خیبر پختونخوا کے وزیر جنگلات و ماحولیات فضل حکیم خان یوسفزئی نے کہا ہے کہ صوبائی حکومت کاروباری افراد کو پر امن اور بہتر ماحول فراہم کرنے کی ہر ممکن کوشش کر رہی ہے، ملاکنڈ ڈویڑن میں ٹیکسز کے نفاذ کیخلاف عوام، سیاسی جماعتیں، ممبران اسمبلی اور صوبائی حکومت ایک پیج پر ہیں، وزیراعلیٰ خیبرپختونخوا سردار علی امین گنڈاپور نے دو ٹوک الفاظ میں واضح کیا ہے کہ صوبائی حکومت کو اعتماد میں لئے بغیر کسی بھی قسم کا ٹیکس قابل قبول نہیں، انہوں نے کہا کہ ملاکنڈ ڈویژن کو ٹیکس نٹ میں لانے سے قبل یہاں کے عوام، تاجر اور عمائدین کو اعتماد میں لیا جائے گا، وہ اتوار کے روز سوات کے مرکزی شہر مینگورہ ملا بابا میں صدر پلازہ کے افتتاح کے بعد میڈیا سے گفتگو کر رہے تھے، اس موقع پر ممبر صوبائی اسمبلی اختر خان ایڈووکیٹ، سوات سٹی میئر شاہد علی خان اور ٹریڈرز فیڈریشن کے صدر عبدالرحیم بھی موجود تھے۔صوبائی وزیر فضل حکیم خان یوسفزئی نے صدر پلازہ کے افتتاح کے موقع پر مالک اور تاجر برادری کو مبارکباد دی اور کہا کہ خیبر پختونخوا حکومت کاروباری افراد کی حوصلہ افزائی کیلئے ہر ممکن اقدامات اٹھا رہی ہے اور اس کیلئے پر امن ماحول فراہم کیا جا رہا ہے تاکہ لوگ آزادانہ طور پر کاروبار کرتے ہوئے رزق حلال کما سکیں، ملاکنڈ ڈویڑن میں ٹیکسز کے نفاذ کے حوالے سے انہوں نے بتایا کہ فی الوقت مقامی افراد ٹیکس دینے کے متحمل نہیں، ماضی قریب میں دہشتگردی کی لہر اور پے در پے قدرتی آفات نے ملاکنڈ ڈویژن کی قدرتی ساخت اور کاروباری ماحول کو متاثر کیا، ایسے میں مقامی معیشت کو سہارے کی ضرورت ہے، اور وفاقی حکومت یہاں کے عوام، تاجروں، سیاسی مشران اور تمام سٹیک ہولڈرز کو اعتماد میں لئے بغیر ٹیکس لاگو نہیں کر سکتی کیونکہ سوات کے ادغام کے موقع پر یہ معاہدہ طے پایا تھا کہ یہ علاقہ ٹیکس سے مستثنیٰ ہوگا۔

خیبرپختونخوا فوڈ اتھارٹی کا صوابی، نوشہرہ ملاکنڈ اور مردان میں چھاپے، سینکڑوں لیٹر غیر معیاری اور جعلی مشروبات برآمد،جرمانے بھی عائد، ترجمان فوڈ اتھارٹی

