خیبرپختونخوا کے نگران وزیرِ اطلاعات و تعلقات عامہ بیرسٹر فیروز جمال شاہ کاکاخیل اور ڈائریکٹر جنرل اطلاعات محمد عمران کی خصوصی ہدایات کے تحت پختونخوا ریڈیو پشاور کے زیراہتمام 12 ربیع الاول کو خصوصی نشریات چلانے کا فیصلہ کیا گیا ہے جو ریڈیو کے آفیشل فیس بک پیج سے بھی براہ راست پیش کی جائیں گی۔اس ضمن میں پختونخوا ریڈیو ایف ایم 92.2 کے سٹیشن ڈائریکٹر غلام حسین غازی کی زیر صدارت اجلاس میں عید میلاد النبی 12 ربیع الاول کے حوالے سے خصوصی نشریات اور پروگرامز ترتیب دیئے گئے۔ اجلاس میں فیصلہ کیا گیا کہ 12 ربیع الاول کی نشریات جمعرات کی شام نماز مغرب سے شروع ہونگی اور جمعہ رات 12 تک جاری رہیں گی۔ ان پروگراموں میں میں محفل میلاد، گیسٹ پروڈیوسر فرحان خلیل کی معیت میں سکول کے بچوں کا نعتیہ مقابلہ، پروڈیوسر رخسار جاوید کی میزبانی میں سیرت النبی پر کوئیز کمپیٹیشن، پروفیسر ڈاکٹر اباسین یوسفزئی اور شاہد علی شاہد کی میزبانی میں نعتیہ مشاعرے اور پروفیسر یاسر علی شاہ کی میزبانی میں نبی کریم حضرت محمد ﷺ کی حیات مبارکہ کے مختلف پہلوؤں پر علماء اور دانشوروں کے خصوصی مقالات اور پروگرام شامل ہیں۔ توقع ہے کہ خیبرپختونخوا کے نگران وزیر اطلاعات و تعلقات عامہ بیرسٹر فیروز جمال شاہ کاکاخیل سکول کے بچوں کے نعت اور کوئز کمپٹیشن کی اختتامی تقریب میں بحیثیت مہمان خصوصی شریک ہوں گے۔

خیبرپختونخوا کے نگران صوبائی مشیر توانائی و برقیات اور منصوبہ بندی و ترقی ڈاکٹر سید سرفراز علی شاہ نے کہا ہے کہ انسٹی ٹیوٹ آف پٹرولیم ٹیکنالوجیز کرک کو جدود خطوط پر استوار کرکے خیبرپختونخوا کے نوجوانوں کو دور جدید کے تقاضوں سے آہنگ تربیت دیکر آئل اینڈ گیس اور پٹرولیم سیکٹر کے ضروریات پوری کریں گے۔ انہوں نے کہا کہ طلباء کو جدید ٹیکنولوجیز کورسز پڑھانے کیساتھ ساتھ پریکٹیکل تربیت اور سائٹس کے دورے بھی کروائے جائیں گے تاکہ وہ مکمل طور پر تیار ہوسکیں۔ ان حیالات کا اظہار انہوں نے انسٹی ٹیوٹ آف پٹرولیم ٹیکنالوجیز کرک کے اجلاس کی صدارت کرتے ہوئے کیا اجلاس میں سیکرٹری توانائی و برقیات ناصر خان سپیشل سیکرٹری تاشفین حیدر، انسٹی ٹیوٹ کے پراجیکٹ ڈائریکٹر اور دیگر اعلیٰ حکام نے شرکت کی۔ انہوں نے مزید کہا کہ خیبرپختونخوا میں آئل اینڈ گیس اور پٹرولیم سیکٹر کے وسیع ذخائر موجود ہیں۔ جن کی ایکسپلوریشن کیلئے ہم سکلڈ لوگ تیار کرہے ہیں۔ تاکہ صوبے اور ملک کے توانائی ضروریات کو پورا کیا جاسکیں۔ انہوں نے کہا کہ 250 کنال اراضی پر قائم ہونے والے انسٹیٹیوٹ میں محتلف ٹیکنالوجیز کے تین سالہ ڈپلومہ کورسز کیساتھ ساتھ شارٹ ٹرم کورسز بھی کروائے جائیں گے۔ مشیر توانائی نے حکام کو ہدایت جاری کی کہ انسٹی ٹیوٹ کے باقی ماندہ تعمیراتی کام جلد ازجلد مکمل کریں۔ اور سٹاف کی کمی کو پوری کرنے کیساتھ ریلیز شدہ بجٹ بروقت خرچ کریں۔

