ادویات اور کارڈیک مانیٹرز کا عطیہ ممبر کینٹ بورڈ محمداُسید سیٹھی اور ایگزیکٹیو آفیسر کینٹ بورڈ پشاور کے درخواست پر فراہم کیا گیا۔ وزیر صحت کا اس موقع پر کہنا تھا کہ کینٹ بورڈ ہسپتال نوتھیہ، سواتی پھاٹک، گلبرگ، لال کرتی، کالا باڑی اور لنڈی ارباب سمیت دیگر ملحقہ علاقوں کے عوام کو صحت کی بہتر خدمات فراہم کررہا ہے۔ انہوں نے مزید بتایا کہ ان ادویات میں گولیاں، شربت وائل و دیگر ضروری ادویات شامل ہیں جبکہ امراض قلب میں مبتلا مریضوں کو فوری علاج کی فراہمی کیلئے کارڈیک مانیٹرز بھی فراہم کئے گئے ہیں۔ وزیر صحت سید قاسم علی شاہ نے یہ بھی بتایا کہ اس اقدام سے ملحقہ علاقوں کے عوام کو صحت کی بہترین سہولیات مہیا ہونگیں جبکہ ادویات کی بلا تعطل فراہمی بھی یقینی ہوگی۔ ادویات اور کارڈیک مانیٹرز کی فراہمی پر کینٹ بورڈ کے وائس پریزیڈنٹ ید اللّہ بنگش، ممبر محمد اسید سیٹھی، نعیم بخش، نعمان فاروق اور علی جان نے عوام کی جانب سے وزیر صحت کا شکریہ ادا کیا۔

وزیر اعلی خیبر پختونخوا کے معاون خصوصی برائے صنعت وحرفت اور فنی تعلیم عبدالکریم تورڈھیر نے پی کے 51 صوابی کے متعدد علاقوں میں صحت تعلیم اور آبنوشی منصوبوں کاباضابطہ افتتاح کیا۔انھوں نے اس سلسلے میں حلقہ نیابت کے بنیادی مراکز صحت مانکی میں واقع زچہ بچہ لیبر روم،واٹر سپلائی سکیم،اندرونی سڑکوں اور کئی دیگر سہولیات کے اجتماعی ترقیاتی منصوبوں کا افتتاح کیا۔معاون خصوصی نے نبی کلے میں گورنمنٹ گرلز مڈل سکول کو اپگریڈ کرکے اسے گرلز ہائی سکول کا درجہ دینے کے ترقیاتی منصوبے کا سنگ بنیاد بھی رکھا۔اسی طرح انھوں نے نبی کلے میں ایک ٹیوب ویل واٹر سپلائی سکیم کے ترقیاتی سکیم کا بھی افتتاح کیا۔اس موقع پر متعلقہ محکموں کے افسران،علاقہ عمائدین اور پارٹی کے کارکنان بھی موجود تھے۔افتتاحی تقریبات سے خطاب کے دوران معاون خصوصی کا کہنا تھا کہ حکومت کی یہ اولین کوشش ہے کہ عوام کے دیرینہ مسائل و مشکلات کا خاتمہ ہو کر انھیں ہر شعبے میں سہولیات فراہم کیئے جا سکیں۔انھوں نے کہا کہ صوبائی حکومت کی ترجیحی نظر صحت کے نظام کی بہتری اور قوم کے بچوں کو معیاری تعلیمی سہولیات کی فراہمی کے دونوں اہم اور بنیادی شعبوں پر مرکوز ہے۔ صحت کے شعبے میں صحت سہولت کارڈ کا اجراء ہماری حکومت اور پارٹی چیرمین کے وژن کا عکاس وہ شاندار منصوبہ ہے جس کو عالمی سطح پر پزیرائی مل رہی ہے اور اسکے ذریعے لاکھوں کی تعداد میں غریب عوام کو مفت علاج معالجے کی سہولیات فراہم ہو رہے ہیں۔