کمشنر پشاور ڈویژن ریاض خان محسود کی زیر صدارت محرم الحرام کے دوران امن و امان کی مثالی فضا برقرار رکھنے، بین المسالک ہم آہنگی کے فروغ اور فرقہ واریت کے خاتمے کے لیے متحدہ علمائے بورڈ کے زیر اہتمام 100 سے زائد جید علمائے کرام پر مشتمل ایک گرینڈ کوآرڈینیشن اجلاس منعقد ہوا۔اجلاس میں ڈپٹی کمانڈر 102 بریگیڈ کرنل نوید، ڈپٹی کمشنر پشاور کیپٹن (ر) ثناء اللہ، چیف ایگزیکٹو آفیسر ڈبلیو ایس ایس پی یاسر علی خان، پولیس حکام، بلدیاتی افسران اور متعلقہ اداروں کے نمائندگان نے شرکت کی۔ جبکہ متحدہ علمائے بورڈ کے پلیٹ فارم سے اہل تشیع، اہل سنت والجماعت، ادارہ تبلیغ الاسلام، انجمن تبلیغ القرآن والسنتہ، متحدہ امن کمیٹی، اہل حدیث، بریلوی اور تبلیغی جماعت کے جید علمائے کرام کے علاوہ ہندو، سکھ اور مسیحی برادری کے مذہبی رہنماؤں نے بھی اجلاس میں شرکت کی۔اجلاس میں تمام شرکاء نے اس عزم کا اعادہ کیا کہ موجودہ حالات کے تناظر میں محرم الحرام کے دوران قیامِ امن، مذہبی ہم آہنگی اور بھائی چارے کے فروغ کے لیے بھرپور کردار ادا کیا جائے گا۔ شرکاء نے فرقہ واریت کے خاتمے، اشتعال انگیز تقاریر سے اجتناب اور سوشل میڈیا سمیت ہر پلیٹ فارم پر ذمہ دارانہ رویہ اختیار کرنے کے عزم کا اظہار کیا۔ اس موقع پر واضح کیا گیا کہ کسی بھی غیر ریاستی عنصر کو امن و امان کی فضا خراب کرنے کی اجازت نہیں دی جائے گی۔شرکاء نے پہلی مرتبہ تمام مکاتبِ فکر اور مذاہب کے نمائندوں کو ایک چھت تلے جمع کرنے کے اقدام کو تاریخی اور انقلابی قرار دیتے ہوئے حکومت اور انتظامیہ کو زبردست خراجِ تحسین پیش کیا۔ مقررین نے امید ظاہر کی کہ علمائے کرام اور مذہبی رہنماؤں کا یہ متحدہ فورم مستقبل میں بھی مذہبی ہم آہنگی، قومی اتحاد اور پائیدار امن کے فروغ میں مؤثر کردار ادا کرتا رہے گا۔اجلاس میں شریک جید علمائے کرام اور شرکاء نے محرم الحرام کے دوران امن و امان کو مزید مؤثر بنانے کے لیے مختلف تجاویز پیش کیں جنہیں قابلِ عمل بنانے پر اتفاق کیا گیا۔اجلاس سے خطاب کرتے ہوئے کمشنر پشاور ڈویژن ریاض خان محسود نے تمام مکاتبِ فکر کے علمائے کرام اور مذہبی رہنماؤں کا متحد ہو کر قومی یکجہتی کا مظاہرہ کرنے پر شکریہ ادا کیا اور ان کے ذمہ دارانہ کردار کو سراہا۔ انہوں نے علمائے کرام سے اپیل کی کہ جمعہ کے خطبات میں امن، رواداری، بھائی چارے اور فرقہ واریت کے خاتمے سے متعلق خصوصی پیغام دیا جائے تاکہ معاشرے میں برداشت اور اتحاد کو فروغ حاصل ہو۔