وزیراعلیٰ خیبرپختونخوا کے معاون خصوصی برائے ٹیکنیکل ایجوکیشن و ووکیشنل ٹریننگ محمد عثمان خان بیٹنی نے گلبہار ٹیکنیکل کالج، دفترِ روزگار گلبہار اور ٹریڈ ٹیسٹنگ بورڈ خیبرپختونخوا کا دورہ کیااس موقع پر انہوں نے مذکورہ اداروں کی کارکردگی، تربیتی سہولیات، امتحانی نظام اور نوجوانوں کو روزگار کی فراہمی کے اقدامات کا جائزہ لیا۔ اس موقع پر متعلقہ افسران نے معاون خصوصی کو اداروں کی مجموعی کارکردگی، جاری پروگرامز، درپیش مسائل اور مستقبل کے منصوبوں کے حوالے سے تفصیلی بریفنگ دی۔ محمد عثمان خان بیٹنی نے مختلف شعبہ جات کا معائنہ کے دوران طلبہ و عملے سے بھی ملاقات کی اور کہا کہ خیبرپختونخوا حکومت نوجوانوں کو جدید تقاضوں سے ہم آہنگ فنی و پیشہ ورانہ تعلیم فراہم کرنے کے لیے بھرپور اقدامات کر رہی ہے۔ انہوں نے کہا کہ ٹیکنیکل کالجز، ٹریڈ ٹیسٹنگ بورڈ اور دفاترِ روزگار نوجوانوں کو ہنر، سرٹیفکیشن اور روزگار کے مواقع فراہم کرنے میں کلیدی کردار ادا کر رہے ہیں۔محمد عثمان خان بیٹنی نے ہدایت کی کہ تربیتی پروگرامز کو مارکیٹ کی ضروریات کے مطابق مزید مؤثر بنایا جائے، امتحانی اور سرٹیفکیشن نظام میں شفافیت کو یقینی بنایا جائے اور نوجوانوں کو روزگار کی فراہمی کے لیے نجی شعبے کے ساتھ روابط کو مزید مضبوط کیا جائے۔انہوں نے کہا کہ وزیراعلیٰ خیبرپختونخوا کے وژن کے مطابق ٹیکنیکل اور ووکیشنل تعلیم کے شعبے میں اصلاحات اور جدید سہولیات کی فراہمی حکومت کی اولین ترجیحات میں شامل ہے، تاکہ صوبے کے نوجوان باعزت روزگار حاصل کرکے ملکی ترقی میں اپنا بھرپور کردار ادا کر سکیں۔دورے کے اختتام پر معاون خصوصی نے اداروں کے افسران اور عملے کی کاوشوں کو سراہتے ہوئے ہدایت کی کہ عوامی خدمت، شفافیت اور بہترین کارکردگی کو ہر سطح پر یقینی بنایا جائے۔

وزیراعلیٰ خیبرپختونخوا کے معاونِ خصوصی برائے داخلہ و قبائلی امور طارق سعید مروت نے محکمہ داخلہ و قبائلی امور، پولیس لائنز اور ڈپٹی کمشنر پشاور کے زیرِ انتظام قائم محرم الحرام کے مرکزی کنٹرول رومز کے دورے کیے اور صوبہ بھر میں سکیورٹی، مانیٹرنگ اور ہنگامی ردعمل کے انتظامات کا تفصیلی جائزہ لیا۔
اس موقع پر متعلقہ حکام نے معاونِ خصوصی کو محرم الحرام کے دوران امن و امان کے قیام کے لیے کیے گئے اقدامات، جلوسوں اور مجالس کی نگرانی، ضلعی انتظامیہ، پولیس، ریسکیو اداروں اور دیگر متعلقہ محکموں کے درمیان رابطہ کاری کے نظام کے بارے میں بریفنگ دی۔ انہیں بتایا گیا کہ کنٹرول رومز فعال طور پر کام کر رہے ہیں اور صوبے کے تمام اضلاع سے موصول ہونے والی معلومات کی مسلسل نگرانی کی جا رہی ہے۔