خیبرپختونخوا فوڈ سیفٹی اینڈ حلال فوڈ اتھارٹی نے صوبہ بھر میں ملاوٹ مافیا اور جعلی خوراکی مصنوعات کے خلاف کریک ڈاؤن جاری رکھتے ہوئے فوڈ سیفٹی ٹیموں نے صوابی، نوشہرہ ملاکنڈ اور مردان میں کارروائیاں کیں اور سینکڑوں لیٹرز مضر صحت اور جعلی مشروبات اور غیر معیاری دودھ پکڑ کر ضبط کر لیا اور مالکان پر بھاری جرمانے کیے۔ کاروائیوں کی تفصیلات جاری کرتے ہوئے ترجمان فوڈ اتھارٹی نے بتایا کہ گزشتہ روز صوابی فوڈ سیفٹی ٹیم نے جھانگیرہ روڈ پر ناکہ بندی کی اور خوردونوش اشیاء کے گاڑیوں کی چیکنگ کی اس دوران ایک گاڑی سے 800 لیٹر جعلی مشروبات برآمد کرکے ضبط کر لیا اسی طرح خفیہ اطلاع ملنے پر نوشہرہ ٹیم نے بھی ایک گاڑی کا تعاقب کیا اور گاڑی سے انسپکشن کے دوران 1200 لیٹر جعلی مشروبات برآمد کرکے سرکاری تحویل میں لیا گیا۔ تفصیلات کے مطابق جعلی مشروبات کے مالکان پر بھاری جرمانے عائد اور فوڈ سیفٹی ایکٹ کے مطابق مزید کاروائی کا آغاز بھی کر دیا گیا۔ایک اور کاروائی کی تفصیلات دیتے ہوئے ترجمان نے کہا کہ ملاکنڈ فوڈ سیفٹی ٹیم نے بھی سخاکوٹ بازار میں خوراکی اشیاء کے کاروباروں کے معائنے کیے اور چیکنگ کے دوران 200 لیٹر دودھ غیر معیاری ثابت ہونے پر تلف کیا اور جرمانے بھی عائد کیے۔اسی طرح مردان فوڈ سیفٹی ٹیم نے تخت بھائی بازار میں مختلف خوردنوش آشیاء کے نمونوں کاموبائل فوڈ ٹیسٹنگ لیب سے جائزہ لیا اور خراب تیل موقع پر ضائع کیا اسکے علاوہ 80 کلو ممنوع و زائدالمیعاد اشیاء ضبط کرتے ہوئے مالکان پر جرمانے عائد کیے گئے۔ڈائریکٹر جنرل فوڈ اتھارٹی واصف سعید نے فوڈ سیفٹی ٹیموں کو کامیاب کاروائیوں پر سراہا اور کہا کہ صوبہ بھرسے ملاوٹ مافیا کو جڑ سے اکھاڑنے کیلئے کاروائیاں جاری رکھیں۔انکا مزید کہنا تھا کہ خوردنوش اشیاء میں ملاوٹ کی بیخ کنی تک کاروائیاں جاری رہیں گی اور کسی کیساتھ کوئی رعایت نہیں برتی جائے گی۔ سیکرٹری محکمہ خوراک ظریف المعانی نے شہریوں سے اپیل کرتے ہوئے کہا کہ ملاوٹ مافیا جیسے عناصر کیخلاف فوڈ اتھارٹی ٹیموں کو بر وقت اطلاع دیں اور ایک ذمہ دار شہری کا فرض نبھائیں۔اس موقع پر صوبائی وزیر خوراک ظاہر شاہ طورو نے اپنے دفتر سے جاری بیان میں فوڈ اتھارٹی کو ملاوٹ مافیا کیخلاف مسلسل کارروائیوں پر شاباش دی اور ہدایت جاری کی کہ فوڈ سیفٹی ٹیمیں انڈسٹری، ڈسٹریبیوٹرز اور ہول سیلرز کے معائنے یقینی بنائیں، وزیر خوراک نے مزید کہا کہ شہریوں کو ملاوٹ سے پاک خوردونوش اشیاء کی فراہمی صوبائی حکومت کی اولین ترجیح ہے۔

خیبر پختونخوا کے وزیر زراعت میجر (ر)سجاد بارکوال نے پشتو زبان کے شہرآفاق شاعر فیض اللہ فیض کے مقبرے پر زیارت تعمیر کرنیکا اعلان کرتے ہوئے کہا ہے کہ مادری زبان پشتو کی ترویج کیلئے اپنی تمام ترصلاحتیں اور وسائل بروئے کار لائیں گے اور ادب سے وابستہ افراد کے ساتھ بھرپور تعاون کیا جائیگا ان خیالات کا اظہار انہوں نے ویلج کونسل جہانگیری کا علاقہ جتان بانڈہ ضلع کرک میں منعقدہ ”جشن فیض” مشاعرے تقریب سے خطاب کرتے ہوئے کیا جس میں خیبرپختونخوا سمیت دوسرے صوبوں سے آنیوالے شعراء و ادیب شریک تھے میجر (ر) سجادبارکوال نے مزید کہا کہ سپینہ کے مقام پر باب لواغر کا قیام، خوشحال خان خٹک یونیورسٹی میں شعبہ پشتو کا قیام، گورنمنٹ ڈگری کالجز میں شعبہ پشتو کلاسسز کے بدستور اجراء سمیت سٹی ہیڈکوارٹر میں قائم لائبریری کو فعال کرنے کیلئے عملی اقدامات اٹھائے جائیں گے اس موقع پر پروفیسر محمود ایاز، صاحب کمال درویش، قادر شاہ اور ڈاکٹر سراج الدین خٹک نے کلیات فیض پرمبنی نثری مجموعہ بھی صوبائی وزیر کو پیش کیا۔