کمشنر پشاور نے مختلف مکاتبِ فکر کے جلسوں، جلوسوں، مجالس اور مذہبی تقریبات کے لیے یکساں سیکیورٹی اور انتظامی اقدامات یقینی بنانے کی ہدایات جاری کرتے ہوئے اعلان کیا کہ محرم الحرام کے دوران تمام انتظامات کی براہِ راست نگرانی کی جائے گی تاکہ شہریوں کو پرامن ماحول فراہم کیا جا سکے۔اجلاس اس عزم کے ساتھ اختتام پذیر ہوا کہ امن، اتحاد، رواداری اور قومی یکجہتی ہی ایک مضبوط اور مستحکم پاکستان کی ضمانت ہیں، اور تمام طبقات مل کر محرم الحرام کو باہمی احترام، بھائی چارے اور مذہبی ہم آہنگی کے ماحول میں گزارنے کے لیے اپنا بھرپور کردار ادا کریں گے۔

یوتھ سینیٹ آف پاکستان کے نوجوانوں پر مشتمل ایک وفد نے خیبرپختونخوا اسمبلی کا دورہ کیا، جہاں انہیں اسمبلی کے امور، قانون سازی کے عمل اور پارلیمانی روایات سے آگاہ کیا گیا۔اس موقع پر اسپیکر خیبرپختونخوا اسمبلی بابر سلیم سواتی کے وژن کے مطابق نوجوان نسل میں جمہوری اور پارلیمانی شعور اجاگر کرنے کے حوالے سے خیبرپختونخوا اسمبلی کے اقدامات پر روشنی ڈالی گئی۔ بتایا گیا کہ اسپیکر خیبرپختونخوا اسمبلی نوجوانوں کی مثبت رہنمائی اور انہیں جمہوری اقدار سے روشناس کرانے کے لیے خصوصی دلچسپی رکھتے ہیں، تاکہ نوجوان نسل میں پارلیمانی نظام، آئینی ذمہ داریوں اور قومی اداروں کے بارے میں آگاہی پیدا ہو سکے۔اسپیکر خیبرپختونخوا اسمبلی کی ہدایات کی روشنی میں سیکرٹری خیبرپختونخوا اسمبلی سید وقار شاہ نے وفد کو اسمبلی کے مختلف شعبہ جات، قانون سازی کے مراحل اور ایوان کی کارروائی سے متعلق تفصیلی بریفنگ دی۔ انہوں نے اپنے خطاب میں کہا کہ نوجوانوں کو جمہوری عمل میں مؤثر کردار ادا کرنے کے لیے پارلیمانی نظام اور آئینی تقاضوں سے آگاہ کرنا وقت کی اہم ضرورت ہے، اور خیبرپختونخوا اسمبلی اسپیکر بابر سلیم سواتی کے وژن کے تحت اس سلسلے میں بھرپور کردار ادا کر رہی ہے۔دورے کے دوران یوتھ سینیٹ آف پاکستان کے وفد کی حلف برداری کی تقریب بھی منعقد ہوئی، جس میں رکن صوبائی اسمبلی مہر سلطانہ نے وفد کے اراکین سے حلف لیا۔ اس موقع پر انہوں نے نوجوانوں سے خطاب کرتے ہوئے انہیں قومی ترقی، مثبت سوچ اور جمہوری عمل میں فعال شرکت کی اہمیت سے آگاہ کیا۔اس موقع پر رکن صوبائی اسمبلی عثمان ارباب نے بھی وفد کے دورے میں شرکت کی اور نوجوانوں کے ساتھ ملاقات کرتے ہوئے ان کی حوصلہ افزائی کی اور جمہوری عمل میں ان کے کردار کو سراہا۔وفد کے اراکین نے خیبرپختونخوا اسمبلی کی جانب سے نوجوانوں کی تربیت اور انہیں جمہوری اداروں سے روشناس کرانے کے اقدامات کو سراہتے ہوئے اس عزم کا اظہار کیا کہ وہ حاصل کردہ تجربات اور معلومات کو اپنی عملی زندگی میں بروئے کار لائیں گے۔