طارق سعید مروت نے دورے کے موقع پر کہا کہ محرم الحرام کے دوران امن و امان کا قیام حکومت کی اولین ترجیح ہے۔ انہوں نے ہدایت کی کہ تمام متعلقہ ادارے مکمل ہم آہنگی اور پیشہ ورانہ انداز میں اپنے فرائض سرانجام دیں۔
معاونِ خصوصی نے کہا کہ وزیراعلیٰ خیبرپختونخوا کی ہدایات کے مطابق محرم الحرام کے دوران سکیورٹی کے غیر معمولی انتظامات کیے گئے ہیں اور نویں و دسویں محرم کے جلوسوں اور مجالس کے پرامن انعقاد کے لیے تمام دستیاب وسائل بروئے کار لائے جا رہے ہیں۔
یہاں یہ امر قابل ذکر ہے کہ محرم الحرام کے دوران امن و امان کے قیام اور پرامن ماحول کو برقرار رکھنے کے لیے معاونِ خصوصی برائے داخلہ و قبائلی امور طارق سعید مروت کی ذاتی نگرانی میں تمام متعلقہ اداروں کے ساتھ مسلسل رابطہ، مؤثر رابطہ کاری اور شبانہ روز مانیٹرنگ کو یقینی بنایا گیا ہے۔اور معاونِ خصوصی کی بروقت ہدایات، مسلسل فالو اَپ اور غیر معمولی کاوشوں نے محرم الحرام کے دوران سکیورٹی انتظامات کو مزید مؤثر بنانے اور صوبے بھر میں امن و استحکام برقرار رکھنے میں اہم کردار ادا کیا ہے۔
طارق سعید مروت نے کنٹرول رومز کے عملے کی کارکردگی کو سراہتے ہوئے کہا کہ محرم الحرام کے دوران عوام کے جان و مال کے تحفظ اور امن و امان کی فضا برقرار رکھنے کے لیے تمام متعلقہ ادارے مکمل طور پر متحرک ہیں۔ انہوں نے اس عزم کا اظہار کیا کہ صوبائی حکومت امن و استحکام کے قیام اور شہریوں کے تحفظ کے لیے ہر ممکن اقدامات جاری رکھے گی۔

وزیر اطلاعات و تعلقات عامہ خیبر پختونخوا شفیع جان نے کہا ہے کہ محرم الحرام کے دوران امن و امان برقرار رکھنا صوبائی حکومت کی اولین ترجیح ہے۔ نویں اور دسویں محرم کے جلوسوں اور مجالس کے پرامن انعقاد کے لیے فول پروف سیکورٹی پلان مرتب کیا گیا ہے اور اس سلسلے میں تمام ضروری انتظامات مکمل کر لیے گئے ہیں۔انہوں نے کہا کہ صوبہ بھر میں سیکیورٹی صورتحال کی چوبیس گھنٹے نگرانی کی جا رہی ہے اور حکومت عوام کے تعاون سے محرم الحرام کے پرامن انعقاد کو یقینی بنائے گی۔ شفیع جان نے تمام مکاتب فکر کے علمائے کرام سے اپیل کی کہ وہ محرم الحرام کے دوران فرقہ وارانہ ہم آہنگی، بھائی چارے اور امن کے فروغ کے لیے اپنی مثبت اور مؤثر روایات کو برقرار رکھتے ہوئے بھرپور کردار ادا کریں۔صوبائی وزیر اطلاعات نے مزید بتایا کہ محرم الحرام کے دوران صوبہ بھر میں 43 ہزار 317 پولیس اہلکار سیکورٹی کے فرائض انجام دے رہے ہیں اسی طرح محکمہ داخلہ میں قائم مرکزی کنٹرول روم 24 گھنٹے فعال ہے اور یہ اضلاع کے کمانڈ اینڈ کنٹرول سینٹرز سے بھی منسلک ہے، جبکہ ضلعی سطح پر قائم کنٹرول رومز بھی مکمل طور پر فعال ہیں۔انہوں نے کہا کہ سیکورٹی انتظامات کو مزید مؤثر اور مربوط بنانے کے لیے جدید ٹیکنالوجی سے بھی استفادہ کیا جا رہا ہے

