ڈپٹی کمشنر شمالی وزیر ستان ریحان گل خٹک کی سر براہی میں جرگہ ہال شوال رائفلز رزمک میں 10 رُکنی حکومتی وفد اور 30 رکنی اُتمانزئی جرگے کے درمیان رزمک میں مذا کرات کا پانچواں اور مجموعی طور پر چھٹا دور ہوا۔ وفد میں پاک آرمی 7 ڈویژن میرانشاہ کے افسران، ڈی پی او نارتھ وزیرستان، مختلف انٹیلی جنس اجنسیوں اور ضلعی انتظامیہ کے افسران شامل تھے۔ جبکہ 30 رُکنی اُتمانزئی جرگہ کی قیادت ملک نصراللہ وزیر کررہے تھے اور جرگے میں ملک جانفراز وزیر، ملک ربنواز وزیر، ملک قادر کابل خیل، مفتی بیت اللہ، ملک شاہ جہان اور ملک شیر خان وغیرہ شامل تھے۔ آج دونوں فریقین کے درمیان مذاکرات کے دو راؤنڈ ہوئے۔ ضلع شمالی وزیرستان میں مستقل قیام امن پر تفصیلی بات چیث ہوئی. اور اس مقصد کے حصول کیلئے ریاستی اداروں اور عوام کے کردار پر بحث ہوئی۔ حکومتی وفد اور اُتمامنزئی جرگے نے مذاکرات جاری رکھنے پر اتفاق کیا۔ مذاکرات انتہائی خوشگوار ماحول میں ہوئے۔

اسسٹنٹ کمشنر ہیڈ کوارٹرز لکی مروت نے کیٹگری سی ہاسپیٹل لکی سٹی کا دورہ کیا اس موقع پر انھوں نے عملے کی حاضری رجسٹر، او پی ڈی رجسٹر، سٹاک رجسٹر کو چیک کیا انھوں نے سٹاک روم، اپریشن تھیٹر اور ایمر جنسی وارڈ کا بھی معائنہ کیا۔ اس موقع پر اے سی نے کہا کہ عوام کو بنیادی طبی سہولیات کی فراہمی حکومت کی اولین ترجیح ہے اور اس ضمن تمام تر دستیاب وسائل استعمال کئے جائیں گے۔ انہوں نے کہا کہ ڈاکٹرز اور پیرامیڈیکس سٹاف اپنی حاضری یقینی بنا کر عام عوام کا خاص خیال رکھیں اور ان کی خدمت کو اپنا شعار بنائیں۔

ڈپٹی کمشنر/ ڈسٹرکٹ مجسٹریٹ دیرلوئر محمد فواد نے دیر لوئر میں امن و امان کی صورتحال برقرار رکھنے کے لئے 5 سے ذیادہ افراد کے اکھٹا ہونے پر دفعہ 144 کے تحت پابندی عائد کردی ہے جسکی خلاف ورزی پر قانونی کارروائی کی جائیگی۔ مذکورہ ھکمنامے پر عملدرامد یقینی بنانے کے لئے تمام اسسٹنٹ کمشنرز اور پولیس کو احکامات بھی جاری کر دئیے گئے ہیں۔

اسسٹنٹ کمشنر ہیڈ کوارٹرز لوئر چترال ڈاکٹر محمد عاطف جالب نے ڈی ایچ کیو ہسپتال کے ساتھ واقع میڈیکل سٹورز کا دورہ کیا اس موقع پر انھوں نے ادویات کی قیمتوں اور ایکسپائری کے حوالے سے معائنہ کیا اسسٹنٹ کمشنر نے میڈیکل سٹوروں میں ادویات کو مقررہ نرخ کے مطابق فروخت پایا ۔اس موقع پراسسٹنٹ کمشنر نے میڈیکل سٹور مالکان کو ادویات کی فروخت مقررہ ریٹ کے مطابق یقینی بنانے کی ہدایات جاری کرتے ہوئے خبر دار کیا کہ خلاف ورزی کی صورت میں ملوث کیمسٹ حضرات کی دکان سیل کرنے کے ساتھ سخت قانونی کاروائی عمل میں لائی جائے گی۔ انہوں نے عوام الناس سے گزارش کی کہ زائد قیمتیں وصول کرنے والے کیمسٹ حضرات کی اطلاع ضلعی انتظامیہ کو د یتے ہوئے ذمہ دار شہری ہونے کا ثبوت دیں۔ شکایات کیلئے ڈپٹی کمشنر کنٹرول روم نمبر 0943412519، اے سی چترال افس نمبر 0943413686 اوراے سی دروش افس نمبر 0943480203 پر رابطہ کرسکتے ہیں۔ اس کے علاوہ ڈپٹی کمشنر افیشل سوشل میڈیا پیج پر بھی رابطہ کر سکتے ہیں۔