خیبرپختونخوا کے وزیر صحت خلیق الرحمٰن نے وقار ظہیر ہاسٹل میں پیش آنے والے افسوسناک گیس دھماکے میں شدید زخمی ہونے والے حیات آباد میڈیکل کمپلیکس کے ٹرینی میڈیکل آفیسر ڈاکٹر ماجد کی عیادت کے لیے حیات آباد میڈیکل کمپلیکس کا دورہ کیا۔اس موقع پر انصاف ڈاکٹرز فورم پاکستان کے مرکزی صدر ڈاکٹر مُدیر خان وزیر، انصاف ڈاکٹرز فورم خیبرپختونخوا کے سابق صدر ڈاکٹر نبی جان آفریدی، سابق نائب صدور ڈاکٹر نظیف وزیر اور ڈاکٹر لیاقت وزیر بھی ان کے ہمراہ موجود تھے۔صوبائی وزیر صحت نے ہسپتال انتظامیہ، ہسپتال ڈائریکٹر، ڈین حیات آباد میڈیکل کمپلیکس اور پلاسٹک اینڈ برن یونٹ کے ڈائریکٹر پروفیسر ڈاکٹر تحمید اللہ سے ملاقات کی اور ڈاکٹر ماجد کی موجودہ طبی حالت، جاری علاج اور آئندہ کے لائحہ عمل کے حوالے سے تفصیلی بریفنگ حاصل کی۔اس موقع پر وزیر صحت خلیق الرحمٰن نے ڈاکٹر ماجد اور ان کے اہلِ خانہ سے مکمل یکجہتی کا اظہار کرتے ہوئے یقین دلایا کہ حکومتِ خیبرپختونخوا ان کے علاج و معالجے کے لیے ہر ممکن تعاون اور تمام دستیاب وسائل فراہم کرے گی۔ انہوں نے ہسپتال انتظامیہ کو ہدایت کی کہ ڈاکٹر ماجد کو علاج کی بہترین سہولیات اور خصوصی طبی نگہداشت کی فراہمی یقینی بنائی جائے۔وزیر صحت نے کہا کہ ڈاکٹر ماجد اس وقت ماہر معالجین کی نگرانی میں زیرِ علاج ہیں اور ان کی صحت یابی کے لیے تمام ضروری طبی وسائل بروئے کار لائے جا رہے ہیں۔ انہوں نے مزید کہا کہ اگر معالجین کی سفارش اور اہلِ خانہ کی رضامندی کی روشنی میں مستقبل میں ملک کے اندر یا بیرونِ ملک کسی خصوصی طبی مرکز میں علاج کی ضرورت پیش آتی ہے تو حکومت اس ضمن میں بھی مکمل معاونت اور تمام ضروری انتظامات کو یقینی بنائے گی۔خلیق الرحمٰن نے کہا کہ ڈاکٹرز ہمارے صحت کے نظام کا قیمتی سرمایہ ہیں اور حکومت ان کی فلاح و بہبود، تحفظ اور بہترین طبی سہولیات کی فراہمی کے لیے تمام ممکن اقدامات جاری رکھے گی۔انہوں نے ڈاکٹر ماجد کی جلد اور مکمل صحت یابی کے لیے نیک خواہشات کا اظہار کرتے ہوئے کہا کہ اس مشکل وقت میں حکومتِ خیبرپختونخوا ڈاکٹر ماجد اور ان کے اہلِ خانہ کے ساتھ کھڑی ہے اور ہر ممکن مدد فراہم کرنے کے لیے پُرعزم ہے۔

وزیراعلیٰ خیبرپختونخوا محمد سہیل آفریدی کی خصوصی ہدایات پر صوبے میں نظامِ انصاف کو مزید مؤثر، شفاف اور عوام دوست بنانے کے لیے قانونی اصلاحات کا عمل تیزی سے جاری ہے۔ اس سلسلے میں مختلف قوانین میں اصلاحات کے لیے قائم خصوصی کمیٹی کا ایک اہم اجلاس وزیر قانون آفتاب عالم کی زیر صدارت محکمہ قانون کے کانفرنس روم میں منعقد ہوا۔