انھوں نے کہا کہ حکومت سرکاری تعلیمی اداروں کے معیار کی بلندی پر بھی خاص توجہ دے رہی ہے تاکہ عوام کو سرکاری سطح میں ہر علاقے میں تعلیمی اداروں کی دستیابی ممکن بنائی جا سکیں۔انھوں نے اس موقع پر کہا کہ نبی کلے زنانہ سکول کی اپگریڈیشن سے اپنے ہی علاقے میں قوم کی بچیوں کو میٹرک تک تعلیم کا حصول ممکن ہو سکے گا۔معاون خصوصی نے مزید کہا کہ اگر چہ موجودہ حالات میں مالی مشکلات موجود ہیں تاہم صوبائی حکومت کی یہ کوشش ہے کہ وہ ممکنہ حد تک اپنی استعداد کے مطابق عوام کیلئے ترقیاتی منصوبے لائے اور انھیں اہم معاشرتی شعبوں میں ریلیف اور سہولت فراہم کی جا ئے۔معاون خصوصی کا کہنا تھا کہ وہ حلقے کے عوام کی خدمت کیلئے اپنی جانب سے ہر ممکن قدم اٹھائیں گے۔

خیبر پختونخواکے وزیر لائیو سٹاک امداد باہمی اور ماہی پروری فضل حکیم خان یوسفزئی نے متعلقہ افسران کو ہدایت کی ہے کہ وہ کوآپریٹو بینک اور شعبہ امداد باہمی کو عوامی ضرورتوں کے مطابق ان کے مسائل کے حل کے لیے حقیقی معنوں میں مزید بحال بنانے کے لیے تمام تراقدامات اٹھائیں اور اس حوالے سے درپیش رکاوٹوں اور مسائل کو ان کے نوٹس میں لایا جائے تاکہ انہیں بروقت دور کیا جا سکے۔ ان خیالات کا اظہار انہوں نے پیر کے روز پشاور میں محکمہ امداد باہمی کے حوالے سے منقدہ اجلاس کی صدارت کرتے ہوئے کیا۔ اس موقع پر رجسٹرار کوآپریٹو محمد اسحاق اور دیگر افسران بھی موجود تھے اجلاس میں محکمہ امداد باہمی کے مختلف امور خاص کر کوآپریٹ بینک کوفعال بنانے اور مختلف سوسائٹیوں کی ترقی پر تفصیلی غور و خوض کیا گیا۔اجلاس سے خطاب کرتے ہوئے صوبائی وزیر نے محکمہ کے مسائل کو بروقت حل کرنے متعلقہ عملہ کی حاضری کو یقینی بنانے کے ساتھ امداد بامی کے ضلعی دفاتر کے ساتھ روابط مضبوط کرنے کی ہدایت کی۔ انہوں نے کہا کہ وہ عوام کے نمائندہ ہونے کی حیثیت سے مسائل کو لوگوں کی امنگوں کے مطابق حل کرنے کے خواہاں ہیں اور محکمہ امداد باہمی کو دیگر صوبوں سے بھی زیادہ فعال دیکھنا چاہتے ہیں انہوں نے کہا کہ محکم امداد باہمی کے حوالے سے ایڈیشنل چیف سیکرٹری کی سربراہی میں بنائی گئی کمیٹی کے اراکین سے کمیٹی کی سفارشات جلد بھیجنے کے لیے بھی اقدامات اٹھائے جائیں تاکہ اس حوالے سے جلد پالیسی کو ترتیب دے کر صوبائی کابینہ کو منظوری کے لیے بھیجا جا سکے۔ قبل ازیں صوبائی وزیر کو محکمہ امداد باہمی کے بارے میں تفصیلی بریفنگ دی گئی۔

