باجوڑ دھماکہ نگران وزیر اعلی محمد اعظم کا چیف سیکرٹری اور سیکرٹری صحت سے رابطہ

باجوڑ میں ہونے والے دھماکے کے بعد خیبر پختونخوا کے نگران وزیر اعلی محمد اعظم خان نے چیف سیکرٹری اور سیکرٹری صحت سے رابطہ کرتے ہوئے بروقت اور بہترین طبی امداد کی فراہمی کے لئے خصوصی انتظامات کی ہدایت کی ہے۔ انہوں نے مزید بتایا کہ پشاور کے تدریسی ہسپتالوں میں دھماکے کے زخمیوں کے لئے ایمرجنسی نافذ کرنے کی ہدایت دی گئی ہے۔ نگران وزیر اعلی محمد اعظم خان نے یقین دلایا ہے کہ پشاور کے بڑے ہسپتالوں میں باجوڑ دھماکے کے زخمیوں کے لئے خصوصی وارڈز مختص کئے جا رہے ہیں۔ انہوں نے زخمیوں کو بہترین طبی امداد فراہم کرنے کے لئے تمام ضروری اقدامات بروئے کار لانے کا اعلان کیا ہے۔ نگران وزیر اعلی نے زور دیا کہ دھماکے کے زخمیوں کو بہترین اور بروقت طبی امداد کی فراہمی میں کوئی کوتاہی برداشت نہیں کی جائے گی۔ انہوں نے کہا کہ وہ خود زخمیوں کو طبی امداد کی فراہمی کے عمل کی نگرانی کریں گے۔ نگران وزیر اعلی محمد اعظم خان نے بتایا کہ زخمیوں کو پشاور کے ہسپتالوں میں منتقل کرنے کے لئے صوبائی حکومت کا ہیلی کاپٹر فراہم کر دیا گیا ہے۔ وزیر اعلیٰ کی ہدایت پر چیف سیکرٹری خیبر پختونخوا ریسکیو آپریشن کی خود نگرانی کر رہے ہیں۔