اجلاس میں محکمہ قانون اور ایڈووکیٹ جنرل آفس کے اعلیٰ حکام و نمائندگان نے شرکت کی، جہاں متعدد اہم قوانین کا تفصیلی جائزہ لیا گیا۔ اجلاس کا بنیادی مقصد عوام کو فوری، سستے اور مؤثر انصاف کی فراہمی کے لیے قانونی و عدالتی نظام کو جدید تقاضوں سے ہم آہنگ بنانا تھا۔کمیٹی نے مصالحتی جرگہ ایکٹ، پراسیکیوشن ایکٹ، مینٹیننس آف پبلک آرڈر (MPO) سمیت دیگر اہم قوانین میں مجوزہ اصلاحات پر غور کیا۔ اراکین نے اپنی تجاویز اور آراء پیش کیں، جن کی روشنی میں مجوزہ ترامیم کا ابتدائی مسودہ تیار کر لیا گیا ہے۔قانونی اصلاحات کے لیے قائم یہ کمیٹی گزشتہ چھ روز سے مسلسل اجلاسوں کے ذریعے مختلف قوانین کا باریک بینی سے جائزہ لے رہی ہے تاکہ ایک جامع اور مؤثر اصلاحاتی پیکج مرتب کیا جا سکے۔مجوزہ ترامیم کا مسودہ جلد ہی حتمی منظوری کے لیے وزیراعلیٰ خیبرپختونخوا محمد سہیل آفریدی اور صوبائی کابینہ کے سامنے پیش کیا جائے گا۔اجلاس میں امید ظاہر کی گئی کہ یہ اصلاحات صوبے میں قانون کی حکمرانی کو مزید مضبوط بنانے، انصاف کی بروقت فراہمی کو یقینی بنانے اور ایک جدید، شفاف اور عوامی توقعات سے ہم آہنگ نظامِ انصاف کے قیام کی جانب ایک اہم سنگِ میل ثابت ہوں گی۔

خیبرپختونخوا محکمہ ایکسائز، ٹیکسیشن و نارکوٹکس کنٹرول کی جانب سے صوبہ بھر میں ٹیکس وصولی، گاڑیوں کی رجسٹریشن اور قانونی تقاضوں کی پابندی یقینی بنانے کے لیے مختلف اضلاع میں کارروائیاں تیز کر دی گئی ہیں۔پشاور میں ایکسائز اینڈ ٹیکسیشن آفیسر (ای ٹی او VI) اعجاز انور نے سرحد چیمبر آف کامرس کا دورہ کیا، جہاں انہوں نے چیمبر کے صدر، عہدیداران اور کاروباری نمائندوں سے ملاقات کی۔ ملاقات کے دوران پراپرٹی ٹیکس اور کاروباری برادری کو درپیش مختلف مسائل پر تفصیلی تبادلہ خیال کیا گیا۔ ای ٹی او اعجاز انور نے ٹیکس دہندگان کو فراہم کی جانے والی سہولیات، ٹیکس نظام میں شفافیت اور حکومتی اصلاحاتی اقدامات سے آگاہ کرتے ہوئے کہا کہ کاروباری برادری کے ساتھ باہمی تعاون اور مسلسل مشاورت کے ذریعے محصولات کے نظام کو مزید مؤثر اور عوام دوست بنایا جا رہا ہے۔اس طرح ضلع ایبٹ آباد میں ایکسائز اینڈ ٹیکسیشن آفس نے ایبٹ آباد پولیس کے تعاون سے غیر رجسٹرڈ موٹرسائیکلوں کے خلاف مشترکہ کریک ڈاؤن شروع کر دیا ہے۔ مختلف مقامات پر ناکہ بندیاں اور چیکنگ پوائنٹس قائم کرکے متعدد غیر رجسٹرڈ موٹرسائیکلوں کو تحویل میں لے کر قانونی کارروائی کا آغاز کر دیا گیا۔ محکمہ ایکسائز کے مطابق غیر رجسٹرڈ گاڑیاں اور موٹرسائیکلیں سیکیورٹی، ٹریفک نظم و ضبط اور عوامی تحفظ کے لیے خطرہ بن سکتی ہیں، اس لیے شہری اپنی گاڑیوں اور موٹرسائیکلوں کی بروقت رجسٹریشن یقینی بنائیں۔