صوبائی وزیر فضل شکورخان کی ضلع مانسہرہ اور جنوبی وزیرستان میں پبلک ہیلتھ انجینئرنگ کی سکیموں پر کام تیز کرنے کی ہدایات

خیبر پختونخوا کے وزیر برائے پبلک ہیلتھ انجینئرنگ فضل شکور خان نے متعلقہ ایگزیکٹو انجینئرزکو ہدایت کی ہے کہ ضلع مانسہرہ اور جنوبی وزیرستان میں محکمہ پبلک ہیلتھ انجینئرنگ کی تمام جاری ترقیاتی سکیموں پر کام کی رفتار میں نمایاں تیزی لائی جائے اور انہیں مقررہ مدت کے اندر پایہ تکمیل تک پہنچایا جائے۔ انہوں نے مزید ہدایت کی کہ مجوزہ ترقیاتی سکیموں کے پی سی ون پر بھی جلد از جلد مکمل ہوم ورک کرتے ہوئے انہیں منظوری کے لیے صوبائی ڈیولپمنٹ ورکنگ پارٹی (پی ڈی ڈبلیو پی) کو ارسال کیا جائے تاکہ عوام کو بروقت سہولیات فراہم کی جا سکیں۔یہ ہدایات انہوں نے بدھ کے روز اپنے دفتر میں ضلع مانسہرہ اور جنوبی وزیرستان میں محکمہ پبلک ہیلتھ انجینئرنگ کی مختلف جاری اور مجوزہ سکیموں سے متعلق ایک اہم اجلاس کی صدارت کرتے ہوئے جاری کیں۔ اجلاس میں ایکسین مانسہرہ سردار خالد گنڈا پور اور جنوبی وزیرستان کے ایکسین میاں گل نے شرکت کی۔اجلاس کے دوران دونوں ایکسینز نے اپنے اپنے اضلاع میں محکمہ پبلک ہیلتھ انجینئرنگ کی جاری اور مجوزہ سکیموں پر تفصیلی بریفنگ دی اور اب تک ہونے والی پیش رفت، درپیش مسائل اور آئندہ کے لائحہ عمل سے صوبائی وزیر کو آگاہ کیا۔ صوبائی وزیر نے بریفنگ کا جائزہ لیتے ہوئے واضح کیا کہ ترقیاتی منصوبوں میں غیر ضروری تاخیر ہرگز برداشت نہیں کی جائے گی اور عوامی مفاد سے وابستہ سکیموں کی بروقت تکمیل حکومت کی اولین ترجیح ہے۔انہوں نے کہا کہ صاف پینے کے پانی اور سینیٹیشن کی فراہمی عوام کا بنیادی حق ہے اور موجودہ صوبائی حکومت اس ضمن میں تمام دستیاب وسائل بروئے کار لا رہی ہے۔ انہوں نے متعلقہ افسران کو ہدایت کی کہ فیلڈ میں نگرانی مؤثر بنائی جائے، معیار پر کوئی سمجھوتہ نہ کیا جائے اور تمام منصوبوں کو شفافیت کے ساتھ مکمل کیا جائے۔صوبائی وزیر نے یقین دہانی کرائی کہ حکومت اضلاع کی ضروریات کے مطابق نئے منصوبوں کی منظوری اور فنڈز کی فراہمی میں ہر ممکن تعاون فراہم کرے گی تاکہ دور دراز علاقوں سمیت صوبے بھر میں عوام کو محفوظ پانی کی فراہمی یقینی بنائی جا سکے۔