وفاقی حکومت نے نئے مالی سال کے آغاز سے قبل عوام پر پیٹرول بم گرا دیا ہے، بیرسٹر ڈاکٹر سیف

وزیر اعلیٰ خیبر پختونخوا کے مشیر اطلاعات و تعلقات عامہ بیرسٹر ڈاکٹر سیف نے کہا ہے کہ وفاقی حکومت نے نئے مالی سال کے آغاز سے قبل عوام پر پیٹرول بم گرا دیا ہے۔جولائی سے شروع ہونے والے نئے مالی سال میں پیٹرولیم مصنوعات کی قیمتوں میں مزید اضافہ ہوگا،وفاقی بجٹ میں پیٹرولیم مصنوعات پر ڈھائی فیصد نیا ٹیکس عائد کیا گیا ہے،نئے مالی سال کے آغاز پر پیٹرولیم مصنوعات کی قیمتیں آسمان سے باتیں کریں گی۔ پیٹرولیم مصنوعات کی قیمتوں میں اضافے سے تمام اشیائے خوردونوش کی قیمتیں بھی بڑھ جاتی ہیں۔ بیرسٹر ڈاکٹر سیف نے مزید کہا کہ وفاقی بجٹ غریب دشمن اور امیر دوست بجٹ ہے،پنجاب حکومت کا بجٹ بھی غریب دشمن ہے۔ پنجاب کے بجٹ میں زرعی شعبے کو مکمل طور پر نظر انداز کیا گیا ہے۔ پنجاب کے متاثرہ کسانوں کو بجٹ میں کوئی ریلیف نہیں دیا گیا۔جعلی وفاقی حکومت کی غلط پالیسیوں کے باعث پنجاب کے کسانوں کو 2200 ارب روپے کا نقصان برداشت کرنا پڑا،پنجاب میں صرف کمیشن والے منصوبوں کو ترجیح دی گئی ہے۔انہوں نے کہا کہ پنجاب حکومت اس بجٹ میں بھی خیبر پختونخوا کی طرح صحت کی مفت سہولیات فراہم کرنے کی ہمت نہ کر سکی۔پنجاب کو صحت کی سہولیات فراہم کرنے میں دقت ہو تو خیبر پختونخوا مدد کے لئے تیار ہے، خیبر پختونخوا میں عمران خان کے وژن کے مطابق بجٹ میں فلاحی منصوبے شامل ہیں اور وزیراعلیٰ کی قیادت میں صوبے میں فلاحی کاموں کو ترجیح دی جارہی ہے۔ انہوں نے کہا کہ وفاقی حکومت کی بجٹ سے آئندہ مالی سال مہنگائی کا نیا طوفان ائیگا غریب مہنگائی کی چکی میں پسے گا جبکہ امیر طبقہ عیاشی کریگا۔ بیرسٹر ڈاکٹرسیف نے کہا کہ جعلی حکمرانوں کو عوام کی کوئی فکر نہیں ہے وفاقی حکومت نے بجٹ امیر طبقات کے مفاد کو مدنظر رکھ کر بنایا ہے اسلئے بجٹ میں غریب عوام کے لئے کچھ نہیں ہے۔ انہوں نے مزید کہا کہ وفاقی بجٹ میں مختلف اشیاء پر ٹیکسز لگائے گئے ہیں پٹرولیم مصنوعات پر لیوی اور بجلی پر سرچارج لگائے گئے ہیں جس سے غریب طبقے پر مہنگائی بوجھ مزید بڑھے گا۔ بیرسٹر سیف نے کہا کہ وفاق کے برعکس خیبر پختونخوا حکومت نے ٹیکس فری بجٹ پیش کیا جو حقیقی معنوں میں عوام دوست اور غریب دوست بجٹ ہے۔