ڈپٹی کمشنر سوات ڈاکٹر قاسم علی خان کی زیر صدارت انسداد ڈینگی کے حوالے سے اہم اجلاس سیدو شریف میں منعقد ہوا،اجلاس میں تمام متعلقہ حکام نے شرکت کی۔ ڈپٹی کمشنر کی جانب سے متعلقہ حکام کو 2013 سے2022 کے درمیان ڈینگی لاروے کی موجودگی سے متعلق ڈیٹا کو سامنے رکھتے ہوئے ہائی رسک علاقوں میں اقدامات تیز کرنے کی ہدایت کی گئی۔ اجلاس میں ڈاکٹر فضل عارف کی سربراہی میں تمام لائن ڈیپارٹمنس کے نمائند وں پر مشتمل کور ٹیم کو مزید متحرک کرنے اورمتعلقہ ڈیپارٹمنس کے دائرہ اختیار میں آنے والے علاقوں میں اپنی ذمہ د اریوں کے مطابق اقدامات تیز کرنے کا فیصلہ کیا گیا۔ڈپٹی کمشنر سوات ڈاکٹر قاسم علی خان نے ایڈیشنل ڈپٹی کمشنرز،تمام اسسٹنٹ کمشنرز،تحصیل میونسپل آفیسرز،ڈبلیوایس ایس سی اور محکمہ پبلک ہیلتھ کو ڈینگی لاروے کے ممکنہ پرورش والی جگہوں کی نشاندہی کرنے اور لاروے کی افزائش روکنے کے لئے فوری اقدامات شروع کرنے کی ہدایت کی۔ڈپٹی کمشنر نے تمام افسران کو ہدایت کی کہ وہ سرکاری دفاتر میں ڈینگی سے بچاؤ کے متعلق ضابطہ اخلاق پر سختی سے عملدرآمد یقینی بنائیں اور عوام میں شعور بھی بیدار کریں۔اجلاس میں ٹی ایم ایز کو ہدایت کی گئی کہ وہ بروقت اپنے اپنے علاقوں میں مچھر مار سپرے کی بندوبست کو یقینی بنائیں جبکہ واسا اور پبلک ہیلتھ کے اہلکاروں کو نکاسی آب اور نالوں وغیرہ کی صفائی کو یقینی بنانے کی ہدایت کی گئی۔ڈپٹی کمشنر سوات ڈاکٹر قاسم علی خان نے کہا کہ عوام میں فری پمفلٹ تقسیم کریں اور ان کو ڈینگی وائرس سے بچاؤ کی احتیاطی تدابیر کے بارے میں آگاہی دیں۔

ڈپٹی کمشنر سوات ڈاکٹر قاسم علی خان کی خصوصی ہدایت پر ایڈیشنل ڈپٹی کمشنر(جنرل) سوات سہیل احمد خان کی زیر صدارت ٹریفک کے حوالے سے اجلاس منعقد ہوا جس میں سیکرٹری ریجنل ٹرانسپورٹ اتھارٹی،ایس پی ٹریفک پولیس،ایڈیشنل ایس پی پولیس،اسسٹنٹ کمشنر بابوزئی،ایڈیشنل اسسٹنٹ کمشنر بابوزئی /ٹریفک مجسٹریٹ سوات اور دیگر محکموں کے افسران نے شرکت کی۔اجلاس میں مینگورہ شہر کے ٹریفک مسائل کے مستقل حل، ٹرانسپورٹ اڈوں اور دیگر امور پر تفصیلی بات چیت کی گئی۔ ایس پی ٹریفک وارڈن سوات نے اجلاس کوضلع بھر میں غیر رجسٹرڈ رکشہ و موٹر سائیکلز کیوجہ سے پیدا ہونے والے ٹریفک اور امن و امان کی صورت حال کے بارے تفصیلی بریفنگ دی۔اجلاس کی صدارت کرتے ہوئے ایڈیشنل ڈپٹی کمشنر سہیل احمد خان کا کہنا تھا کہ بائی پاس بس سٹینڈز اور ملحقہ ڈی کلاس اڈوں کی نگرانی ریجنل ٹرانسپورٹ اتھارٹی اور ٹی ایم اے کی ذمہ داری ہے اور ان اڈوں سے پیدا ہونے والے ٹریفک مسائل کے حل کیلئے حل طلب اقدامات کی اشد ضرورت ہے جس کیلئے متعلقہ اداروں کو قانونی پیچیدگیاں دور کرنے کیلئے اپنی تمام تر صلاحیتیں بروئے کار لانا ہوگی۔