وزیر اعلیٰ خیبر پختونخوا کے مشیر کھیل اور امور نوجوانان سید فخر جہان نے ایبٹ اباد کا دورہ کیا جہاں پر انھوں نے محکمہ کھیل کے تعاون سے ریجن کی سطح پر منعقد ہونے والے انٹر ڈیپارٹمنٹل کرکٹ ٹورنامنٹ میں بطور مہمان خصوصی شرکت کی اور فائنل میچ کی دونوں ٹیموں کو انعامات سے نوزا۔ڈائریکٹر جنرل سپورٹس خیبرپختونخواعبدالناصر،ریجنل سپورٹس آفیسر ہزارہ اور ڈویژن کے ڈسٹرکٹ سپورٹس آفیسرز بھی اس موقع پر موجود تھے۔مشیر کھیل نے اس دوران محکمہ پولیس اور اینٹی کرپشن محکمہ جات کی ٹیموں کے مابین فائنل میچ کا نظارہ بھی کیا جبکہ ونر اور رنر اپ ٹیم کی کارکردگی کو سراہا اور ان میں ٹرافیاں تقسیم کیں۔ریجن کی سطح پر انٹر ڈیپارٹمنٹل ٹورنامنٹ میں انتظامیہ اور لائن ڈیپارٹمنٹس کی کل 32 ٹیموں نے حصہ لیا جن میں پولیس اور محکمہ اینٹی کرپشن کی ٹیمیں فائنل تک پہنچیں۔اس موقع پر مشیر کھیل نے اس عزم کا اظہار کیا کہ ہزارہ ریجن میں کھیلوں کے مزید مقابلے بھی منعقد کئے جائیں گے اور یہاں پر کھیل جیسی تفریحی سرگرمیوں کو فروغ دیا جائے گا۔انھوں نے کہا کہ ریجن میں آئندہ سپورٹس مقابلوں میں پولیس اور دیگر محکموں کیلئے شوٹنگ کے مقابلوں کا انعقاد بھی کیا جائے گا اور یہاں پر مرحلہ وار ہر طرح کے سپورٹس ایونٹس کو منعقد کیا جائے گا۔انھوں نے کہا کہ صوبائی حکومت صوبے میں ہر کھیل کے کھلاڑیوں کی حوصلہ افزائی کررہی ہے اور اس کے ساتھ ساتھ صوبہ بھر میں کھیلوں کیلئے سہولیات سے لیس انفراسٹرکچر پر بھی توجہ دی جارہی ہے۔انھوں نے کہا کہ ہم پوری تندہی سے کوشش کررہے ہیں کہ صوبے میں جلد از جلد انٹر نیشنل کرکٹ کو لایا جائے۔مشیر کھیل نے اس موقع پر مختلف محکموں کے مابین کھیلے جانے والے ٹورنامنٹ کو خوب سراہا اور کہا کہ تفریحی مواقع کیلئے سرکاری محکموں کے مابین اس نوعیت کے ایونٹس کا انعقاد ذہنی سکون اور تازگی کیلئے انتہائی ضروری ہے۔

خیبر پختونخوا کے وزیر برائے محنت فضل شکور خان نے آل گورنمنٹ ڈرائیور ایسوسی ایشن خیبر پختونخوا کی نومنتخب کابینہ کی حلف برداری تقریب میں بطور مہمان خصوصی شرکت کی۔ صوبائی وزیر نے ایسوسی ایشن کی نئی کابینہ کے اراکین سے حلف لیا۔ حلف برداری تقریب میں مختلف محکمہ جات کے ڈرائیوروں نے کثیر تعداد میں شرکت کی۔ ایسوسی ایشن کے صدر محمد فاروق اوردیگر اراکین نے مہمان خصوصی کا استقبال کیا اور تقریب میں شرکت پر خوش آمدید کہا۔ صوبائی وزیر کو ایسوسی ایشن کی جانب سے سپاس نامہ پیش کیا گیا۔ تقریب سے خطاب کرتے ہوئے صوبائی وزیر فضل شکورخان نے یقین دلایا کہ موجودہ صوبائی حکومت ڈرائیورز کے تمام جائز مطالبات کو پورا کریگی اور ان کے مسائل کو حل کرنے کیلئے اقدامات اٹھائے گی۔ انہوں نے کہا کہ کسی کے ساتھ کوئی زیادتی اور ناانصافی نہیں ہوگی ہر کسی کو اپنا حق ملے گا، صوبے میں عوامی حکومت ہے عوامی مسائل کو ترجیحی بنیادوں پر حل کررہے ہیں۔