وزیر اعلیٰ خیبرپختونخوا کے مشیر برائے صنعت ہمایوں خان نے کہا ہے کہ خیبر پختونخوا اکنامک زونز ڈیولپمنٹ منیجمنٹ کمپنی نے خود کو مستقبل کے حوالے سے ایک ادارے کے طور پر قائم کیا ہے، انہوں نے کہا ہے کہ انہیں یقین ہے کہ یہ صوبے میں سرمایہ کاری کو راغب کرنے، روزگار کے مواقع پیدا کرنے اور صنعتی ترقی کو تیزتر کرنے میں یہ کمپنی ایک لیڈنگ رول ادا کرے گی” ان خیالات کا اظہار انہوں نے رواں ہفتے خیبرپختونخوا اکنامک زونز ڈویلپمنٹ اینڈ مینجمنٹ کمپنی  کے ہیڈ آفس کے دورے کے موقع پر کیا ہے۔ اس دوران مشیر برائے صنعت نے بورڈ اور کمپنی کی سینئر قیادت سے بھی ملاقات کی جبکہ کمپنی کی طرف سے دورے کو بہت سراہا گیا ہے اور اس دورے کو اس بات کی علامت سمجھا گیا ہے کہ  کا کام صوبائی حکومت کی سطح پر بھی سراہا جا رہا ہے۔ اس موقع پر مشیر برائے صنعت کو کمپنی کے کام، آپریشنز اور ریگولیشن کے بارے میں تفصیلی بریفنگ دی گئی ہے۔ بریفنگ کے دوران بتایا گیا کہ خیبرپختونخوا اکنامک زونز ڈویلپمنٹ اینڈ مینجمنٹ کمپنی  سیکشن 42 کے تحت قائم کی گئی کمپنی ہے، جسے حکومت خیبر پختونخوا نے صوبے بھر میں صنعت کاری، سرمایہ کاری اور پائیدار اقتصادی ترقی میں سہولت فراہم کرتے ہوئے صوبے بھر میں اقتصادی زونز اور خصوصی اقتصادی زونز کی ترقی، انتظام اور فروغ کے لیے قائم کیا ہے۔ مزید بتایا گیا کہ ماضی قریب میں KPEZDMC نے حطار اکنامک زون میں پیپسی کو انٹرنیشنل کے ساتھ زمین کے حصول کے معاہدے پر دستخط کیے، جس سے تقریباً 700 ملین روپے کی سرمایہ کاری کی گئی جبکہ دنیا بھر میں پیپسی کو کے صرف آٹھ میں سے ایک پلانٹ کی توسیع کو محفوظ بنایا گیا ہے جس نے صوبے میں سرمایہ کاروں کے بڑھتے ہوئے اعتماد کے اشارے کے طور پر اس معاہدے نے خاصی توجہ مبذول کرائی ہے۔ اجلاس میں کمپنی کے سی- ای -او شہریار گل نے کہا ہے کہ “خیبر پختونخوا کاروبار کے لیے کھلا ہے، اور اس طرح کے معاہدے یعنی PepsiCo جیسے عالمی برانڈ یہاں سرمایہ کاری کرتا ہے، تو یہ صوبے کی سرمایہ کاری کی صلاحیت کو تقویت دیتا ہے۔”اس موقع پر ہمایوں خان نے مختلف شعبہ جات کا جائزہ لیا اور بورڈ ممبران سے ملاقاتیں کیں، جبکہ سرمایہ کاروں کے لیے ایک حوصلہ افزا پیغام لے کر روانہ ہوئے کہ “صوبہ خیبرپختونخوا تمام سرمایہ کاروں کے لیے کھلا ہے اور خیبر پختونخوا حکومت تمام سرمایہ کاروں کو دعوت دیتی ہے کہ یہاں اکر اس صوبے میں سرمایہ کاری کریں جبکہ حکومت خیبر پختونخوا سرمایہ کاروں کو تمام تر سہولیات اور مواقع فراہم کرے گی۔

