خیبرپختونخوا کے وزیر خوراک ظاہر شاہ طورو سے تحریک انصاف مردان کی ضلعی تنظیم کمیٹی ممبران کی ملاقات

خیبرپختونخوا کے وزیر برائے خوراک ظاہر شاہ طورو سے پاکستان تحریک انصاف مردان کی ضلعی تنظیم کمیٹی ممبران نے پشاور میں ملاقات کی۔ ملاقات میں ضلع مردان میں جاری ترقیاتی منصوبوں اور گرفتار پارٹی کارکنان کی رہائی کے لائحہ عمل پر تفصیلی تبادلہ خیال کیا گیا۔صوبائی وزیر نے پارٹی کارکنان سے کہا کہ تمام کارکنان ضلع میں جاری ترقیاتی منصوبوں کی نگرانی کریں اور کسی بھی مسئلے کی فوری اطلاع دیں تاکہ وقت پر اقدامات اٹھائے جا سکیں۔ انہوں نے کہا کہ ضلع مردان کو ماڈل ضلع بنانے کے لیے تمام ممکنہ اقدامات کیے جائیں گے اور عوام سے کیے گئے تمام ترقیاتی وعدے پورے کیے جائیں گے۔اس موقع پر پی ٹی آئی کے گزشتہ احتجاج کے دوران مردان سے تعلق رکھنے والے گرفتار کارکنان کی رہائی پر بھی گفتگو کی گئی،صوبائی وزیر خوراک نے ضلعی کمیٹی کو یقین دہانی کرائی کہ تمام گرفتار کارکنان کی جلد رہائی کے لیے اقدامات کیے جا رہے ہیں۔ملاقات میں موجود ضلعی رہنماؤں نے عوامی مسائل کے حل کے لیے صوبائی وزیر کے اقدامات کو سراہا۔