کے موقع پر صحت و صفائی سے متعلق ایک جائزہ اجلاس کی صدارت کرتے ہوئے کیا۔ اس موقع پر صوبائی وزیر برائے قانون آفتاب عالم آفریدی، اراکین صوبائی اسمبلی شفیع جان اور داؤد افریدی کے علاوہ سیکرٹری لوکل گورنمنٹ داؤد خان بھی موجود تھے۔صوبائی وزیر نے کہا کہ عید الاضحی کے موقع پر بھر اقدامات کے ساتھ بہترین انتظامات کئے جائیں۔اگر ہم عوام کو مناسب خدمات دیں گے تو تب ہی وہ خوشی سے بدلے میں سروس فیس دیں گے لیکن اگر بہتر صفائی اور خدمات فراہم نہیں کرتے تو وہ ہمیں خدمات کی فیس دینے کو تیار نہیں ہوں گے۔ انہوں نے کہا کہ کوہاٹ میں 64 ٹیوب ویلز میں سے 34 ٹیوب ویلوں کی سولرائزیشن عید کے بعد ایک ماہ کے اندر اندر مکمل کر دی جائے گی۔ تمام صوبے کے ٹیوب ویلز کو سولرائزیشن کی طرف منتقل کیا جا رہا ہے تاکہ بجلی کا بل حکومت پر بوجھ نہ بنے۔ ارشد ایوب نے کہا کہ خیبر پختونخوا سٹیزن امپروومنٹ پروجیکٹ، کوہاٹ میں وومن بزنس ڈیویلپمنٹ کمیونٹی سینٹر اور سپورٹس کمپلیکس بنائے جا رہے ہیں جنہیں اس سال کے آخر تک مکمل کر لیا جائے گا۔

خیبر پختونخوا کے وزیر تعلیم فیصل خان ترکئی نے کہا ہے کہ ایلیمنٹری اینڈ سیکنڈری ایجوکیشن فاؤنڈیشن کا پروگرام پوھہ دور جدید کے تقاضوں سے ہم آہنگ ہے اور پروگرام کے بہترین نتائج آرہے ہیں۔ طلباء و اساتذہ کی آن لائن حاضری، آن لائن کلاسز اور تدریس کا سارا عمل ڈیجیٹائزڈ ہے طلبہ کو آن لائن لیکچرز تک رسائی ہے اور امتحانی نظام بھی آن لائن ہے۔ انہوں نے فاؤنڈیشن حکام کو ہدایت کی کہ اس پروگرام کو تمام اضلاع تک توسیع دی جائے اورطلباء و طالبات کی آسانی کے لئے سسٹم میں مزید اصلاحات متعارف کی جائیں۔ یہ ہدایات انہوں نے ایلیمنٹری اینڈ سیکنڈری ایجوکیشن فاؤنڈیشن کے جائزہ اجلاس کی صدارت کرتے وقت جاری کیں۔ اجلاس میں ایلیمنٹری اینڈ سیکنڈری ایجوکیشن فاؤنڈیشن کے مینجنگ ڈائریکٹر عطاء الرحمان، ڈپٹی مینجنگ ڈائریکٹر جاوید اقبال، ڈپٹی ڈائریکٹر،ای گورننس نور شیر آفریدی اور دیگر حکام نے شرکت کی۔ وزیر تعلیم نے مزید ہدایات کی کہ صوبے کے ہر ضلع میں پوہہ سنٹر کے قیام کے ساتھ ساتھ وہاں آف لائن سہولیات بھی فراہم کی جائیں تاکہ وہ علاقے جہاں پر انٹرنیٹ کے مسائل ہو ں وہاں آف لائن درس و تدریس کا عمل جاری رہے۔بریفنگ دیتے ہوئے وزیر تعلیم کو بتایا گیا کہ فاؤنڈیشن کے کل 2 لاکھ 76ہزار 900 طلباء و طالبات اور 3576 سینٹرز ہیں جبکہ پانچ ہزار 705 تدریسی عملہ ہے ایجوکیشن سپورٹ پروگرام میں 55 پارٹنر سکول اور کل 7191 طلباء و طالبات کو داخلہ دیا گیا ہے۔ انہیں بتایا گیا کہ نئے سکول پروگرام کے تحت پرائمری لیول پر 10 ہزار، مڈل لیول پر 1500 ہائی لیول پر 2500 اور ہائڈر سیکنڈری لیول پر 3500 روپے فی طالب علم فیس پارٹنر سکولوں کو دی جاتی ہے۔ اسی طرح گرلز کمیونٹی سکولز، ایجوکیشن سینٹرز، این سی ایچ ڈی ایجوکیشن سینٹرز اور دیگر پروگراموں میں لاکھوں طلبہ و طالبات پڑھ رہے ہیں۔ وزیر تعلیم فیصل خان ترکئی نے کہا کہ ہماری اولین ترجیح طلبہ و طالبات کو مفت معیاری تعلیم کی فراہمی ہے انہوں نے کہا کہ بندوبستی اضلاع کے سکولوں سے باہر طلبہ کے لیے عملی اقدامات کئے جائیں اور ایک جامع پروپوزل اگلے اجلاس میں انہیں پیش کی جائے۔ انہوں نے کہا کہ ایک ایس ایف کے اساتذہ کی تنخواہوں کے مسائل حل ہو رہے ہیں اور ہماری کوشش ہوگی کہ بقایا جات بھی جلد از جلد ریلیز کر دیئے جائیں۔ اسی طرح اساتذہ کو کم سے کم اجرت کے مطابق تنخواہوں کے اجراء کے لئے بھی اقدامات کر رہے ہیں وزیر تعلیم نے مزید کہا کہ فاؤنڈیشن کی امسال داخلہ مہم قابل تعریف ہے اور کوشش کرہے کہ مزید طلبہ کو بھی مختلف پروگراموں میں داخل کروایا جا سکے۔

