کمشنر کوہاٹ کی تحصیل گمبٹ کے علاقے قمر میں مٹی کا تودہ گرنے کے سانحے میں شہید 7 جوانوں کی رسمِ قُل میں شرکت، لواحقین سے اظہارِ تعزیت

کمشنر کوہاٹ ڈویژن سید معتصم باللہ شاہ نے تحصیل گمبٹ کے علاقے قمر میں مٹی کا تودہ گرنے کے دلخراش واقعے میں شہید ہونے والے سات جوانوں کی رسمِ قُل میں شرکت کی۔ اس موقع پر انہوں نے شہداء کے لواحقین سے صوبائی حکومت، ڈویژنل انتظامیہ اور پولیس کی جانب سے دلی تعزیت اور ہمدردی کا اظہار کیا۔ کمشنر کوہاٹ نے شہداء کے ایصالِ ثواب کیلئے فاتحہ خوانی کی اور ان کے درجات کی بلندی کیلئے دعا کی۔انہوں نے کہا کہ یہ افسوسناک سانحہ نہ صرف متاثرہ خاندانوں بلکہ پورے علاقے کیلئے گہرے رنج و غم کا باعث ہے اور پوری قوم اس دکھ کی گھڑی میں متاثرہ خاندانوں کے دکھ میں برابر کی شریک ہے۔ انہوں نے شہداء کے اہلِ خانہ سے مکمل یکجہتی کا اظہار کیا۔ واضح رہے کہ ساتوں جوان گزشتہ دنوں علاقے قمر میں مٹی کا تودہ گرنے کے حادثے میں جان کی بازی ہار گئے تھے، جس کے بعد پورے علاقے میں سوگ کی فضا قائم ہے۔