ایبٹ آباد میں ہی ایکسائز حکام نے ایکسپائر لائسنس کے حامل اور غیر قانونی طور پر کام کرنے والے شوروم مالکان کے خلاف بھی خصوصی کارروائی کی جس کے دوران متعدد شورومز کو سیل اور ٹیکس نادہندہ مالکان کے چالان کیے گئے۔اسی طرح کوہاٹ میں محکمہ ایکسائز نے پروفیشنل ٹیکس، پراپرٹی ٹیکس اور موٹر وہیکل ڈیلر ٹیکس کے نادہندگان کے خلاف خصوصی سیلنگ مہم چلائی۔ کارروائی کے دوران مین بازار، لاری اڈہ، پنڈی روڈ اور دیگر علاقوں میں متعدد دکانیں، مارکیٹیں، کاروباری مراکز، میڈیکل سینٹرز اور مختلف ڈاکٹرز کے کلینکس سیل کر دیے گئے۔ حکام کے مطابق واجبات کی ادائیگی تک سیل شدہ املاک اور کاروباری مراکز بند رہیں گے جبکہ نادہندگان کے خلاف کارروائیاں آئندہ بھی جاری رکھی جائیں گی۔محکمہ ایکسائز، ٹیکسیشن و نارکوٹکس کنٹرول نے عوام اور کاروباری برادری کو مطلع کیا ہے کہ وہ اپنے ٹیکس واجبات، گاڑیوں اور موٹرسائیکلوں کی رجسٹریشن، لائسنسوں کی تجدید اور دیگر قانونی تقاضوں کو بروقت مکمل کریں تاکہ کسی بھی قسم کی قانونی کارروائی اور پریشانی سے بچا جا سکے۔

خیبرپختونخوا حکومت کی منشیات کے خلاف زیرو ٹالرنس پالیسی اور وزیر ایکسائز، ٹیکسیشن و نارکوٹکس کنٹرول سید فخر جہان کی ہدایات کی روشنی میں محکمہ ایکسائز، ٹیکسیشن و نارکوٹکس کنٹرول کی جانب سے صوبے بھر میں منشیات فروشوں اور سمگلروں کے خلاف کریک ڈاؤن جاری ہے۔پشاور اور مردان میں مختلف کارروائیوں کے دوران مجموعی طور پر 63 کلو سے زائد چرس اور 1,060 نشہ آور گولیاں برآمد کرکے متعدد ملزمان کو گرفتار کر لیا گیا۔اس ضمن میں ایکسائز بیورو آف انٹیلیجنس اینڈ انویسٹیگیشن سکواڈ نے جوائنٹ چیک پوسٹ نزد موٹروے ٹول پلازہ پشاور پر کارروائی کرتے ہوئے ملزم گل زیب ولد فضل واحد کے قبضے سے 2,400 گرام چرس برآمد کرکے اسے موقع پر گرفتار کر لیا۔اسی طرح تھانہ ایکسائز پشاور نے خفیہ اطلاع پر جوائنٹ چیک پوسٹ پر ایک مسافر گاڑی کی تلاشی کے دوران ملزم نوید جان ولد عبدالرشید سکنہ ناگمان سے 1,185 گرام چرس برآمد کرکے اسے گرفتار کر لیا۔پشاور میں ایک اور کارروائی کے دوران ایکسائز بیورو آف انٹیلیجنس اینڈ انویسٹیگیشن سکواڈ نے سپلائی گیٹ نہر کے قریب جی ٹی روڈ پر ملزم حمید اللہ ولد شریف خان کو گرفتار کرکے اس کے قبضے سے 1,060 عدد نشہ آور گولیاں، جن کا مجموعی وزن 432 گرام تھا، برآمد کر لیں۔دریں اثناء مردان میں ایکسائز بیورو آف انٹیلیجنس اینڈ انویسٹیگیشن سکواڈ نے رنگ روڈ پر کارروائی کرتے ہوئے گاڑی نمبر RIP-307 سے 12,000 گرام چرس برآمد کر کے ملزم نور ملک ولد علی حیدر سکنہ چارسدہ کو گرفتار کر لیا۔