وزیراعلیٰ خیبر پختونخوا کے مشیر برائے زراعت و چیئرمین صوبائی سیڈ کونسل میاں محمد عمر کی زیر صدارت صوبائی سیڈ کونسل کا 47واں اجلاس منعقد ہوا، جس میں صوبے میں معیاری بیجوں کی فراہمی، نئی اقسام کی منظوری اور زرعی تحقیق کے فروغ سے متعلق اہم امور پر تفصیلی غور کیا گیا. اجلاس میں سیکرٹری زراعت ڈاکٹر محمد بختیار خان، ڈائریکٹر جنرل زراعت تحقیق ڈاکٹر عبدالروف، ڈائریکٹر جنرل زراعت توسیع ڈاکٹر نویدخان سمیت صوبائی سیڈ کونسل کے ممبران نے شرکت کی۔مشیر زراعت میاں محمد عمر نے کونسل کا اجلاس سے خطاب کرتے ہوئے کہنا تھا کہ معیاری اور جدید بیج زرعی پیداوار میں اضافے اور کسانوں کی آمدن میں بہتری کے لیے بنیادی اہمیت رکھتے ہیں۔ حکومت خیبر پختونخوا زرعی تحقیق، جدید ٹیکنالوجی کے فروغ اور موسمیاتی تبدیلیوں سے ہم آہنگ بیجوں کی ترقی پر خصوصی توجہ دے رہی ہے۔ زرعی سائنسدان بہترین بیجوں کی ایسی اقسام متعارف کروائیں جن سے کسانوں کو زیادہ سے زیادہ فائدہ پہنچے اور وہ بہتر پیداواری اور موسمی حالات سے مطابقت رکھنے والے بیج کی اقسام سے فائدہ لے سکیں۔صوبائی سیڈ کونسل کے اجلاس میں مختلف فصلوں، پھلوں، سبزیوں، اجناس، تیل دار اجناس اور دالوں کی نئی اقسام سے متعلق تجاویز کا بھی جائزہ لیا گیا اور بتایا گیا کہ صوبائی سیڈ کونسل کو وفاقی سیڈ ایکٹ 1976 کے تحت صوبے میں نئی اقسام کی منظوری، غیر مؤثر یا نقصان دہ اقسام کی روک تھام، بین الصوبائی تجارتی پیداوار کی اجازت اور دیگر متعلقہ امور کے حوالے سے اختیارات حاصل ہیں۔ اجلاس میں صوبائی سیڈ کونسل نے غور و خوض کے بعد مختلف اداروں کی جانب سے پیش کی گئی 19 تخم کی اقسام کی کاشت کی منظوری دی جن میں پھلوں، سبزیوں، اجناس، تیل دار اجناس اور دالوں کی نئی اقسام شامل تھیں۔ ان بیچ میں محکمہ زراعت کے تحقیقی اداروں کے علاوہ قومی زرعی تحقیقی اداروں اور جامعات کی جانب سے تیار کردہ اقسام بھی شامل ہیں۔صوبائی سیڈ کونسل کے اجلاس میں پھلوں کی تین اقسام، سبزیوں دو،اناج کی اجناس کے شعبے میں دس، تیل دار اجناس میں چھ کی منظوری دی گئی۔مشیر زراعت میاں محمد عمر نے مزید کہا کہ حکومت زرعی تحقیق کے اداروں کی استعداد کار میں اضافے اور جدید تحقیق کے فروغ کے لیے ہر ممکن تعاون فراہم کرے گی۔