خیبر پختونخوا کے نگراں وزیر صنعت وتجارت،فنی تعلیم اور قبائلی امور سید عامر عبداللہ نے جلوزئی اکنامک زون میں بنک آف خیبر کا باضابطہ افتتاح کیا۔ اس موقع پر چیف ایگزیکٹو آفیسر ازیمک جاوید اقبال خٹک،خیبر بنک کی انتظامیہ اور دیگر افسران بھی موجود تھے۔ وزیر صنعت وتجارت اس موقع پرخطاب کرتے ہوئے کہا کہ جلوزئی میں خیبر بنک کا قیا م بہت اہمیت کا حامل ہے،اس کے قیام سے اکنامک زون میں صنعت کاروں کو بنک سے متعلق سہولیات کیلئے دور نہیں جانا پڑے گا بلکہ ان کو یہ تمام سہولیات اکنامک زون میں ہی فراہم ہوں گی جس سے صنعت کاروں کو کافی مدد ملے گی۔ انہوں نے کے پی ازیمک کے متعلقہ حکام کو ہدایت کی کہ وہ اکنامک زون میں پانی کی دستیابی کو یقینی بنانے کے علاوہ بارش کے پانی کو ذخیرہ کرنے اور اس کو استعمال میں لانے کے لئے مناسب بندوبست اور اقدامات اٹھائیں تاکہ پانی کا مسئلہ مستقل طور پر حل ہوسکے۔بعدازاں وزیر صنعت وتجارت نے اکنامک زون میں شجرکاری کرکے پودا بھی لگایا۔

محکمہ صحت خیبر پختونخوا کی جانب سے جاری کردہ رپورٹ میں بتایا گیا ہے کہ صوبائی دارالحکومت پشاور میں اس وقت تک آشوب چشم کے سولہ کیسز رپورٹ ہوئے ہیں۔اس حوالے سے ڈائریکٹر جنرل محکمہ ہیلتھ ڈاکٹر شوکت علی نے ایڈوائزری جاری کرتے ہوئے کہا کہ متاثرہ افراد دھوپ میں نکلنے سے گریز کریں، سن گلاسز کا استعمال کریں، آنکھوں کو پانی سے دھویا کریں اور اگر انفیکشن زیادہ ہو تو ماہر امراض چشم سے رجوع کریں۔ڈاکٹر شوکت علی نے کہا کہ آشوب چشم سے حفاظتی اقدامات اٹھانے سے ہی اپنے آپ کو ممکنہ تکالیف سے بچایا جا سکتا ہے۔واضح رہے کہ صوبہ پنجاب میں آشوب چشم کے علاج کے دوران مختلف انجیکشن کے استعمال سے کئی لوگوں کی بصارت چلی گئی ہے تاہم محکمہ صحت کے ڈی جی ڈاکٹر شوکت علی نے کہا کہ اس طرح کا کوئی واقعہ خیبر پختونخوا میں پیش نہیں آیا اور ڈاکٹروں کو آشوب چشم کے علاج کا بخوبی اندازہ ہے اسی لئے جو بھی آشوب چشم کا شکار ہو اسے چاہئیے کہ وہ رجسٹرڈ میڈیکل پریکٹیشنر یاماہر امراض چشم سے ہی رجوع کرے۔