> صوبائی حکومت کے ”عوامی ایجنڈا پروگرام” کے تحت عوام کے بہتر مفاد کے تمام منصوبوں پر کام تیز کیا جائے، ظاہر شاہ طورو کی متعلقہ حکام کو ہدایت

خیبر پختونخوا کے وزیر خوراک ظاہر شاہ طورو نے ہدایت دی اور کہا کہ عمران خان کے وژن کیمطابق اور وزیر اعلیٰ خیبر پختونخوا علی امین گنڈا پور کی ہدایت پر ”عوامی ایجنڈا پروگرام”کے تحت مردان میں تمام منصوبوں کو مقررہ مدت کے اندر شفافیت کے ساتھ مکمل کیا جائے اوراس سلسلے میں کسی قسم کی کوتاہی برداشت نہیں کی جائے گی، یہ ہدایات انہوں گزشتہ روز ڈپٹی کمشنر مردان کے دفتر میں عوامی ایجنڈا پروگرام کے تحت ضلع مردان میں جاری منصوبوں پر پیش رفت بارے جائزہ اجلاس کی صدارت کرتے ہوئے دی۔ اجلاس میں ممبران صوبائی اسمبلی و ڈیڈک چیئرمین زرشاد خان، امیر فرزند خان اور عبدالسلام آفریدی سمیت ڈپٹی کمشنر میاں بہزاد عادل اور دیگر متعلقہ حکام نے شرکت کی۔اجلاس کو ڈپٹی کمشنر مردان نے عوامی ایجنڈا پروگرام کے تحت جاری منصوبوں پر تفصیلی بریفنگ دی۔ بریفنگ کے دوران بتایا گیا کہ ضلع مردان میں مختلف منصوبوں پر تیزی سے کام جاری ہے، جن میں ہسپتالوں اور تدریسی اداروں کی صفائی، پبلک پارکس کی تزئین و آرائش، سپورٹس گراؤنڈز کی بحالی، غیر قانونی بل بورڈز کی ہٹاؤ، تجاوزات کا خاتمہ اور ٹرانسپورٹ اڈوں کی صفائی جیسے اہم منصوبے شامل ہیں اور متعلقہ حکام ان منصوبوں کی مسلسل نگرانی کر رہے ہیں۔صوبائی وزیر خوراک نے اس موقع متعلقہ حکام کو سختی سے ہدایت دی کہ کوالٹی کنٹرول کی کڑی نگرانی، محصولات کی ڈیجیٹائزیشن، ضلعی انتظامیہ کی عوام کیلئے اوپن ڈور پالیسی، کھلی کچہریوں کے انعقاد، خواتین و خصوصی افراد اور اقلیتوں کے حقوق کی پاسداری، فائل ٹریکنگ سسٹم، درختوں کی ٹریمنگ، جنگلی پودوں کا خاتمہ، وال چاکنگ، گندگی کو ٹھکانے لگانا اور بجلی کے پرانے تاروں کو ہٹانا جیسے منصوبوں پر خصوصی توجہ دی جائے اور انکی بروقت تکمیل یقینی بناکر عوامی مفادات کے پیش نظر کام کی رفتار مزید تیز کی جائے تاکہ عوام کو جلد از جلد ان منصوبوں کے ثمرات حاصل ہو سکیں۔

> ضم شدہ قبائلی اور صوبے کے دوردراز پسماندہ اضلاع میں تعلیم اور صحت کی سہولیات دینا صوبائی حکومت کی ترجیح ہے،مینا خان آفریدی

