کرم شاہراہ کو محفوظ بناکر قافلوں کو عنقریب روانہ کیا جائیگا، بیرسٹر ڈاکٹر سیف

وزیر اعلیٰ خیبر پختونخوا کے مشیر برائے اطلاعات و تعلقات عامہ بیرسٹر ڈاکٹر سیف نے کہا ہے کہ کرم شاہراہ کو محفوظ بناکر قافلوں کو عنقریب روانہ کیا جائیگا۔ کرم کی مین شاہراہ پر سیکورٹی مزید سخت کی جارہی ہے۔ انہوں نے کہا کہ اپیکس کمیٹی کے فیصلے کی روشنی میں مین شاہراہ پر چیک پوسٹیں اور سیکورٹی مزید بڑھائی جارہی ہے۔ یکم فروری تک بنکرز اور اسلحہ کا خاتمہ یقینی بنایا جائیگااور صوبائی حکومت کی پوری کوشش ہے کہ شر پسند عناصر کا مکمل صفایا کرکے کرم کو امن کا گہوارہ بنایا جائے۔بیرسٹر ڈاکٹر سیف نے کرم کے عوام سے بھی کہا کہ وہ امن کی فضاء قائم کرنے میں انتظامیہ کا ساتھ دیں۔ان کا کہنا تھا کہ ڈپٹی کمشنر پر حملے کے مجرمان عنقریب قانون کی گرفت میں ہوں گے۔ مشیر اطلاعات بیرسٹر ڈاکٹر سیف نے کہا کہ امن معاہدے کے تحت کرم میں امن امان کو یقینی بنایا جائیگا۔ امن دشمنوں کو مذموم عزائم میں کامیاب نہیں ہونے دینگے۔ انہوں نے کہا کہ بنکرز اور اسلحہ کا مکمل خاتمہ کرکے علاقے میں دیرپا امن قائم کریں گے۔ بیرسٹر ڈاکٹر سیف نے کہا کہ عوام اور علاقہ عمائدین پر امن کے قیام میں بھاری ذمہ داریاں عائد ہوتی ہیں۔ عوام اور عمائدین انتظامیہ کے ساتھ ملکر امن کا قیام یقینی بنائیں۔