غیر قانونی عمل میں ملوث افراد کے خلاف سخت کارروائی کی جائے گی،صوبائی وزیر بہبود آبادی

معاون خصوصی برائے بہبود آبادی ملک لیاقت علی خان کا پیپل منڈی پشاور مارکیٹ کا دورہ، سرکاری مانع حمل ادویات کی غیر قانونی فروخت پر برہمی کا اظہار

عوام کی جانب سے سرکاری ادویات اور مانع حمل اشیاء مارکیٹ میں فروخت ہونے کی شکایت پر جائزہ لینے کے لیے وزیر اعلیٰخیبر پختونخوا کے معاون خصوصی برائے بہبود آبادی ملک لیاقت علی خان نے پشاورمیں پیپل منڈی اور دیگر مارکیٹس کے دورے کئے۔ اس موقع پر متعلقہ حکام بھی ان کے ہمراہ تھے۔اچانک معائنوں کے دوران ملک لیاقت علی خان نے کاسمیٹکس کی دکانوں کا تفصیلی جائزہ بھی لیا۔ اس موقع پر بعض دکانوں سے تولیدی صحت کے لیے سرکاری طور پر فراہم کی جانے والی مفت مانع حمل ادویات وغیرہ بھی برآمد ہوئیں۔ معاون خصوصی نے مانع حمل سے متعلق سرکاری اشیاء کی مارکیٹ میں کھلے عام فروخت پر سخت برہمی کا اظہار کیا۔ملک لیاقت علی خان نے حکام کو ہدایت دی کہ ایسے دکانداروں کے خلاف سخت کارروائی عمل میں لائی جائے اور برآمد ہونے والی ادویات اور مواد کو سرکاری تحویل میں لیا جائے۔ انہوں نے واضح کیا کہ سرکاری ادویات اور مواد کی مارکیٹ میں فروخت کی اجازت نہیں ہے اور اس غیر قانونی عمل میں ملوث افراد کے خلاف سخت کارروائی کی جائے گی۔ اس موقع پر بعض دکانوں سے برآمد ہونے والی سرکاری مانع حمل سے متعلق ادویات اور اشیاء کو تحویل میں لے کر ملوث دکانداروں کو پولیس کے حوالے بھی کیا گیا ہے۔