صوبائی وزیربرائے اعلیٰ تعلیم مینا خان آفریدی نے کہاہے کہ ضم شدہ قبائلی اور صوبے کے دوردراز پسماندہ اضلاع میں خیبرمیڈیکل یونیورسٹی(کے ایم یو) کے زیر انتظام الائیڈ ہیلتھ انسٹی ٹیوٹس کے قیام کا مقصد ان اضلاع میں عوام کوتعلیم اور صحت کی سہولیات ان کی دہلیز پر فراہم کرناہے،تعلیم اور صحت کی سہولیات کی فراہمی موجو دہ صوبائی حکومت کی اولین ترجیح ہے اس ضمن میں متعدد اقدامات اٹھائے جارہے ہیں جن میں ایک اہم قدم ہیلتھ انسٹی ٹیوٹس کاقیام ہے۔انہوں نے ان خیالات کااظہار اس ضمن میں ہونے والے متعدد اجلاسوں کی صدارت کرتے ہوئے کیاہے جب کہ اس حوالے سے ایک اہم اجلاس گزشتہ روز منعقد ہواجس میں وائس چانسلرکے ایم یوپروفیسر ڈاکٹر ضیاء الحق کے علاوہ ہائیر ایجوکیشن ڈیپارٹمنٹ اور کے ایم یو کے متعلقہ عملینے بھی شرکت کی۔ صوبائی وزیربرائے اعلیٰ تعلیم مینا خان آفریدی نے کہاکہ اس اہم منصوبے کو عملی جامہ پہنانے سے نوجوانوں کو ان کی دہلیز پرطبی تعلیم کے بہترین مواقع فراہم ہوں گے۔انہوں نے کہا کہ ڈی آئی خان،کرک اورچترال کے علاوہ ضم شدہ تمام قبائلی اضلاع میں معیاری ہیلتھ انسٹی ٹیوٹس کاقیام ہمارا مشن ہے اور اس سلسلے میں کے ایم یو کوتمام ضروری سہولیات فراہم کی جائیں گی۔ واضح رہے کہ مجوزہ اداروں کے قیام کے لیئے کے ایم یو کی ٹیم، صوبائی وزیر ہائر ایجوکیشن کی ہدایت پرڈی آئی خان،کرک، باجو ڑ اورمہمند اضلاع کا دورہ کرچکی ہے جب کہ ان انسٹی ٹیوٹس کو جدید صحت کی دیکھ بھال کی تعلیم، طبی خدمات اور تربیت کے مراکز کے طور پر کام کرنے کے لیے ڈیزائن کیا گیا ہے جس سے صحت کی دیکھ بھال کے پیشہ ور افراد کی فوری ضروریات کو پورا کرنے میں مدد ملے گی۔ اسی طرح ان ہیلتھ انسٹی ٹیوٹس کے قیام سے ذیابیطس، ہائی بلڈ پریشر، گیسٹرو اینٹرالوجی، فزیوتھراپی، نیوٹریشن،ریڈیالوجی اور لیبارٹری کی خدمات پر توجہ مرکوز کرنے والی کلینیکل خدمات بھی فراہم کی جائیں گی جو کے ایم یو کے مرکزی ہسپتال سے منسلک ہوں گے۔ اس پراجیکٹ کو عملی جامہ پہنانے میں محکمہ ہائیر ایجوکیشن خیبر میڈیکل یونیورسٹی پشاور کو بنیادی ڈھانچے سمیت تمام ضروری سہولت فراہم کرے گا۔ اس منصوبے کی نگرانی صوبائی وزیربرائے اعلیٰ تعلیم مینا خان آفریدی ہفتہ وار بنیادوں پر کریں گے جب کہ وائس چانسلر کے ایم یو پروفیسر ڈاکٹر ضیاء الحق اس بات کو یقینی بنائیں گے کہ کلاسز اور کلینیکل سروسز موجودہ تعلیمی سیشن سے شروع ہوں۔ صوبائی حکومت کے اس اقدام سے مقامی کمیونٹیز کو بہت زیادہ فائدہ پہنچے گا اورصوبے بھر میں صحت کی دیکھ بھال کے معیارات کو بڑھانے میں ایک اہم سنگ میل ثابت ہوگا۔