خیبر پختونخوا کے وزیر برائے ہاؤسنگ ڈاکٹر امجد علی کی زیر صدارت خیبر پختونخوا ہاؤسنگ اتھارٹی بورڈ کا اجلاس بدھ کے روز محکمہ ہاؤسنگ کے کمیٹی روم میں منعقد ہوا، اس موقع پر صوبے میں جاری ہاؤسنگ منصوبوں کی پیش رفت، نئی پالیسیوں اور عوامی سہولیات سے متعلق اہم امور کا تفصیلی جائزہ لیا گیا۔اجلاس میں سیکرٹری ہاؤسنگ محمود اسلم وزیر، ڈائریکٹر جنرل ہاؤسنگ محمد زاہد، ایڈیشنل ڈائریکٹر جنرل عامر زیب، ڈائریکٹر پلاننگ یعقوب خان، محکمہ خزانہ کے حکام اور دیگر متعلقہ افسران نے شرکت کی۔اجلاس کے دوران حکام نے صوبائی وزیر کو جلوزئی ہاؤسنگ سکیم کے اراضی مالکان کو سپریم کورٹ کے فیصلے کے مطابق معاوضوں کی ادائیگی، خیبر پختونخوا ہاؤسنگ اتھارٹی سروس ریگولیشنز میں موجود خامیوں، اراضی مالکان کی مشترکہ منصوبہ بندی کے ریگولیشنز، ہاؤسنگ اتھارٹی کے دفتر کی تعمیر، ہزارہ اور ملاکنڈ ڈویژن میں سائٹ کیمپس کے قیام کے لیے اراضی کی خریداری، آپریشنل سرگرمیوں کے لیے گاڑیوں کی خریداری، گاڑیوں کی مرمت و دیکھ بھال کے لیے مقامی ورکشاپ کے قیام، کمرشل لیزنگ ریگولیشن 2026، سرکاری ملازمین کے لیے رہائشی پلاٹس، جلوزئی ہاؤسنگ سکیم میں ایگزیکٹو فلیٹس اور نشتر آباد پشاور میں 35 کنال کمرشل اراضی پر فلیٹس کی تعمیر سے متعلق تفصیلی بریفنگ دی۔اجلاس میں نشتر آباد پشاور میں 35 کنال اراضی پر کمرشل پلاٹس اور سرکاری ملازمین کے لیے رہائشی منصوبے کے قیام کی تجویز پر بھی تفصیلی غور کیا گیا، جبکہ ملاکنڈ اور ہزارہ ڈویژن میں کے پی ہاؤسنگ اتھارٹی کے سائٹ آفس کیمپس کے لیے پانچ، پانچ کنال اراضی کی منظوری دی گئی۔اجلاس سے خطاب کرتے ہوئے صوبائی وزیر ڈاکٹر امجد علی نے ہدایت کی کہ صوبے میں جاری تمام ہاؤسنگ سکیموں کو جلد از جلد مکمل کیا جائے اور منصوبوں میں غیر ضروری تاخیر سے ہر صورت اجتناب کیا جائے۔ انہوں نے ہنگو ٹاؤن شپ میں بجلی سمیت دیگر بنیادی مسائل فوری طور پر حل کرنے اور زیر التواء منصوبوں کی بروقت تکمیل کی ہدایت بھی جاری کی۔انہوں نے کہا کہ تمام ہاؤسنگ منصوبوں میں سکولوں، مساجد، پارکس اور دیگر بنیادی سہولیات کی فراہمی یقینی بنائی جائے تاکہ شہریوں کو معیاری رہائشی ماحول میسر آ سکے۔ڈاکٹر امجد علی نے جلوزئی ہاؤسنگ سکیم کے الاٹیز کے مسائل ایک ماہ کے اندر ترجیحی بنیادوں پر حل کرنے کی ہدایت دیتے ہوئے کہا کہ ایک ہفتے کے اندر تمام ہاؤسنگ سکیموں کا متعلقہ افسران تفصیلی دورہ کریں اور اپنی رپورٹس پیش کریں۔انہوں نے مزید ہدایت کی کہ عوام کو بہتر سہولیات کی فراہمی کے لیے تمام ہاؤسنگ سکیموں کے سائٹ دفاتر میں متعلقہ افسران کی تعیناتی جلد عمل میں لائی جائے اور اس مقصد کے لیے نئے عملے کی بھرتی سمیت تمام ضروری اقدامات بروقت مکمل کیے جائیں۔صوبائی وزیر نے اس عزم کا اظہار کیا کہ صوبائی حکومت سرکاری ملازمین کو ہاؤسنگ فاؤنڈیشن اور خیبر پختونخوا ہاؤسنگ اتھارٹی کے مختلف رہائشی منصوبوں میں پلاٹس اور رہائش کی بہتر سہولیات فراہم کرنے کے لیے عملی اقدامات جاری ہیں

