وزیر اعلیٰ خیبر پختونخوا کے مشیر اطلاعات بیرسٹر ڈاکٹر محمد علی سیف

وزیر اعلیٰ خیبر پختونخوا کے مشیر اطلاعات بیرسٹر ڈاکٹر محمد علی سیف نے اسلام آباد میں افغانستان کے پاکستان میں قائم مقام سفیر مولوی سردار احمد شکیب سے ملاقات کی، سینئر سیاستدان محمد علی درانی اور مولانا فضل الرحمان خلیل بھی ملاقات میں شریک تھے۔اس موقع پر بیرسٹر ڈاکٹر محمد علی سیف نے بانی پی ٹی آئی عمران خان اور وزیر اعلیٰ خیبرپختونخوا کی طرف سے افغانستان کی قیادت کے لئے خصوصی پیغام بھی سفیر مولوی سردار احمد شکیب کے حوالے کیا۔مشیر اطلاعات نے کہا کہ بانی پی ٹی آئی نے افغانستان کے عوام کے لیے خیر سگالی کا پیغام دیتے ہوئے بانی پی ٹی آئی اور وزیر اعلیٰ خیبرپختونخوا کی طرف سے نیک تمناؤں اور برادرانہ خیر سگالی کے جذبات سے بھی آگاہ کیا۔ملاقات میں پاکستان اور افغانستان کے درمیان خوشگوار، باہمی بااعتماد اور دوطرفہ تعاون پر مبنی تعلقات کے فروغ اور دونوں ممالک کے عوام کے درمیان روابط بڑھانے پر اتفاق کیا گیا۔بیرسٹر محمد علی سیف نے افغانستان کے سفیر سے گفتگو کرتے ہوئے کہا کہ وہ قبائلی و سیاسی عمائدین اور علماء کا وفد افغانستان لانا چاہتے ہیں۔ افغانستان کے سفیر نے بانی پی ٹی آئی عمران خان، وزیر اعلیٰ خیبر پختونخوا علی امین گنڈا پور اور وفد کی طرف سے نیک تمناؤں کے اظہار پر جوابی خیر سگالی کے جذبات کا اظہار کیا،افغانستان کے سفیر نے آمد پر بیرسٹر ڈاکٹر محمد علی سیف، محمد علی درانی اور مولانا فضل الرحمان خلیل کا شکریہ ادا کرتے ہوئے کہا کہ دونوں ممالک کے تعلقات کی بہتری کیلئے آپ کا کردار قابل تعریف ہے،سفیر نے کہا کہ پاکستان اور افغانستان کے تعلقات کی مظبوطی خطے اور عوام کے مفاد میں ہے۔