کوہاٹ کے عوامی نمائندوں کا پولیس شہداء کے اہلِ خانہ سے اظہارِ تعزیت، انصاف کی یقین دہانی

کوہاٹ شکردرہ روڈ پر پولیس موبائل پر ہونے والی فائرنگ کے افسوسناک واقعے میں شہید ہونے والے پولیس اہلکار سید عامر عباس کے اہلِ خانہ سے اظہارِ تعزیت کیلئے اعلیٰ حکومتی و عوامی نمائندوں نے ان کی رہائشگاہ کا دورہ کیا۔ صوبائی وزیر قانون آفتاب عالم، معاونِ خصوصی برائے اطلاعات شفیع جان، چیئرمین ڈیڈک و ایم پی اے داؤد شاہ آفریدی اور تحصیل چیئرمین گمبٹ ساجد اقبال نے عیسیٰ خیل کچئی میں شہید سید عامر عباس کے گھر جا کر اہلِ خانہ سے تعزیت کی، شہید کے درجات کی بلندی کیلئے دعا کی اور فاتحہ خوانی کی۔ وفد نے اہلِ خانہ سے دلی ہمدردی کا اظہار کرتے ہوئے یقین دہانی کرائی کہ اس المناک واقعے میں ملوث عناصر کو قانون کے کٹہرے میں لایا جائے گا اور شہداء کی قربانیاں رائیگاں نہیں جانے دی جائیں گی۔ واضح رہے کہ کوہاٹ شکردرہ روڈ پر پولیس موبائل پر ہونے والی فائرنگ کے اس واقعے میں 5 پولیس اہلکاروں سمیت مجموعی طور پر 7 افراد شہید ہوئے تھے۔