خیبر پختونخواکے وزیر مواصلاۃ و تعمیرات شکیل احمد نے کہا ہے کہ دیر پائیں تیمرگرہ پنجکوڑہ پل بائی پاس کنڈرو روڈ کے منصوبے عوامی مفاد کے لئے انتہائی اہمیت کا حامل منصوبہ ہے جس کی بروقت تکمیل کے لیے تمام پہلوؤں کا بغور جائزہ لیا جائے گا اورعوامی امنگو ں کے مطابق فیزیبل طریقے سے اس کی تعمیر ہوگی اور اس کی تعمیر سے ٹریفک کے مسائل میں کمی آئے گی جبکہ عوام کو سفری سہولیات بھی میسر ہو سکیں گی۔ ان خیالات کا اظہار انہوں نے بدھ کے روز پشاور میں پنجکوڑا پل تیمرگرہ بائی پاس روڈ کے حوالے سے خیبر پختونخوا ہائی ویز اتھارٹی کے منعقدہ اجلاس کی صدارت کرتے ہوئے کیا۔اس موقع پر چیف انجینئر نارتھ اسد خان، ایکسیئن نظام خان اور دوسرے متعلقہ افسران بھی موجود تھے۔ اس موقع پر چیف انجینیئر نارتھ نے صوبائی وزیر کو مذکورہ منصوبے کی تکمیل میں حائل قانونی پیچیدگیوں اور ٹیکنیکل مسائل کو دور کرنے اور درکار اراضی سے متعلق تمام تر پہلوؤں کا تفصیلی جائزہ لیا گیا۔ اجلاس میں اظہار خیال کرتے ہوئے صوبائی ویز نے کہا کہ تیمرگرہ پنچکوڑا پل بائی پاس روڈ کے منصوبے پر 621 ملین روپے کی لاگت آئے گی اورعوامی توقعات کو مدنظر رکھتے ہوئے اس کی بروقت تعمیر کے لئے بھر پور اقدامات اٹھائے جائیں گے اور یہ ایک بہترین عوامی فلاح و بہبود اور ترقی کا منصوبہ ثابت ہوگا۔

صوبائی وزیر برائے محنت خیبر پختونخوا، فیصل خان ترکئی سے انٹرنیشنل لیبر آرگنائزیشن آئی ایل او کے وفد نے ملاقات کی۔ ملاقات میں صوبے میں مزدوروں کی فلاح و بہبود، محفوظ اور باوقار روزگار کے فروغ، سماجی تحفظ کے نظام کو مزید مؤثر بنانے اور محکمہ محنت کے اداروں کی استعداد کار بڑھانے سے متعلق امور پر تفصیلی تبادلہ خیال کیا گیا۔اس موقع پر صوبائی وزیر نے خیبر پختونخوا حکومت کی جانب سے مزدوروں کے حقوق کے تحفظ، سوشل سیکیورٹی سہولیات کی بہتری اور بین الاقوامی معیار کے مطابق لیبر اصلاحات کے عزم کا اعادہ کیا۔ صوبائی وزیر نے کہا کہ حکومت محنت کش طبقے کو بہتر طبی، سماجی اور قانونی سہولیات کی فراہمی کے لیے تمام دستیاب وسائل بروئے کار لا رہی ہے۔ملاقات کے دوران باہمی تعاون کو مزید مضبوط بنانے اور محکمہ محنت کے مختلف شعبوں میں تکنیکی معاونت کے فروغ پر بھی اتفاق کیا گیا اور اس سلسلے میں یہ فیصلہ کیا گیا کہ 8 جولائی کو خیبر پختونخوا ایمپلائیز سوشل سیکیورٹی انسٹیٹیوشن کے ڈاکٹروں کے لیے ایک خصوصی تربیتی ورکشاپ کا انعقاد کیا جائے گا۔ ورکشاپ کا مقصد طبی ماہرین کی پیشہ ورانہ صلاحیتوں میں اضافہ، جدید طبی رجحانات سے آگاہی اور سوشل سیکیورٹی کے تحت فراہم کی جانے والی طبی خدمات کے معیار کو مزید بہتر بنانا ہے۔وفد نے صوبائی حکومت اور محکمہ محنت کی جانب سے مزدوروں کی فلاح و بہبود کے لیے اٹھائے گئے اقدامات کو سراہتے ہوئے مستقبل میں تعاون کے فروغ کے عزم کا اظہار کیا۔

وزیراعلیٰ خیبرپختونخوا محمد سہیل آفریدی کی خصوصی ہدایات پر صوبے میں نظامِ انصاف کو مزید مؤثر، شفاف اور عوام دوست بنانے کے لیے قانونی اصلاحات کا عمل تیزی سے جاری ہے۔ اس سلسلے میں مختلف قوانین میں اصلاحات کے لیے قائم خصوصی کمیٹی کا ایک اہم اجلاس وزیر قانون آفتاب عالم کی زیر صدارت محکمہ قانون کے کانفرنس روم میں منعقد ہوا۔اجلاس میں محکمہ قانون اور ایڈووکیٹ جنرل آفس کے اعلیٰ حکام و نمائندگان نے شرکت کی، جہاں متعدد اہم قوانین کا تفصیلی جائزہ لیا گیا۔ اجلاس کا بنیادی مقصد عوام کو فوری، سستا اور مؤثر انصاف فراہم کرنے کے لیے قانونی و عدالتی نظام کو جدید تقاضوں سے ہم آہنگ بنانا تھا۔کمیٹی نے مختلف اہم قوانین میں مجوزہ اصلاحات پر غور کیا۔ اراکین نے اپنی تجاویز اور آراء پیش کیں، جن کی روشنی میں مجوزہ ترامیم کا ابتدائی مسودہ تیار کر لیا گیا ہے۔قانونی اصلاحات کے لیے قائم یہ کمیٹی گزشتہ 20 روز سے مسلسل اجلاسوں کے ذریعے مختلف قوانین کا باریک بینی سے جائزہ لے رہی ہے تاکہ ایک جامع اور مؤثر اصلاحاتی پیکج مرتب کیا جا سکے۔مجوزہ ترامیم کا مسودہ جلد ہی حتمی منظوری کے لیے وزیراعلیٰ خیبرپختونخوا محمد سہیل آفریدی اور صوبائی کابینہ کے سامنے پیش کیا جائے گا۔یہ اصلاحات صوبے میں قانون کی حکمرانی کو مزید مضبوط بنانے، انصاف کی بروقت فراہمی کو یقینی بنانے اور ایک جدید، شفاف اور عوامی توقعات سے ہم آہنگ نظامِ انصاف کے قیام کی جانب ایک اہم سنگِ میل ثابت ہوں گی۔

خیبر پختونخوا حکومت کا میڈیا برادری کے لیے ایک بڑا اور تاریخی قدم۔ اس بجٹ میں نہ صرف صحافیوں کے بچوں اور میڈیا کالونیز کے لیے خطیر رقم مختص کی گئی ہے، بلکہ 1987ء سے زیرِ التوا ملازمین کے واجبات کی ادائیگی کو بھی یقینی بنایا جا رہا ہے۔

سب سے اہم فیصلہ: اخباری مالکان کو بقایا جات کی ادائیگی اس شرط پر کی جائے گی کہ وہ پہلے اپنے تمام چھوٹے اور بڑے ملازمین کے واجبات سو فیصد کلیئر کریں!

#KPBudget #JournalistRelief #MediaPackage #PeshawarPressClub #KPGovernment #MediaReforms #AlivePeshawar