مردان میں ایک اور بڑی کارروائی کے دوران خفیہ اطلاع پر گاڑی نمبر GAH-8888 سے 48,000 گرام چرس برآمد کر لی گئی اور منشیات سمگلنگ کی کوشش ناکام بنا دی گئی۔تمام مقدمات متعلقہ تھانوں میں درج کر لیے گئے ہیں جبکہ مزید تفتیش اور قانونی کارروائی جاری ہے۔ محکمہ ایکسائز نے اس عزم کا اعادہ کیا ہے کہ صوبے کو منشیات سے پاک بنانے کے لیے منشیات فروشوں اور سمگلروں کے خلاف بلاامتیاز کارروائیاں اسی تسلسل کے ساتھ جاری رکھی جائیں گی۔

خیبرپختونخوا کے وزیر ایکسائز، ٹیکسیشن و نارکوٹکس کنٹرول سید فخر جہان نے حلقہ پی کے-26 بونیر میں مواصلات و تعمیرات کے جاری اور نئے ترقیاتی منصوبوں کے حوالے سے منعقدہ اجلاس کی صدارت کی۔ایگزیکٹو انجینئر مواصلات و تعمیرات ڈویژن II بونیر کے دفتر میں منعقدہ اجلاس میں ایکسین سید ناصر جہان اور مختلف ترقیاتی منصوبوں کے کنٹریکٹرز نے شرکت کی۔ اجلاس میں حلقہ پی کے-26 بونیر میں روڈ سیکٹراور دیگر شعبوں سے متعلق جاری اور نئے ترقیاتی منصوبوں کی پیش رفت، درپیش مسائل اور آئندہ لائحہ عمل پر تفصیلی غور کیا گیا۔اس موقع پر صوبائی وزیر نے کنٹریکٹرز کو درپیش مسائل تفصیل سے سنے اور ان کے ممکنہ اور بروقت حل کی یقین دہانی کرائی۔ سید فخر جہان نے کہا کہ صوبائی حکومت کی جانب سے منظور شدہ ترقیاتی منصوبوں کی بروقت تکمیل اور نئے منصوبوں کے جلد آغاز کو یقینی بنانے کے لیے کنٹریکٹرز کو درپیش مسائل متعلقہ حکام کے سامنے بھرپور انداز میں اٹھائے جائیں گے اور ان کے مناسب حل کے لیے ہر ممکن اقدامات کیے جائیں گے۔انہوں نے کنٹریکٹرز کو ہدایت کی کہ نئے ترقیاتی منصوبوں پر بلا تاخیر کام شروع کیا جائے جبکہ جاری منصوبوں پر تعمیراتی سرگرمیوں میں مزید تیزی لائی جائے تاکہ عوام ان منصوبوں کے ثمرات سے جلد از جلد مستفید ہو سکیں اور انہیں زیادہ سے زیادہ ریلیف فراہم کیا جا سکے۔صوبائی وزیر نے واضح کیا کہ اگر کنٹریکٹرز کو کسی بھی سرکاری دفتر یا متعلقہ محکمے میں کسی قسم کی رکاوٹ یا مسئلے کا سامنا ہو تو انہیں براہ راست آگاہ کیا جائے تاکہ ان مسائل کا بروقت ازالہ کرتے ہوئے ترقیاتی منصوبوں پر کام کی بلا تعطل رفتار کو یقینی بنایا جا سکے۔

