مرکزی تقریب میں شرکاء سے خطاب کرتے ہوئے مشیر اطلاعات و تعلقات عامہ بیرسٹر ڈاکٹر سیف نے شہداء کے خون

15دسمبر بروز اتوار شہداء ڈی چوک کو خراج عقیدت پیش کرنے کے لیے دعائیہ تقریبات منعقد کی گئیں جن میں مرکزی دعائیہ تقریب باغِ ناران، حیات آباد، پشاور میں منعقد کی گئی۔مرکزی تقریب میں شرکاء سے خطاب کرتے ہوئے مشیر اطلاعات و تعلقات عامہ بیرسٹر ڈاکٹر سیف نے شہداء کے خون کے حساب لینے کے عزم کا اعادہ کرتے ہوئے کہا کہ شہداء کے خون کے ایک ایک قطرے کا حساب لیا جائے گا۔انہوں نے کہا کہ جعلی حکومت کو جواب دینا ہوگا کہ معصوم شہریوں پر گولی کیوں چلائی گئی۔انہوں نے کہا کہ نہتے کارکنوں کا خون رائیگاں نہیں جائے گا۔ بیرسٹر ڈاکٹر سیف نے کہا کہ معصوم کارکنوں کا خون بہانا شریف خاندان کا وطیرہ بن چکا ہے، ماڈل ٹاؤن میں بھی حاملہ خواتین پر سیدھی گولیاں چلائی گئیں، ہر دور میں اپنے اقتدار کو طول دینے کے لیے شریف خاندان نے معصوم شہریوں کا خون بہایا۔مشیر اطلاعات بیرسٹر ڈاکٹر سیف نے کہا کہ نہتے کارکنوں کا خون ملک میں آئین و قانون کی بحالی کا پیش خیمہ ثابت ہوگا۔بیرسٹر ڈاکٹر سیف نے کہا کہ جعلی حکومت نے ملک میں فسطائیت کے تمام ریکارڈ توڑ دئیے۔ پی ٹی آئی قیادت اور کارکنوں پر ظلم و ستم کے پہاڑ توڑے جارہے ہیں۔ انہوں نے کہا کہ جعلی حکومت یاد رکھے کہ وقت ہمیشہ ایک جیسا نہیں رہتا،اتنا ظلم کریں جتنا برداشت کرسکتے ہیں۔ پی ٹی آئی قیادت اور کارکنوں نے بڑے تحمل سے تمام مظالم کا ڈٹ کر مقابلہ کیا۔ مشیر اطلاعات بیرسٹر سیف نے کہا کہ سانحہ ڈی چوک نے قومی اور بین الاقوامی سطح پر ملک و قوم کا نام بدنام کیا ہے۔