خیبر پختونخوا کے وزیر تعلیم فیصل خان ترکئی نے کہا ہے کہ پورے صوبے اور خصوصاََ ضم اصلاع میں خواتین کی شرح خواندگی بڑھانے اور ان کو تعلیمی سہولیات کی فراہمی کے لیئے انقلابی اقدامات کر رہے ہیں۔ انہوں نے کہا کہ ضم اضلاع میں تعلیمی سہولیات کی بروقت فراہمی کے لیئے صوبائی محکمہ تعلیم نے کئی اہم منصوبے شروع کر رکھے ہیں جن کی تکمیل سے ضم اضلاع میں شرح خواندگی میں اضافہ ہو سکے گا۔ انہوں نے کہا کہ فوری طور پر سکولوں سے باہر طلباء کو سکولوں میں لانے اور ڈراپ آؤٹ ریشو کو کنٹرول کرنے کے لیئے مرجڈ ایریاز ایجوکیشن فاؤنڈیشن کے تحت کمیونٹی بیسڈ ایجوکیشن سینٹرز سباؤن سکولز پروگرام اور مڈل سکول پروگرام شروع کر رہے ہیں جس کے تحت فوری طور پر کم لاگت اور ہنگامی صورتحال کے پیش نظر سکول قائم کیے جائیں گے۔ ان خیالات کا اظہار انہوں نے مرجڈ ایریاز ایجوکیشن فاؤنڈیشن کے بریفنگ لیتے وقت کیا۔ بریفنگ اجلاس میں مینیجنگ ڈائریکٹر مرجڈ ایریاز ایجوکیشن فاؤنڈیشن میاں عین اللہ، ایڈیشنل سیکرٹری محکمہ تعلیم عبدالاکرم، ڈپٹی مینجنگ ڈائریکٹر مرجڈ ایریاز ایجوکیشن فاؤنڈیشن ڈاکٹر شوکت حیات اور دیگر اعلیٰ حکام نے شرکت کی۔ مینجنگ ڈائریکٹر مرجڈ ایریاز ایجوکیشن فاؤنڈیشن میاں عین اللہ نے بریفنگ دیتے ہوئے فورم کو بتایا کہ ہمارے کل 207 کمیونٹی بیسڈ ایجوکیشن سینٹر ہیں جن میں 17625 طلباء و طالبات ہیں کل 267 اساتذہ اور 267 سیکیورٹی گارڈز ان سینٹرز میں خدمات سرانجام دے رہے ہیں۔ کمیونٹی بیسڈ سکولوں کی تعداد 337 ہے کل 639 اساتذہ ہیں اور طلبہ کی تعداد 27 ہزار 293 ہیں۔ فاؤنڈیشن کے نئے پروگرام سبان کے تحت کل 25 سکولزضم اضلاع اور قبائلی سب ڈویژنز میں قائم کیے جائیں گے۔ اس پبلک پرائیویٹ پارٹنرشپ پروگرام کے تحت گریڈ ایک سے گریڈ پانچ تک فی طالب علم ایک ہزار روپے جبکہ چھٹی گریڈ سے اٹھویں گریڈ تک فی طالب علم 1500 روپے دیے جائیں گے۔ اس کے علاوہ اساتذہ کی تربیت کے پروگرام میں 1538 اساتذہ کو تربیت دی گئی ہے اور 80 ماسٹر ٹرینرز کو بھی تربیت فراہم کی گئی ہے۔ اسی طرح نئے منصوبوں میں مڈل کمیونٹی بیسڈ سکول منصوبہ بھی شامل ہے جس کے تحت 25 مڈل سکول قائم کیے جائیں گے وزیر تعلیم کو بتایا گیا کہ قبائلی اضلاع میں شرحِ خواندگی کم ہے اور فاؤنڈیشن تعلیمی شرح بڑھانے اور معیاری تعلیم کی فراہمی کے لیے شبانہ روز محنت کر رہی ہے جبکہ ابھی بھی تقریبا ایک ملین بچے قبائلی اضلاع میں تعلیمی سہولیات سے محروم ہیں۔ وزیر تعلیم فیصل خان ترکئی نے کہا کہ فاؤنڈیشن کی ہر ممکن مدد کی جائے گی۔ اور ضمن میں محکمہ تعلیم کے نئے منصوبوں کے علاوہ ڈونرز کو بھی دعوت دی جائے گی تاکہ قبائلی اضلاع میں شرحِ خواندگی بڑھانے کے لیے نئے منصوبے شروع کئے جا سکیں۔ انہوں نے مرجڈ ایریاز ایجوکیشن فاؤنڈیشن کے جاری اور نئے منصوبوں کی تعریف کرتے ہوئے کہا کہ فاؤنڈیشن محدود وسائل میں بہترین کام کر رہا ہے۔ اور ان کے بورڈ اف ڈائریکٹرز، فاؤنڈیشن ایکٹ، ملازمین کے جملہ مسائل اور پروموشن کمیٹیز بمع دیگر چیلنجز پر قابو پانے کے لیے عملی اقدامات کیے جائیں گے۔ اور بہت جلد فاؤنڈیشن کے مسائل حل کرنے کے لیے اگلا اجلاس طلب کیا جائے گا۔ وزیر تعلیم نے کہا کہ فاؤنڈیشن کے اساتذہ کی تنخواہوں کے لیے بھی وزارت خزانہ سے بات چیت کی جائے گی اور ہماری کوششوں سے سابقہ بقایا جات بھی اساتذہ کو مل چکے ہیں۔ تاہم ان اساتذہ کی سہولت کے لیے کم سے کم اجرت فارمولے کے تحت ان کی تنخواہیں بڑھانے کے لیئے بھی اقدامات کیے جائیں گے۔ انہوں نے ہدایت دی کہ نئے سکول میرٹ اور ضرورت کے تحت قائم کیے جائیں اور کوشش کریں کہ کوئی بھی بچہ تعلیم کی عظیم نعمت سے محروم نہ رہے۔