خیبرپختونخوا کے وزیر ایکسائز، ٹیکسیشن و نارکوٹکس کنٹرول سید فخر جہان نے پیر کے روز یونیورسٹی آف بونیر کا دورہ کیا جہاں وائس چانسلر پروفیسر ڈاکٹر جمشید علی خان، انتظامی افسران اور تدریسی عملے نے ان کا استقبال کیا۔صوبائی وزیر نے طلبہ کی سہولت کے لیے یونیورسٹی میں 200 ایم بی پی ایس ہائی سپیڈ انٹرنیٹ سروس کی سہولت کا باقاعدہ افتتاح کیا جبکہ انہیں جامعہ میں جاری تدریسی و تحقیقی سرگرمیوں، نئے تعلیمی شعبہ جات، زیر تعمیر ترقیاتی منصوبوں اور مستقبل کے توسیعی پروگراموں کے حوالے سے تفصیلی بریفنگ دی گئی۔صوبائی وزیر نے یونیورسٹی کے مختلف حصوں کا معائینہ بھی کیا۔ اس موقع پر صوبائی وزیر نے منعقدہ تقریب سے خطاب کرتے ہوئے کہا کہ صوبائی حکومت سیاسی وابستگی سے بالاتر ہو کر بلاامتیاز قوم کے بچوں اور نوجوانوں کو معیاری، جدید اور بامقصد تعلیم کی فراہمی کے لیے عملی اقدامات کر رہی ہے۔ انہوں نے کہا کہ نوجوان نسل کو جدید تقاضوں سے ہم آہنگ تعلیمی سہولیات فراہم کرنا ایک روشن، باصلاحیت اور ترقی یافتہ معاشرے کی بنیاد ہے۔صوبائی وزیر نے کہا کہ یہ بانی چیئرمین عمران خان کا حقیقی اور عوام دوست وژن ہے کہ ملک کے ہر بچے کو معیاری تعلیم اور ترقی کے مساوی مواقع میسر ہوں۔ وزیر اعلیٰ خیبرپختونخوا کی قیادت میں صوبائی حکومت اسی وژن کو عملی جامہ پہنانے کے لیے بھرپور اقدامات کر رہی ہے۔سید فخر جہان نے کہا کہ یونیورسٹی آف بونیر کو علاقے کے ایک معیاری تدریسی، تحقیقی اور علمی مرکز کے طور پر مزید مستحکم کیا جائے گا تاکہ بونیر اور ملحقہ علاقوں کے طلبہ کو اپنے ہی خطے میں اعلیٰ تعلیم اور تحقیق کے بہترین مواقع میسر آ سکیں اور انہیں بہتر مستقبل کی جانب پیش رفت کے لیے ایک مضبوط پلیٹ فارم فراہم کیا جا سکے۔

چیف سیکرٹری خیبرپختونخوا شہاب علی شاہ کی زیر صدارت سول سیکرٹریٹ پشاور میں مون سون کی تیاریوں، جنگلاتی و شہروں میں آتشزدگی کے واقعات کی روک تھام اور موسم گرما کے دوران دیگر اقدامات کا جائزہ لینے کے لئے ایک اہم اجلاس منعقد ہوا۔اجلاس کو بریفنگ دیتے ہوئے بتایا گیا کہ صوبے کے تمام اضلاع میں مون سون سیزن کے دوران نامساعد حالات سے نمٹنےکے لئے ضروری احتیاطی تدابیر کے ضمن میں تیاریاں مکمل کرلی گئی ہیں۔ تمام تحصیلوں کے ہنگامی منصوبوں کا ازسرنو جائزہ لے کر انہیں اپ ڈیٹ کیا جا چکا ہے، پناہ گاہوں کی نشاندہی اور حساس علاقوں کی میپنگ مکمل کر لی گئی ہے۔ ہنگامی صورتحال سے نمٹنے کے لیے فرضی مشقیں (موک ڈرلز) بھی منعقد کی جا چکی ہیں۔ شہری سیلاب کے خطرات میں کمی لانے کے لیے آبی گزرگاہوں اور شہری نالوں کی صفائی کا عمل جاری ہے جبکہ حساس سڑکوں اور پلوں کا معائنہ بھی مکمل کر لیا گیا ہے تاکہ مون سون کے دوران آمدورفت بلا تعطل جاری رہے۔اجلاس کو بتایا گیا کہ گرمیوں کے موسم میں صحت عامہ اور عوامی تحفظ کے لیے خصوصی سمر پلان کی منظوری دی جا چکی ہے۔ ہیٹ ویو اور ہیٹ اسٹروک سے بچاؤ کے لیے خصوصی کیمپ قائم کیے جا رہے ہیں اور ضروری ادویات کی دستیابی یقینی بنائی گئی ہے۔ نجی سوئمنگ پولز کی میپنگ اور حفاظتی انتظامات کا جائزہ لیا جا رہا ہے جبکہ موسم گرما کی تعطیلات کے دوران سرکاری اسکولوں کی سالانہ مرمت و دیکھ بھال بھی جاری ہے۔ سیاحتی مقامات پر ریسکیو 1122 کی ایمبولینسز تعینات کر دی گئی ہیں اور دریاؤں میں ریسکیو آپریشنز کے لیے خصوصی انتظامات کو ہائی الرٹ رکھا گیا ہے۔ مزید برآں سیاحوں کو فوری طبی سہولیات کی فراہمی کے لیے زیادہ رش والے علاقوں میں موبائل ہیلتھ یونٹس اور ای پی آئی بائیکس بھی تعینات کر دی گئی ہیں۔جنگلاتی اور شہری آتشزدگی کی روک تھام کے حوالے سے اجلاس کو بتایا گیا کہ شدید گرمی کے پیش نظر آگ سے بچاؤ، تیاری اور بروقت ردعمل کے لیے جامع اقدامات فعال کر دیے گئے ہیں۔ تمام حساس علاقوں میں ویلج ڈیفنس کمیٹیاں تشکیل دی جا چکی ہیں جبکہ خطرے سے دوچار علاقوں کی نشاندہی اور میپنگ مکمل کر لی گئی ہے۔ تاجروں کے تعاون سے آگاہی مہمات چلائی جا رہی ہیں اور خطرناک برقی مقامات کی نشاندہی اور اصلاح کا عمل بھی جاری ہے تاکہ آتشزدگی کے واقعات کی روک تھام ممکن بنائی جا سکے۔اس موقع پر چیف سیکرٹری شہاب علی شاہ نے تمام متعلقہ محکموں، ضلعی انتظامیہ اور اداروں کو ہدایت کی کہ وہ مون سون اور گرمیوں کے موسم کے دوران مکمل چوکس رہیں اور باہمی رابطہ کاری کو مزید مؤثر بنائیں۔ انہوں نے کہا کہ گڈ گورننس روڈ میپ کے تحت عوامی آگاہی، بروقت ردعمل اور شہریوں کے جان و مال کا تحفظ صوبائی حکومت کی اولین ترجیحات ہیں، جن پر کسی قسم کا سمجھوتہ نہیں کیا جائے گا۔

Khyber Pakhtunkhwa Minister for Information and Public Relations, Shafi Jan, along with Provincial Minister for Law, Aftab Alam Advocate, and Member of the Provincial Assembly Daud Shah Afridi, visited the residence of Al-Haj Shah Gul in Shah Kas, Jamrud.

They expressed deep grief and sorrow to the bereaved family over the sudden demise of former Senator Taj Muhammad Afridi in a tragic traffic accident.

The provincial ministers offered their heartfelt condolences to the grieving family and offered Fatehafor the departed soul.

Speaking on the occasion, Provincial Minister Shafi Jan said that former Senator Taj Muhammad Afridi political and social services would always be remembered. He added that his untimely demise is an irreparable loss for his family.