خیبرپختونخوا کے وزیر برائے حج، اوقاف و مذہبی امور صاحبزادہ عدنان قادری نے حالیہ پولیو مہم کے دوران عوام الناس بالخصوص علماء کو دعوت دی ہے کہ وہ اس پولیو مہم میں بھرپور حصہ لے کر اپنے بچوں کو اس موذی مرض سے بچائیں تاکہ اس مرض کا ملک سے جڑ سے خاتمہ ہو۔ انہوں نے مزید کہا کہ خیبر پختونخوا کے 27 اضلاع میں نو ستمبر سے تیرہ ستمبر تک یہ مہم چلائی جائے گی جبکہ باقی اضلاع میں یہ مہم اس مہینے کی 23 سے 27 ستمبر تک چلائی جائے گی۔ اس مہم میں 64 لاکھ 25 ہزار 27 سے زائد بچوں کو پولیو کے قطرے پلائے جائیں گے۔ اس مہم میں 35 ہزار ٹیمیں حصہ لیں گی اور گھر گھر جا کر بچوں کو پولیو کے قطرے پلائیں گی۔ان پولیو ٹیموں کی حفاظت پر 50 ہزار پولیس اہلکار مامور ہونگے۔ انہوں نے عوام الناس سے ایک بار پھراپیل کی ہے کہ وہ اپنے بچوں کو پولیو کے قطرے بروقت پلائیں تاکہ وہ اس موذی مرض سے محفوظ رہ سکیں۔

خیبر میڈیکل یونی ورسٹی کے وائس چانسلر ضیاء الحق اور سیکرٹری اطلاعات و تعلقات عامہ ارشد خان نے کہا ہے کہ موجودہ حکومت صحت کے شعبے میں ترجیحی بنیادوں پر اصلاحات لا رہی ہے اور عوام کو صحت کی بنیادی سہولیات مفت فراہم کرنے کیلیے کوشاں ہے جس کیلئے خطیر رقم مختص کی گئی ہے ان خیالات کا اظہار انہوں نے سوات کی تحصیل بریکوٹ میں بریکوٹ کالج آف نرسنگ اینڈ الائیڈ ہیلتھ سائنسز کی افتتاحی تقریب سے خطاب کرتے ہوئے کیا اس موقع پر انہوں نے باقاعدہ فیتہ کاٹ کر کالج کا افتتاح کیا اس موقع پر سوات بورڈ کے چیر مین تسبیح اللہ خان،سیکرٹری عمر حسین خان اور علاقہ عمائدین کی بڑی تعداد موجود تھی، انہوں نے کہا کہ موجودہ حکومت صحت کی سہولیات صوبے کے کونے کونے تک پہنچانے کیلئے تمام تر وسائل بروئے کار لا رہی ہے۔جس کیلئے ترجیحی بنیادوں پر اصلاحات لا رہی ہے اور موجودہ صوبائی حکومت کا کارنامہ ہے کہ اس صوبے کے ہر فرد کو صحت کے تمام سہولیات مفت فراہم کر رہی ہے جو کہ پورے ملک کیلیے ایک مثال ہے انہوں نے کہا کہ صوبے کے نرسنگ کالجز میں 64ہزار طلباء و طالبات پڑھ رہے ہیں جو آگے بڑھ کر ملک وقوم کی خدمت میں اپنا کردار ادا کرینگے جسکا مقصد بھی یہی ہے کہ یہاں کے عوام کو بنیادی سہولیات کی فراہمی کے ساتھ ساتھ انہیں باعزت روزگار کی فراہمی بھی کی جائے، انہوں نے کہا کہ صحت کی بنیادی سہولیات کی فراہمی نرسنگ اور دیگر سٹاف کے بغیر ممکن نہیں ہے اور اس طرح کے کالجز اس میں بھرپور کردار ادا کر رہے ہیں اس موقع پر بریکوٹ نرسنگ کالج کے پرنسپل اشفاق احمد نے مہمانوں کو خوش آمدید کہتے ہوئے کالج کی افادیت پر روشنی ڈالی۔